Zaburi 6

Sala ya kuomba msaada wakati wa taabu

¹Ee Bwana , usinikemee katika hasira yako,

wala usiniadhibu katika ghadhabu yako.

²Unirehemu Bwana ,

kwa maana nimedhoofika;

Ee Bwana , uniponye,

kwa maana mifupa yangu

ina maumivu makali.

³Nafsi yangu ina uchungu mwingi.

Hadi lini, Ee Bwana , hadi lini?

⁴Geuka, Ee Bwana , unikomboe,

uniokoe kwa sababu ya fadhili zako.

⁵Hakuna mtu anayekukumbuka

akiwa amekufa.

Ni nani awezaye kukusifu

akiwa Kuzimu?

⁶Nimechakaa kwa kulia kwa huzuni;

usiku kucha natiririsha

kitanda changu kwa machozi;

nimelowesha kiti changu

kwa machozi yangu.

⁷Macho yangu yamedhoofika kwa kuhuzunika,

yamedhoofika kwa sababu ya adui zangu wote.

⁸Kaeni mbali nami, ninyi nyote mtendao mabaya,

kwa maana Bwana amesikia kulia kwangu.

⁹Bwana amesikia kilio changu kwa huruma,

Bwana amekubali sala yangu.

¹⁰Adui zangu wote wataaibika na kufadhaika,

watarudi nyuma na waaibishwe kwa ghafula.