Vita, Wayuda walivyovipiga.

¹Yosua alipokwisha kufa, wana wa Isiraeli wakamwuliza Bwana kwamba: Yuko nani kwetu atakayeanza kupanda kwao Wakanaani kupigana nao?[#Amu. 20:18.]

²Bwana akasema: Yuda ndiye atakayepanda, nanyi mtaona, ya kuwa nimeitia nchi hii mikononi mwake.

³Ndipo, Yuda alipomwambia ndugu yake Simeoni: Panda pamoja nami katika nchi hiyo, niliyoipata kwa kura, tupigane na Wakanaani! Kisha nami nitapanda na wewe katika nchi, uliyoipata wewe kwa kura. Kwa hiyo Simeoni akaenda naye.

⁴Yuda alipopanda, Bwana akawatia Wakanaani na Waperizi mikononi mwao, wakapiga kule Bezeki watu 10000.

⁵Walipomwona Adoni-Bezeki hapo Bezeki wakapigana naye, wakawapiga Wakanaani na Waperizi.

⁶Adoni-Bezeki alipokimbia, wakamfuata upesi, wakamkamata; ndipo, walipomkata vidole gumba vya mikono na vya miguu.

⁷Naye Adoni-Bezeki akasema: Wafalme 70 waliokatwa vidole gumba vya mikono na vya miguu walikuwa wakiokota vyakula vyao chini ya meza yangu, kama nilivyofanya, ndivyo, Mungu alivyonilipisha, kisha wakampeleka Yerusalemu, akafa huko.

⁸Kisha wana wa Yuda wakapiga vita huko Yerusalemu, wakauteka, wakawapiga wenyeji kwa ukali wa panga, nao mji wakauchoma moto.

⁹Baadaye wana wa Yuda wakashuka kupigana na Wakanaani waliokaa milimani na kusini na katika nchi ya tambarare.[#Yos. 10:40; 11:22.]

¹⁰Kisha Wayuda wakawaendea Wakanaani waliokaa Heburoni, nalo jina la Heburoni kale lilikuwa Kiriati-Arba, wakampiga Sesai na Ahimani na Talmai.

¹¹Walipotoka huko wakawaendea wenyeji wa Debiri, nalo jina la Debiri kale lilikuwa Kiriati-Seferi.

¹²Hapo Kalebu akasema: Atakayepiga Kiriati-Seferi na kuuteka nitampa mtoto wangu Akisa kuwa mkewe.

¹³Otinieli, mwana na Kenazi, mdogo wake Kalebu, alipouteka, akampa mtoto wake Akisa kuwa mkewe.

¹⁴Ikawa, huyu alipofika kwake akamhimiza mumewe kuomba shamba kwa baba yake Kalebu: basi, Akisa aliposhuka katika punda, Kalebu akamwuliza: Unataka nini?

¹⁵Naye akamwambia: Nipe tunzo la kunibariki! Kwa kuwa umenipeleka katika nchi ya kusini, nipe nazo mboji za maji! Ndipo, Kalebu alipompa zile mboji zilizokuwa upande wa juu, nazo zilizokuwa upande wa chini.

¹⁶Nao wana wa Keni, shemeji yake Mose, walikuwa wametoka kwao Mjini kwa Mitende, wapande nao wana wa Yuda kukaa katika nyika ya Yuda iliyoko kusini kuelekea Aradi; ndivyo, walivyokuja kukaa na watu wa ukoo huo.[#Amu. 4:11,17; 4 Mose 10:29; Yos. 12:14.]

¹⁷Kisha Wayuda wakaenda pamoja na ndugu zao Wasimeoni, wakawapiga Wakanaani waliokaa Sefati, wakauangamiza wote kwa kuutia mwiko wa kuwapo, kisha wakaliita jina la mji huo Horma (Mwiko).[#4 Mose 21:2.]

¹⁸Kisha Wayuda wakauteka Gaza na mitaa iliyoko mipakani kwake na Askaloni na mitaa iliyoko mipakani kwake na Ekroni na mitaa iliyoko mipakani kwake.

