¹Yuko mwerevu wa kweli atakayejibu yenye ujuzi ulio kama upepo?

²Au yuko atakayelijaza tumbo lake upepo utokao maawioni kwa jua?

³Atamwonya mwenziwe kwa maneno yasiyofaa? Au atajisemea tu kwa mapuzi yasiyompatia mtu kitu?

⁴Kisha wewe unatangua kicho kiwacho chote, nayo mawazo ya kumnyenyekea Mungu unayabeua.

⁵Manza, ulizozikora, zinakifunza kinywa chako, ukachagua ulimi usemao yenye ujanja.

⁶Kinachokuumbua kuwa mwovu, si mimi, ni kinywa chako, nayo midomo yako ndiyo inayokusuta.

⁷Je? Mtu wa kwanza aliyezaliwa ni wewe? Au ulitoka tumboni mwa mama, milima ilipokuwa haijawa?

⁸Je? Ulizisikiliza njama za Mungu? Je? Ndiko, ulikouvuta werevu wa kweli, ukujie wewe?[#Iy. 11:7; Rom. 11:33.]

⁹Unajua mambo gani, tusiyoyajua nasi? Unao utambuzi gani usiopatikana kwetu?[#Iy. 13:2.]

¹⁰Wenye mvi walio wazee nako kwetu sisi wako, siku zao ni nyingi sana kuliko hizo za baba yako.

¹¹Je? Hivyo, Mungu anavyotuliza mioyo, unaviwazia kuwa vidogo? Nalo neno la upole si kitu kwako?

¹²Mbona moyo wako unakuchukua, ukupeleke penginepo? Mbona macho yako unayang'arisha hivyo?

¹³Inakuwaje, ukiigeuza roho yako, ije kumpingia Mungu, ukamtolea maneno kama hayo kinywani mwako?

¹⁴Mtu ndio nini, aweze kutakata? Aliyezaliwa na mwanamke awezaje kuongoka?[#Iy. 14:4.]

¹⁵Kumbuka hili tu: nao watakatifu wake hawezi kuwategemea, nazo mbingu hazitakati machoni pake![#Iy. 4:18-19.]

¹⁶Sembuse mtu amchukizaye kwa upotevu, yeye mtu afanyaye maovu, kama ni kunywa maji tu!

¹⁷Nitakufunza, nisikilize! Niliyoyaona, na niyasimulie.

¹⁸Werevu wa kweli wanayoyatangaza ni yayo hayo, kwani waliyoambiwa na baba zao hawakuyasahau;

¹⁹walikuwa wamepewa nchi hii wao peke yao tu, wala hakuwako mgeni aliyepita kwao.

²⁰Walisema: Asiyemcha Mungu hukaa siku zote na uchungu wake, vilevile mkorofi miaka yote, aliyowekewa na kuhesabiwa.[#1 Mose 4:14.]

²¹Sauti za mastusho huingia masikioni mwake, akikaa na kutengemana, mwangamizaji humjia.

²²Hayategemei, ya kwamba atatoka gizani, hujiwazia kuwa amechaguliwa kuuawa na upanga.

²³Hutangatanga kujipatia chakula, lakini akione wapi? Anajua, ya kuwa kando yake imekwisha kuwekwa siku ya giza.

²⁴Mateso na masongano humtia woga, nayo humshinda kwa nguvu kama za mfalme aliyejiweka tayari kupiga vita.

²⁵Kwa kuwa ameukunjua mkono wake, ampingie Mungu, akajivunia kuwa mwenye uwezo mbele yake Mwenyezi.

²⁶Akapiga mbio na kunyosha shingo, aje kumshinda, akijikingia ngao yake yenye vitovu

²⁷Akaunonesha uso wake kuwa wenye mafuta, navyo viuno vyake akavinenepesha.[#Sh. 73:7,18-20.]

²⁸Katika miji iliyotakiwa kuwa mahame ndimo, alimotua, akakaa katika nyumba, ambazo watu hawazikai, ndizo zinazongoja tu kuwa machungu ya mawe.[#Yos. 6:26.]

²⁹Kwa hiyo hatapata mali nyingi, nazo atakazozipata hazitakaa, wala mazao yake hayatafurikia katika nchi hii.

³⁰Hatapata kuondoka mle gizani, nayo machipukizi yake hukaushwa na ndimi za moto, naye atatoweshwa kwa nguvu za pumzi za kinywa chake Mungu.

³¹Asitegemee mambo yaliyo ya bure, maana atadanganyika, nayo yatakayokuwa malipo yake yatakuwa ya bure.

³²Siku yake ikiwa haijatimia bado, hayo yatatimia, shina lake halitapata kabisa, litakapochipuka tena.

³³Kama mizabibu inavyopukutisha mapooza yao, au kama michekele inavyopakatisha maua yao,

³⁴hivyo utakuwa mlango wake ambezaye Mungu, utakosa wazao wo wote, nao moto utayala mahema yao waliowapenyezea watu.

³⁵Mateso ndio mimba zao, kwa hiyo huzaa maovu, hivyo matumbo yao hutoa udanganyifu.[#Sh. 7:15; Yes. 59:4.]

Jibu la nne la Iyobu: Anamtolea Mungu ukiwa wake.

Iyobu akajibu akisema: