¹Nakuagiza mbele za Mungu, na mbele za Kristo Yesu, atakayewahukumu walio hai na waliokufa; kwa kufunuliwa kwake na kwa ufalme wake;[#Mdo 10:42; 1 Pet 4:5; Rum 14:9,10]

²lihubiri neno, uwe tayari, wakati ukufaao na wakati usiokufaa, karipia, kemea, na kuonya kwa uvumilivu wote na mafundisho.[#Mdo 20:20,31]

³Maana utakuja wakati watakapoyakataa mafundisho yenye uzima; ila kwa kuzifuata nia zao wenyewe watajipatia waalimu wengi, watakaowaambia yale tu masikio yao yanataka kusikia;[#2 Tim 1:13; 1 Tim 4:1]

⁴nao watajiepusha wasisikie yaliyo kweli, na kuzigeukia hadithi za uongo.[#1 Tim 4:7; 2 The 2:11]

⁵Bali wewe, uwe mwenye kiasi katika mambo yote, vumilia mabaya, fanya kazi ya mhubiri wa Injili, timiza huduma yako kwa ukamilifu.[#2 Tim 2:3; Efe 4:11]

⁶Kwa maana, mimi sasa namiminwa, na wakati wa kufariki kwangu umefika.[#Flp 2:17]

⁷Nimevipiga vita vilivyo vizuri, mwendo nimeumaliza, Imani nimeilinda;[#1 Kor 9:25; 1 Tim 6:12; Flp 3:14]

⁸baada ya hayo nimewekewa taji ya haki, ambayo Bwana, mhukumu mwenye haki, atanipa siku ile; wala si mimi tu, bali na watu wote pia waliopenda kufunuliwa kwake.[#2 Tim 2:5; Yn 1:22; 1 Pet 5:4; Ufu 2:10]

Maagizo binafsi

⁹Jitahidi uwezavyo kuja kwangu upesi.[#2 Tim 1:4]

¹⁰Maana Dema aliniacha, akiupenda ulimwengu huu wa sasa, akasafiri kwenda Thesalonike; Kreske amekwenda Galatia; Tito amekwenda Dalmatia.[#2 Kor 8:23; Gal 2:3; Kol 4:14; Tit 1:4; Flm 1:24]

¹¹Luka peke yake yupo hapa pamoja nami. Umtwae Marko, umlete pamoja nawe, maana ananifaa kwa utumishi.[#Mdo 12:12,25; 13:13; 15:37-39; Kol 4:10,14; Flm 1:24]

¹²Lakini Tikiko nilimtuma Efeso.[#Mdo 20:4; Efe 6:21-22; Kol 4:7-8]

¹³Lile joho nililoliacha kwa Karpo huko Troa, ujapo ulilete, na vile vitabu, hasa vile vya ngozi.[#Mdo 20:6]

¹⁴Iskanda, mfua shaba, alionesha ubaya mwingi kwangu; Bwana atamlipa kulingana na matendo yake.[#Zab 28:4; 62:12; Mit 24:12; Rum 2:6; 1 Tim 1:20; 2 Sam 3:39]

¹⁵Nawe ujihadhari na huyo, kwa sababu aliyapinga sana maneno yetu.

¹⁶Katika utetezi wangu wa kwanza hakuna mtu aliyesimama upande wangu, bali wote waliniacha; naomba wasihesabiwe hatia kwa jambo hilo.[#2 Tim 1:15]

¹⁷Lakini Bwana alisimama pamoja nami akanitia nguvu, ili kwa kazi yangu ule ujumbe utangazwe kwa utimilifu, hata wasikie Mataifa yote; nami nikaokolewa na kinywa cha simba.[#Zab 22:21; Dan 6:21,28; Mdo 23:11; 27:23]

¹⁸Bwana ataniokoa na kila neno baya, na kunihifadhi hata nifike katika ufalme wake wa mbinguni. Utukufu una Yeye milele na milele. Amina.

Salamu za mwisho na baraka

¹⁹Nisalimie Priska na Akila, na wale wa nyumbani mwa Onesiforo.[#Mdo 18:2; 2 Tim 1:16-17]

²⁰Erasto alibaki Korintho. Trofimo nilimwacha huko Mileto, mgonjwa.[#Mdo 19:22; 20:4; 21:29; Rum 16:23]

²¹Jitahidi uwezavyo kuja kabla ya majira ya baridi. Eubulo akusalimu, na Pude, na Lino, na Klaudia, na ndugu wote pia.

²²Bwana na awe pamoja na roho yako. Neema na iwe pamoja nanyi.