Anwani.

¹Mimi Yakobo niliye mtumwa wa Mungu na wa Bwana Yesu Kristo nawasalimu ninyi mlio mashina kumi na mawili yaliyotawanyika.[#1 Petr. 1:1.]

Kuomba pasipo mashaka.

²Ndugu zangu, mnapotumbukia katika majaribu yaliyo mengi na mengi yawazieni kuwa machangamko tu![#Rom. 5:3-5.]

³Yatambueni: Kumtegemea Mungu kukijulishwa hivyo kuwa kwa kweli huwaletea uvumilivu.

⁴Nao uvumilivu sharti uitimize kazi yake, ninyi mpate kutimilika, mwe Wakristo wazima wasioachwa nyuma katika jambo lo lote.

⁵Lakini kama kwenu yuko akosaye werevu wa kweli, na amwombe Mungu anayependezwa kuwapa watu wote pasipo mawazo ya kinyuma; ndipo, atakapopewa.[#Yak. 3:17; Fano. 2:3-6.]

⁶Lakini sharti aombe kwa kumtegemea, asiwe na mambo mawili moyoni! Kwani mwenye mambo mawili hufanana na wimbi la bahari linalorushwarushwa na upepo na kutupwatupwa.[#Mar. 11:24.]

⁷Mtu aliye hivyo asidhani, ya kuwa kiko, atakachokipata kwake Bwana!

⁸Mtu mwenye mioyo miwili hugeukageuka katika njia zake zote.

Mali za nchini hupotea.

⁹Lakini ndugu mnyenyekevu na ajivunie ukuu wake,[#Yak. 2:5.]

¹⁰naye mwenye mali na ajivunie unyenyekevu wake, kwani atanyauka kama maua ya majani.[#1 Petr. 1:24.]

¹¹Kwani jua likicha na kuwaka kwa ukali huyakausha majani, maua yaanguke, uzuri wao uliofurahisha macho uangamie. Vivyo hivyo naye mwenye mali hunyauka katika mienendo yake.[#Yes. 40:6-7.]

Mwanzo wa ukosaji.

¹²Mwenye shangwe ni mtu anayevumilia akijaribiwa. Kwani akiisha kushinda atapewa kilemba chenye uzima, Mungu alichowaagia wale wampendao.[#2 Tim. 4:8.]

¹³Mtu akijaribiwa asiseme: Najaribiwa na Mungu! Kwani Mungu hajaribiki nayo maovu, naye mwenyewe hajaribu mtu.

¹⁴Ila kila mtu hujaribiwa akivutwa na kuhimizwa na tamaa yake mwenyewe.[#1 Mose 3:6; Rom. 7:7-8.]

¹⁵Kisha tamaa ikijitunisha huzaa makosa, nayo makosa yakikomaa huzaa kufa.[#Rom. 7:10.]

¹⁶*Msidanganyike, ndugu zangu wapendwa![#Mat. 7:11; 1 Yoh. 1:5.]

¹⁷Kila kipaji kizuri na kila gawio timilifu hutoka juu kwa Baba alie mwenye mianga. Yeye hageuki, wala kwake hakupokeani mwanga na giza.

¹⁸Kwa hayo, ayatakayo, alituzaa sisi kwa nguvu ya Neno lililo kweli, tupate kuwa kama malimbuko ya viumbe vyake.[#Yoh. 1:13; 1 Petr. 1:23.]

Wasikiaji na wafanyaji wa Neno.

¹⁹Mwajua, ndugu zangu wapendwa: kila mtu awe mwepesi, apate kusikia, lakini awe mpole, asiseme upesi, tena mpole, asipatwe na makali upesi![#Mbiu. 7:9.]

²⁰Kwani makali ya mtu hayafanyi yaongokayo mbele ya Mungu.[#Ef. 4:26.]

²¹Kwa hiyo uvueni uchafu wote na ule uovu mwingi uliowashika! Lipokeeni kwa upole Neno lililopandwa mwenu, liwezalo kuziokoa roho zenu!*[#Kol. 3:8; 1 Petr. 2:1.]

²²*Mwe wafanyaji wa Neno, msiwe wasikiaji tu! Kwani hivyo mwajidanganya wenyewe.[#Mat. 7:26; Rom. 2:13.]

²³Kwani mtu akiwa msikiaji wa Neno, asiwe hata mfanyaji, huyo amefanana na mtu aliyetazama katika kioo, uso wake ulivyo;

²⁴akiisha kujitazama huenda zake, akasahau upesi, alivyokuwa.

²⁵Lakini achunguliaye, aone, Maonyo yalivyotimilika hapo, tulipokombolewa, akishikamana navyo, hawezi kuwa msikiaji asahauye upesi, aliyoyasikia, ila huwa mfanyaji wa kazi yake, naye atakuwa mwenye shangwe kwa kule kufanya kwake.[#Yak. 2:12; Yes. 48:18; Yoh. 13:17; Rom. 8:2.]

²⁶Mtu akijiwazia kuwa mwenye kumtumikia Mungu, lakini haushindi ulimi wake, anaudanganya moyo wake mwenyewe, kwa hiyo matumikio yake ni ya bure.[#Sh. 34:14.]

²⁷Matumikio yatakatayo yasiyo yenye doa hata machoni pa Mungu Baba ndiyo haya: kukagua watoto waliofiwa na wazazi na kukagua nao wanawake wajane katika maumivu yao na kujilinda wenyewe, tusijitie katika machafu ya ulimwwengu huu.*