Zaburi 44

Kuomba ulinzi wa Mungu

¹Ee Mungu, tumesikia kwa masikio yetu,

baba zetu wametueleza

yale uliyotenda katika siku zao,

siku za kale.

²Kwa mkono wako uliwafukuza mataifa

na ukawapanda baba zetu,

uliangamiza mataifa

na kuwastawisha baba zetu.

³Sio kwa upanga wao waliipata nchi,

wala si mkono wao uliwapatia ushindi;

ilikuwa ni kitanga cha mkono wako wa kuume,

na nuru ya uso wako,

kwa kuwa uliwapenda.

⁴Wewe ni mfalme wangu na Mungu wangu,

unayeamuru ushindi kwa Yakobo.

⁵Kwa uwezo wako tunawasukuma nyuma watesi wetu;

kwa jina lako tunawakanyaga adui zetu.

⁶Siutumaini upinde wangu,

upanga wangu hauniletei ushindi;

⁷bali wewe unatupatia ushindi juu ya adui zetu,

unawaaibisha watesi wetu.

⁸Katika Mungu wetu tunajivuna mchana kutwa,

nasi tutalisifu jina lako milele.

⁹Lakini sasa umetukataa na kutudhili,

wala huendi tena na jeshi letu.

¹⁰Umetufanya tukimbie mbele ya adui,

nao watesi wetu wametuteka nyara.

¹¹Umetuacha tutafunwe kama kondoo

na umetutawanya katika mataifa.

¹²Umewauza watu wako kwa fedha kidogo,

wala hukupata faida yoyote kwa mauzo yao.

¹³Umetufanya lawama kwa majirani zetu,

dharau na dhihaka kwa wale wanaotuzunguka.

¹⁴Umetufanya kuwa mithali miongoni mwa mataifa;

mataifa hututikisia vichwa vyao.

¹⁵Fedheha yangu iko mbele yangu mchana kutwa,

na uso wangu umejaa aibu tele,

¹⁶kwa ajili ya dhihaka ya wale wanaonilaumu na kunitukana,

kwa sababu ya adui, ambaye anatamani kulipiza kisasi.

¹⁷Hayo yote yametutokea,

ingawa tulikuwa hatujakusahau

wala hatujaenda kinyume na agano lako.

¹⁸Mioyo yetu ilikuwa haijarudi nyuma;

nyayo zetu zilikuwa hazijaiacha njia yako.

¹⁹Lakini ulituponda na kutufanya makao ya mbweha,

na ukatufunika kwa giza nene.

²⁰Kama tungekuwa tumelisahau jina la Mungu wetu

au kunyooshea mikono yetu kwa mungu mgeni,

²¹je, si Mungu angegundua hili,

kwa kuwa anazijua siri za moyo?

²²Hata hivyo kwa ajili yako tunauawa mchana kutwa;

tumehesabiwa kama kondoo wa kuchinjwa.

²³Amka, Ee Bwana! Kwa nini unalala?

Zinduka! Usitukatae milele.

²⁴Kwa nini unauficha uso wako

na kusahau taabu na mateso yetu?

²⁵Tumeshushwa hadi mavumbini,

miili yetu imegandamana na ardhi.

²⁶Inuka na utusaidie,

utukomboe kwa sababu ya upendo wako usio na mwisho.