¹Kweli, ninyi tu ndio walio watu,

²werevu wa kweli utakufa nao, mtakapokufa ninyi.

³Mimi nami ninazo akili kama ninyi, sikupungukiwa na akili, ninyi mnishinde, yuko nani asiyeyajua mambo kama hayo?

⁴Mtu wa kuchekwa na wenziwe ni mimi, mimi niliyemwita Mungu, akaniitikia; kweli mwongofu asiyekosa kabisa ni mtu wa kuchekwa.

⁵Atesekaye hubezwa moyoni mwake naye akaaye na kutulia, yuko tayari kuwasukuma wajikwaao miguu.

⁶Mahema yao wapokonyi hutengemana, nao wamkasirishao Mungu hukaa na kutulia, ndio, Mungu anaowatia mengi mikononi mwao.

⁷Haya! Uliza nyama, wakufundishe, nao ndege wa angani, wakueleze!

⁸Au sema na nchi yenyewe, nayo itakufundisha! Hata samaki wa baharini watakusimulia mambo.

⁹Yuko nani asiyeyajua haya yote, ya kuwa mkono wa Mungu ndio ulioyatengeneza haya?

¹⁰Mkononi mwake zimo roho zao hao nyama wote, zimo nazo pumzi zao wote wenye miili ya kimtu.[#4 Mose 16:22.]

¹¹Sikio silo linaloyajaribu yanayosemwa, kama ufizi unavyovionja vyakula vyake?

¹²Werevu wa kweli uko kwao walio wazee, siku zikiwa nyingi, mtu hupata utambuzi.[#Iy. 8:8.]

¹³Werevu wa kweli na uwezo uko kwake Mungu, tena wongozi na utambuzi.

¹⁴Tazama: Akibomoa, hapajengwi tena; akimfunga mtu, hafunguliwi tena.

¹⁵Tazama: Akiyazuia maji, hukauka; tena akiyaachia huifudikiza nchi.[#1 Mose 7:19-23; 1 Fal. 17:1,7.]

¹⁶Yeye ni mwenye nguvu na uwezo wa kufanya mambo, wake yeye ni apoteaye naye apotezaye.

¹⁷Wenye kukata mashauri huwapeleka kuwa mateka, nao waamuzi huwapumbaza.

¹⁸Mafungo ya wafalme huyafungua, tena huwafunga wenyewe kwa kamba viunoni pao.

¹⁹Nao watambikaji huwapeleka kuwa mateka, nao wenye nguvu huwaangamiza.

²⁰Waliotegemewa kuwa mafundi wa kusema huwasemesha kibubu, nazo akili zao wazee huzipumbazisha.

²¹Huwamwagia mabezo walio wakuu, nao wenye nguvu huwalegeza mikanda.

²²Huvumbua yaliyofichwa ndani ya nchi na kuyatoa gizani, nacho kivuli kiuacho hukitokeza mwangani.

²³Hukweza mataifa, kisha huyaangamiza, hueneza mataifa mahali, kisha huyaacha, yatekwe.

²⁴Wakuu wa makabila ya huku nchini huwatia kichaa, kisha huwapoteza nyikani pasipo na njia,

²⁵wapapasepapase gizani pasipo na mwanga, huwaacha, wapepesuke kama mlevi.[#Iy. 5:14.]