Kristo ni mkuu kuliko malaika na viumbe vyote.

¹Kale Mungu alisema na baba zetu vinywani mwa wafumbuaji mara nyingi na kufuata njia.

²Siku hizi za mwisho amesema na sisi kinywani mwa Mwanawe, aliyemweka kuwa kibwana chao yaliyo yake yote. Yeye ndiye, ambaye aliumba naye hata ulimwengu wote.[#Sh. 2:8; Yoh. 1:3; Kol. 1:16.]

³Huyu hutuangazia utukufu wake, kwani kama Mungu alivyo, ndivyo, naye alivyo; tena yeye huvitunza vyote kwa Neno lake lenye nguvu. Alipokwisha kutupatia osho liyaondoalo makosa, akaketi kuumeni kwa mwenye ukuu mbinguni juu,[#Ebr. 9:14,26; Mat. 26:64; Mar. 16:19; 2 Kor. 4:4; Kol. 1:15-16.]

⁴akapata kuwa mtukufu kuliko malaika kwa hivyo, alivyorithi Jina linalolipita lao.[#Fil. 2:9.]

⁵Kwani yuko malaika, Mungu aliyemwambia siku iwayo yote:

Wewe ndiwe Mwanangu,

siku hii ya leo mimi nimekuzaa?

Na tena:

Mimi nitakuwa baba yake,

naye atakuwa mwanangu?

⁶Kwa ajili ya siku, alipotaka kumwingiza mzaliwa wake wa kwanza tena ulimwenguni, anasema:

Malaika wote wa Mungu sharti wamwangukie yeye!*

⁷Mambo ya malaika anayasema kwamba:

Huwatumia malaika zake kuwa upepo

nao watumishi wake kuwa mioto iwakayo.

⁸Lakini mambo ya mwana anayasema kwamba:

Mungu, kiti chako cha kifalme kiko kale na kale pasipo mwisho,

nayo fimbo ya ufalme wako ndiyo fimbo inyoshayo mambo ya watu.

⁹Wewe ulipenda wongofu, ukachukia upotovu.

Kwa hiyo Mungu aliye Mungu wako

alikupaka mafuta ya kufurahisha kuliko yale ya wenzio.

¹⁰Tena anasema:

Wewe Bwana, mwanzoni uliiweka misingi ya nchi,

mbingu nazo ni kazi ya mikono yako wewe.

¹¹Hizo zitaangamia, lakini wewe unafuliza kuwapo.

Kweli, zote zitachakaa kama nguo,

¹²nawe utazizinga kama nguo ya kujitandia;

zitachujuka kama nguo.

Lakini wewe ndiwe yuleyule uliyekuwa,

miaka yako haitakoma.

¹³Lakini yuko malaika, aliyemwambia po pote:

keti kuumeni kwangu,

mpaka niwaweke adui zako

chini miguuni pako?

¹⁴Hawa wote si roho tu za kutumika zitakazotumwa kuwatumikia wale watakaourithi wokovu?[#Sh. 34:8; 91:11; Dan. 7:10.]