Shukrani kwa ajili ya uthibitisho

¹Ni neno jema kumshukuru BWANA,

Na kuliimbia jina lako sifa, Ee Uliye Juu.

²Kuzitangaza rehema zako asubuhi,

Na uaminifu wako wakati wa usiku.

³Kwa chombo chenye nyuzi kumi,

Na kwa kinanda,

Na kwa mlio wa kinubi.

⁴Kwa kuwa umenifurahisha, BWANA,

Kwa kazi yako; nitashangilia

Kwa ajili ya matendo ya mikono yako.

⁵Ee BWANA, jinsi yalivyo makuu matendo yako![#Isa 28:29; Rum 11:23]

Mawazo yako ni mafumbo makubwa.

⁶Mtu mjinga hayatambui hayo,[#Zab 73:22]

Wala mpumbavu hayafahamu.

⁷Hata wasio haki wakichipuka kama majani[#Ayu 21:7; Yer 12:1; Mal 3:15]

Na wote watendao maovu wakastawi.

Mwishowe wataangamizwa milele;

⁸Bali Wewe, BWANA, U Mtukufu hata milele.

⁹Maana hao adui zako, Ee BWANA,

Hao adui zako watapotea,

Na watendao maovu watatawanyika wote pia.

¹⁰Bali pembe yangu umeiinua kama pembe ya nyati,

Nimepakwa mafuta mabichi.

¹¹Na jicho langu limeona kuanguka kwa adui zangu,

Sikio langu limesikia maangamizi ya waovu walionishambulia.

¹²Mwenye haki atastawi kama mtende,[#Zab 52:8; Wim 7:7]

Atakua kama mwerezi wa Lebanoni.

¹³Waliopandwa katika nyumba ya BWANA[#Isa 60:21; Mt 15:13; Yn 15:2,5]

Watastawi katika nyua za Mungu wetu.

¹⁴Watazaa matunda hadi wakati wa uzee,

Watajaa utomvu, watakuwa na ubichi.

¹⁵Watangaze ya kuwa BWANA ni mwenye adili,[#Kum 32:4; Rum 9:14]

Mwamba wangu, ndani yake hamna udhalimu.