Wimbo wa imani na usalama kwa Mungu

¹Mungu, unihifadhi mimi,[#Zab 25:20]

Kwa maana nakukimbilia Wewe.

²Nimemwambia BWANA, Ndiwe BWANA wangu;

Sina wema ila utokao kwako.

³Nao watakatifu waliopo duniani, ndio Walio bora,

Hao ndio niliopendezwa nao.

⁴Huzuni zao zitaongezeka

Wambadilio Mungu kwa mwingine;

Sitazimimina sadaka zao za damu,

Wala kuyataja majina yao midomoni mwangu.

⁵BWANA ndiye fungu la posho langu,

Na la kikombe changu;

Wewe unayaamua maisha yangu.

⁶Mipaka yangu imeangukia mahali pema,

Naam, nimepata urithi mzuri.

⁷Nitamhimidi BWANA aniongozaye,

Wakati wa usiku pia moyo wangu hunishauri.

⁸Nimemweka BWANA mbele yangu daima,[#Mdo 2:25-28]

Kwa kuwa yuko kuliani mwangu, sitaondoshwa.

⁹Kwa hiyo moyo wangu unafurahi,

Nayo nafsi yangu inashangilia,

Naam, mwili wangu nao utakaa kwa kutumaini.

¹⁰Maana hutaitupa kuzimu nafsi yangu,[#Mdo 13:35; Zab 49:15; Mdo 2:27; Dan 9:24; Lk 1:35]

Wala hutamtoa mtakatifu wako aone uharibifu.

¹¹Utanijulisha njia ya uzima;[#Mdo 2:28]

Mbele za uso wako kuna furaha tele;

Na katika mkono wako wa kulia

Mna mema ya milele.