¹⁹Bwana akawa nao Wayuda, akawapa kuichukua milima, lakini waliokaa bondeni hawakuweza kuwafukuza, kwani walikuwa na magari ya chuma.

²⁰Kisha wakampa Kalebu mji wa Heburoni, kama Mose alivyoagiza; naye akawafukuza humo wale wana watatu wa Anaki.[#Yos. 14:6-15.]

²¹Lakini wana wa Benyamini hawakuwafukuza Wayebusi waliokaa Yerusalemu, kwa hiyo Wayebusi wakakaa Yerusalemu pamoja na wana wa Benyamini mpaka siku hii ya leo.[#Yos. 15:63; 18:28; Amu. 1:8.]

Vita vya wana wa Yosefu.

²²Wao wa mlango wa Yosefu walipopanda nao kuujia Beteli, Bwana akawa nao.

²³Wao wa mlango wa Yosefu wakaupeleleza Beteli; nao jina la mji huu kale uliitwa jina lake Luzi.[#1 Mose 28:19.]

²⁴Walinzi walipoona mtu, akitoka mjini, wakamwambia: Tuonyeshe pa kuuingilia mji huu, nasi tutakufanyizia mambo ya upole.

²⁵Alipowaonyesha pa kuuingilia mji, wakawapiga wenyeji kwa ukali wa panga, lakini yule mtu wakamwacha, ajiendee na ukoo wake wote.[#Yos. 6:25.]

²⁶Naye huyo mtu akaenda katika nchi ya Wahiti, akajenga mji, akauita jina lake Luzi, ndilo jina lake mpaka siku hii ya leo.

Milango mingine haikuwafukuza Wakanaani wote.

²⁷Wamanase hawakuwafukuza wenyeji wa Beti-Seani na wa mitaa yake, wala wa Taanaki na wa mitaa yake, wala wa Dori na wa mitaa yake, wala wenyeji wa Ibileamu na wa mitaa yake, wala wenyeji wa Megido na wa mitaa yake. Ndivyo, Wakanaani walivyopata kukaa kwanza katika nchi hii.[#Yos. 17:11-13.]

²⁸Lakini Waisiraeli walipopata nguvu, wakawashurutisha Wakanaani kuwafanyia kazi za kutumwa, lakini kufukuza hawakuwafukuza.

²⁹Nao Waefuraimu hawakuwafukuza Wakanaani waliokuwa wenyeji huko Gezeri, ila Wakanaani wakakaa katikati yao huko Gezeri.[#Yos. 16:10.]

³⁰Nao Wazebuluni hawakuwafukuza wenyeji wa Kitironi wala wenyeji wa Nahaloli; lakini wao wakawatumikia.[#Yos. 19:15.]

³¹Nao Waaseri hawakuwafukuza wenyeji wa Ako, wala wenyeji wa Sidoni, wala wa Alabu, wala wa Akizibu, wala wa Helba, wala wa Afiki, wala wa Rehobu.

³²Kwa hiyo Waaseri walikaa katikati ya Wakanaani waliokuwa wenyeji wa nchi hii, kwani hawakuwafukuza.

³³Wanafutali hawakuwafukuza wenyeji wa Beti-Semesi, wala wenyeji wa Beti-Anati, wakakaa katikati ya Wakanaani waliokuwa wenyeji wa nchi hii, lakini watu wa Beti-Semesi na wa Beti-Anati wakawatumikia.[#Yos. 19:38.]

³⁴Lakini Waamori wakawatesa wana wa Dani, waende milimani, wakawazuia, wasishuke kukaa bondeni.

³⁵Ndivyo, Waamori walivyopata kukaa kwanza mlimani kwa Heresi na Ayaloni na Salabimu; lakini mikono yao wa mlango wa Yosefu ilipowalemea, wakawatumikia.[#Yos. 19:42.]

³⁶Nayo nchi ya Waamori ilianzia hapo pa kukwelea Akarabimu, ikaendelea kutokea huko gengeni hata juu.