Wafumbuaji wa uwongo.

¹Lakini kulikuwako hata wafumbuaji wa uwongo kwao wa ukoo wetu; vivyo hivyo hata kwenu wafunzi wa uwongo watakuwako, wataleta mafundisho wa kuangamiza watu, wamkane naye Bwana aliyewakomboa; hivyo watajiletea wenyewe mwangamizo utakaowafikia upesi.[#Mat. 24:11; 1 Tim. 4:1.]

²Lakini wengi watayafuata mambo ya uasherati wao, ndio watakaoibezesha njia ya kweli.

³Kwa choyo chao watawachuuza nanyi na kuwaambia maneno ya udanganyi. Lakini kuhukumiwa kwao hakukawilii tangu kale, nao mwangamizo wao hausinzii.

⁴Kwani hata malaika waliokosa Mungu hakuwalimbika, ila aliwakumba kuzimuni, wakiwa wamefungwa na minyororo ya giza, akawatoa, walindwe, mpaka watakapohukumiwa.

⁵Nao ulimwengu wa kale hakuulimbika, ila alileta mafuriko ya maji, akayaeneza ulimwenguni kwao wasiomcha Mungu, akamponya Noa tu pamoja na wenzake saba, maana alikuwa mwenye kutangaza wongofu.[#2 Petr. 3:6; 1 Mose 8:18; 1 Petr. 3:20.]

⁶Nayo miji ya Sodomu na Gomora aliiteketeza kuwa majivu tu; alipoipatiliza hivyo aliiweka kuwa kielezo cha kuwatisha watakaoacha tena kumcha Mungu.[#1 Mose 19:25.]

⁷Lakini Loti aliyekuwa mwongofu alimwokoa, kwani aliumia sana kwa kuuona mwenendo wao wasioonyeka wakipenda mambo ya uasherati.

⁸Kwani huyo mwongofu alikaa katikati yao, nayo matendo mapotovu, aliyoyaona, nayo aliyoyasikia siku kwa siku, yaliuumiza moyo wake mwongofu.[#Ez. 9:4.]

⁹Bwana hujua kuwaokoa majaribuni wenye kumcha, lakini wapotovu huwaweka, wapatilizwe siku ya hukumu.[#1 Kor. 10:13; Ufu. 3:10.]

¹⁰Watakaopata makali kupita wengine ndio wale wanaofuata miili migeni kwa kuwa na tamaa chafu; nao ndio wenye kubeza ukuu pasipo kuogopa, hujivuna wenyewe tu, nako kuwatukana wenye utukufu hakuwatetemeshi.[#Yuda 8-10.]

¹¹Lakini malaika wawapitao uwezo na nguvu hawapeleki masuto ya kuwatukana mbele ya Bwana.

¹²Lakini hao hufanana na nyama wasiojua kitu; hao hivyo, walivyoumbwa, huzaliwa, wakamatwe au waoze tu. Vivyo hivyo hata wale watapata kuoza kwa uovu wao, maana huvitukana, wasivyovijua;

¹³kisha watalipizwa mapotovu yao. Hushangilia malafi na malevi ya kila siku, huwa kama madoa yachukizayo wakijiingiza kwa udanganyi wao hapo, mnapogawiana vyakula, tena napo hapo hula vibaya.

¹⁴Wana macho yajaayo matongozi, yasiyokoma kukosa; huiponza mioyo ya watu wasioshupaa; mioyo yao huijua mizungu yote ya kuonea mali; maana ni wana wa apizo.

¹⁵Walipoiacha njia iliyonyoka walijipoteza, wakaishika njia ya Bileamu, mwana wa Beori, aliyependa malipo, yangawa mapotovu.[#4 Mose 22:7; Ufu. 2:14.]

¹⁶Lakini alikemewa alipokataa kuonyeka mwenyewe: punda asiyeweza kusema alisema kwa sauti ya kimtu, akamzuia yeye aliyekuwa mfumbuaji, asifanye lisilofanywa.[#4 Mose 22:28.]

¹⁷Hawa huwa kama visima visivyo na maji, tena kama mawingu yanayokimbizwa na ukali wa upepo; fungu lao, walilowekewa, ni lile giza jingi.

¹⁸Husema maneno makuu yasiyo na maana; hivyo, walivyozifuata tamaa za miili na kupitisha kiasi, huwaponza walioanza kuwakimbia wale wanaoendelea kujipoteza.

¹⁹Huwaagia uungwana, nao wenyewe wamo katika utumwa uuao; kwani mtu akitekwa huwa mtumwa wake yeye aliyemteka.[#Yoh. 8:34,36.]

²⁰Kwani hapo walipomtambua Bwana na mwokozi Yesu Kristo waliyakimbia machafu ya ulimwengu; lakini sasa walipoingia penye matanzi tena wakatekwa, mambo yao ya mwisho yakawa mabaya kuliko ya kwanza.[#Mat. 12:45.]

²¹Kwani kama wasingaliitambua njia ya wongofu, ingaliwafalia, kuliko kuitambua, kisha kuliacha tena agizo takatifu, walilopewa.[#Luk. 12:47-48.]

²²Ilikuwa kwao, kama fumbo la kweli linavyosema:

Mbwa huyarudia matapiko yake,

naye nguruwe aliyekoga hugaagaa tena matopeni.