Sala ya Sulemani kwa ajili ya Hekima

¹Ee Mungu wa baba zetu, BWANA, mwenye kuihifadhi rehema yako, umevifanya vitu vyote kwa neno lako;[#1 Fal 3:6-9; Hek 7:7]

²na kwa Hekima yako ukamuumba mwanadamu, ili avitawale viumbe vilivyoumbwa nawe,

³na kumiliki ulimwengu katika utakatifu na kwa haki, na kutoa hukumu kwa unyofu wa moyo.

⁴Nakusihi unipe Hekima, ambayo huketi karibu nawe katika kiti chako cha enzi, wala usinikatae mimi miongoni mwa watumishi wako;

⁵mimi niliye mtumwa wako, na mwana wa mjakazi wako, mtu dhaifu asiye wa siku nyingi, wala sina nguvu ya kufahamu hukumu na sheria.

⁶Kwa maana mtu ajapokuwa ni mkamilifu miongoni mwa wanadamu, pasipo Hekima itokayo kwako atahesabiwa kuwa si kitu.

⁷Wewe umenichagua mbele ya ndugu zangu kuwa mfalme wa watu wako na kutoa hukumu kwa wana wako.

⁸Wewe umeniamuru kujenga hekalu katika mlima wako mtakatifu, na madhabahu katika mji ukaapo, nakala ya maskani takatifu uliyoifanya tayari tangu awali.

⁹Na pamoja nawe hukaa Hekima, ijuayo matendo yako, ikiwapo hapo ulipoumba ulimwengu, ikayatambua yakupendezayo na yaliyo mema sawasawa na amri zako.

¹⁰Uipeleke kutoka mbingu takatifu, na kutoka kwenye kiti chako kitukufu; ili ikae nami na kutenda kazi pamoja nami, nijifunze yale yakupendezayo.

¹¹Kwa maana huyajua mambo yote na kuyafahamu; na katika kutenda kwangu itaniongoza kwa njia za kiasi, na kunilinda katika utukufu wake.

¹²Hivyo matendo yangu yatakubalika, nami nitawahukumu watu wako kwa haki, na kustahili kukipokea kiti cha baba yangu.

¹³Ni mtu yupi awezaye kulijua shauri la Mungu?

Au ni nani atakayeelewa na mapenzi yake?

¹⁴Kwa kuwa mawazo ya wanadamu yana woga, na makusudi yetu yanaelekea kushindwa;

¹⁵na mwili wenye uharibifu huigandamiza roho, na kiwiliwili cha kidunia huzilemea akili zilizosongwa na masumbufu.

¹⁶Kwa shida tu twayapambanua yaliyoko duniani, na yaliyo karibu nasi ni kazi kuyaona; lakini yaliyoko mbinguni ni nani aliyeyagundua?

¹⁷Naye ni yupi aliyeyavumbua mashauri yako, isipokuwa ulimpa Hekima na kumpelekea Roho yako takatifu kutoka juu?

¹⁸Ndivyo miendo yao wakaao duniani ilivyosafishwa, na wanadamu walivyofundishwa yakupendezayo; hata na kwa Hekima wao wenyewe waliponywa.