Kuwalilia Waisiraeli.

¹Ninapotaka kumponya Isiraeli,

ndipo, panapotokea wazi manza za Efuraimu na mabaya ya Samaria,

kwani hutenda ya uwongo, nao wezi hujipenyeza nyumbani,

nako nje huenea wanyang'anyi.

²Hawasemi mioyoni mwao, ya kama nayakumbuka mabaya yao yote;

sasa matendo yao yanawazunguka, yako wazi usoni pangu.

³Kwa mabaya yao huwafurahisha wafalme wao,

nao wakuu wao kwa kuongopa kwao.

⁴Wao wote ni wazinzi,

hufanana na jiko lililowashwa moto na mchoma mikate,

naye akiisha kukanda unga, hupumzika kwa kuchochea moto,

hata unga uwe umechachuka.

⁵Wakisema: Leo ni sikukuu ya mfalme wetu,

ndipo, wakuu wanapojiwasha kwa ukali wa mvinyo;

naye mwenyewe hushikana mikono na wafyozaji.

⁶Kwa hivyo, wanavyomvizia, humkaribishia mioyo yao,

ikiwa yenye moto ulio kama wa jiko la mikate:

mchocheaji akiwa amelala usiku kucha,

asubuhi huwaka kama moto wenye miali.

⁷Hivyo wao wote hupata moto ulio kama wa jiko la mikate,

wakawala waamuzi wao, wafalme wao wote wakaangushwa nao,

lakini kwao hao hakuonekana aliyenililia mimi.

Mapatilizo yatakayokuja.

⁸Efuraimu hujichanganya na mataifa mengine,

Efuraimu huwa kama andazi lisilogeuzwa.

⁹Wageni wamezila nguvu zake, mwenyewe asipovijua;

mvi zimemtoka mojamoja, lakini mwenyewe havijui.

¹⁰Majivuno yao Waisiraeli yanawasuta machoni pao,

lakini hawarudi kwake Bwana Mungu wao,

wala hawamtafuti katika mambo hayo yote.

¹¹Efuraimu huwa kama hua pumbavu, asiye na akili:

mara anamwita Mmisri, mara anakwenda Asuri.

¹²Kila mara walipokwenda, niliwatandia wavu wangu,

niwanase kama ndege wa angani,

kisha nikawapatiliza, kama mkutano wao ulivyoambiwa.

¹³Yatawapata, kwa kuwa wamenikimbia!

Maangamizo yatawapata, kwa kuwa wamenikosea!

Nami nilipotaka kuwakomboa, wao waliniambia ya uwongo tu,

¹⁴hawakunilalamikia kwa mioyo yao, walipolia vitandani

kwao.

Ni ngano na pombe tu, wanazozikusanyikia,

lakini kwangu mimi wameondoka.

¹⁵Tena ni mimi niliyewafunza kuitumia mikono, nikaitia

nguvu,

lakini huniwazia mabaya tu.

¹⁶Wanaporudi, hawaji kwangu nilioko huku juu,

hufanana na upindi uliolegea.

Wakuu wao wataangushwa na panga kwa ajili ya ukali wa

ndimi zao;

kwa hiyo watafyozwa katika nchi ya Misri.