Iyobu anaanza kusema na Mungu.

¹Tazameni! Jicho langu limeyaona hayo yote pia, sikio langu limeyasikia na kuyatambua.

²Mnayoyajua ninyi, nimeyajua ami, sikupungukiwa na akili, ninyi mnishinde.[#Iy. 12:3.]

³Kweli mimi na niseme naye Mwenyezi, napenda sana kujikania kwake Mungu.

⁴Kweli ninyi hutunga maneno yaliyo ya uwongo, nyote m waganga wasiofaa.

⁵Kama mngenyamaza kimya kabisa, mngejitokeza kuwa wenye werevu ulio wa kweli.[#Fano. 17.]

⁶Sikieni, jinsi ninavyojikania! Yategeni masikio, midomo yangu ikiyasema mashindano yangu!

⁷Je? Mtamtetea Mungu kwa kusema yaliyo mapotovu? Au mtamtetea kwa kusema yaliyo madanganyifu?

⁸Je? Mtampendelea Mungu kwa kumgombea magomvi yake?

⁹Je? Akiwachunguza ninyi, ingekuwa vema? Au mtaweza kumdanganyadanganya, kama watu wanavyodanganyana?

¹⁰Atawakemea kwa nguvu, mkipendelea watu na kufichaficha.

¹¹Je? Utukufu wake hautawatia woga? Kitisho chake nacho hakitawaangukia ninyi?

¹²Makumbusho yenu ni mafumbo ya kijivu, nazo ngome zenu ni ngome za udongo.

¹³Ninyamazieni mimi, nipate kusema nami! Yatakayonijia na yanijie!

¹⁴Ingefaaje, nikiuma nyama za mwili wangu kwa meno yangu? Au nikiiweka roho yangu mikononi mwangu?

¹⁵Mtaona, akiniua; hakuna kingine, nikingojeacho; ninataka tu kumwelezea njia zangu usoni pake.

¹⁶Hili tu litasaidia kuniokoa, kwani mwovu hatokei usoni pake.

¹⁷Lisikilizeni vema neno langu, nayo maelezo yangu na yaingie masikioni mwenu!

¹⁸Tazameni! Nimelitengeneza shauri langu, najua, ya kuwa nitajitokeza kuwa asiyekosa.

¹⁹Yuko nani atakayebishana na mimi hapa? Kama yuko, ningenyamaza tu, nipate kuzimia.

²⁰Haya mawili ninayataka, unifanyie, nisije kujificha usoni pako:

²¹uondoe mkono wako, usinilemee! Tena kizuie kitisho chako, kisinistushe![#Iy. 9:34.]

²²Kisha hapo, utakaponiita, mimi nitakuitikia! Au mimi niseme, nawe unijibu!

²³Maovu yangu na makosa yangu, niliyoyafanya, ni mangapi? Nijulishe mapotovu yangu nayo makosa yangu!

²⁴Mbona unauficha uso wako, ukaniwazia kuwa miongoni mwao wapingani wako?[#Iy. 19:11.]

²⁵Utatetemesha jani lipeperushwalo? Au utakimbiza kibua kilicho kikavu?

²⁶Kwani unaniandikia machungu kama haya, tena unanilipisha manza, nilizozikora nilipokuwa nikingali mwana.[#Sh. 25:7.]

²⁷Nayo miguu yangu unaitia mikatale, ukapaangalia pote, nipitiapo, napo, nyayo za miguu yangu zinapokanyaga, unachora alama zako.

²⁸Nami ninanyauka kama mwenye kibovu, nafanana na nguo iliyoliwa na nondo.