Zaburi 97

Mungu Mtawala mkuu

¹Bwana anatawala, nchi na ifurahi,

visiwa vyote vishangilie.

²Mawingu na giza nene vinamzunguka,

haki na hukumu ndio msingi wa kiti chake cha enzi.

³Moto hutangulia mbele zake

na huteketeza adui zake pande zote.

⁴Umeme wake wa radi humulika dunia,

nchi huona na kutetemeka.

⁵Milima huyeyuka kama nta mbele za Bwana ,

mbele za Bwana wa dunia yote.

⁶Mbingu zinatangaza haki yake,

na mataifa yote huona utukufu wake.

⁷Wote waabuduo sanamu waaibishwa,

wale wajisifiao sanamu:

mwabuduni yeye, enyi miungu yote!

⁸Sayuni husikia na kushangilia,

vijiji vya Yuda vinafurahi

kwa sababu ya hukumu zako, Ee Bwana .

⁹Kwa kuwa wewe, Ee Bwana , ndiwe Uliye Juu Sana kuliko dunia yote;

umetukuka sana juu ya miungu yote.

¹⁰Wale wanaompenda Bwana na wauchukie uovu,

kwa maana yeye hulinda maisha ya waaminifu wake

na kuwaokoa kutoka mkononi mwa mwovu.

¹¹Nuru huangaza wenye haki

na furaha kwa watu wanyofu wa moyo.

¹²Furahini katika Bwana , enyi wenye haki,

lisifuni jina lake takatifu.