Yatakayowapata Wamoabu, Wayuda na Waisiraeli.

¹Hivi ndivyo, Bwana anavyosema:

Kwa ajili ya mapotovu ya Moabu matatu au manne

sitayarudisha, yasiwapate,

kwa kuwa mifupa ya mfalme wa Edomu waliichoma moto,

hata ikawa chokaa.

²Nitatupa moto kwao Moabu, uyale majumba ya Kerioti,

nao Wamoabu watakufa katika mvurugo,

makelele ya vita na milio ya mabaragumu ikisikilika.

³Naye mwamuzi nitamng'oa katikati yao,

nao wakuu wao wote nitawaua pamoja nao.

Bwana ameyasema.

⁴Hivi ndivyo, Bwana anavyosema:

Kwa ajili ya mapotovu ya Yuda matatu au manne

sitayarudisha, yasiwapate,

kwa kuwa wameyakataa Maonyo ya Bwana,

wakaacha kuyashika maongozi yake,

ikawapoteza miungu yao ya uwongo baba zao waliyoifuata.

⁵Nitatupa moto kwao Yuda, uyale majumba ya Yerusalemu.

⁶Hivi ndivyo, Bwana anavyosema:

Kwa ajili ya mapotovu ya Isiraeli matatu au manne

sitayarudisha, yasiwapate,

kwa kuwa wamewauza waongofu kwa fedha,

nao maskini kwa viatu viwili.

⁷Wanatunukia na kutwetatweta,

mavumbi ya nchi yawe vichwani juu yao wakiwa,

nazo njia za wanyonge huzipotoa.

Mtu na baba yake pamoja humwendea mwanamke mgoni,

Jina langu takatifu walipatie uchafu.

⁸Hutumia nguo, walizopewa za kuwekea wengine,

hujitandikia zizo hizo pote, wanapotambikia;

nyumbani mwa miungu yao hunywa mvinyo zao,

walizotozwa kuwa malipo ya makosa.

⁹Nami ndimi niliyewaangamiza Waamori mbele yao,

ndio waliokuwa warefu kama miangati mirefu na wanguvu

kama mivule,

nikayaangamiza mazao yao ya juu nayo mizizi yao ya chini.

¹⁰Nami ndimi niliyewatoa katika nchi ya Misri na kuwaleta

huku,

nikawaongoza miaka arobaini nyikani,

nikawapa nchi ya Waamori, iwe nchi yenu.

¹¹Namo miongoni mwa wana wenu nikainua wengine, wawe

wafumbuaji,

nao wengine nikawachagua katika vijana wenu, wajieue kuwa

wangu.

Au sivyo vilivyokuwa, ninyi wana wa Isiraeli?

ndivyo, asemavyo Bwana.

¹²Nao waliojieua mliwanywesha mvinyo,

nao wafumbuaji mkawaagiza kwamba: Msifumbue!

¹³Mtaniona, nikiwalemea, kama gari linavyolemewa likijaa

miganda.

¹⁴Ndipo, mwenye miguu izoeayo mbio atakaposhindwa na

kukimbia,

naye mwenye nguvu hataweza kutumia hizo nguvu zake kuu,

wala fundi wa vita hataiponya roho yake,

¹⁵wala mshika upindi hatasimama,

wala mwenye miguu miepesi hatapona,

wala mpanda farasi hataiponya roho yake.

¹⁶Naye aushupazaye moyo wake kwa mafundi wa vita

siku hiyo atakimbia akiwa uchi;

ndivyo, asemavyo Bwana.