¹Hata lini mtatanda matanzi, yanase maneno?

²Itambueni maana, kisha tusemeane!

³Tukiwaziwa kuwa kama nyama, ni kwa sababu gani? Mbona tunawaziwa kuwa wenye uchafu machoni penu?[#Iy. 17:4,10.]

⁴Wewe unajirarua mwenyewe kwa ukali wako? Je? Kwa ajili yako wewe nchi itaachwa, isikae mtu? Au mwamba utaondoka mahali, ulipokuwa?

⁵Kweli mwanga wake asiyemcha Mungu utazima, nazo cheche za moto wake hazitaangaza.[#Iy. 18:18; 21:17; Sh. 73:18-20; Fano. 13:9; 24:20.]

⁶Mwanga utakuwa giza hemani mwake, nacho kinara chake kilichomo kitazima.

⁷Miguu yake iliyokwenda kwa nguvu itasongeka, mashauri yake, aliyowapa wengine, yatambwaga chini.

⁸Kwani atanaswa miguu yake kwa wavu akitembea penye matanzi yaliyofichwa.

⁹Itakayokikamata kisigino chake ni kamba, itamshika kwa nguvu, mtambo ukifyatuka.

¹⁰Kitanzi cha kumnasia kimefichwa mchangani, hata njiani amewekewa mtego wa kumkamatia.

¹¹Vitisho humstusha po pote na kuitia miguu yake woga, ikimbie sana.[#3 Mose 26:36.]

¹²Mabaya yanayomtaka ni yenye njaa ya kumla, mwangamizo uko tayari, upate kumwangusha,

¹³utavila viungo vya kuungia mwili ngozini mwake; mwana wa kwanza wa kifo atavila kweli hivyo viungo vyake.

¹⁴Atatolewa kwa nguvu hemani mwake, alimokimbilia, aendeshwe kufika kwake mfalme aliye mwenye mastusho.

¹⁵Hemani mwake watakaa wasio wa ukoo wake, nayo mawe ya kiberiti yatamwagwa juu ya kao lake.

¹⁶Chini mizizi yake itakauka, hata juu matawi yake yatanyauka.

¹⁷Ukumbuko wake utapotea, utoweke huku nchini, hatakuwa kabisa na sifa yo yote kwao walioko nje.[#Fano. 10:7.]

¹⁸Watamkumba, atoke mwangani, aje gizani, watamfukuza, atoke kabisa humu ulimwenguni.

¹⁹Hatakuwa na mwana wala mjukuu katika ukoo wake, wala hatakuwako atakayesalia katika makao yake.

²⁰Siku yake wataistukia sana watakaotokea nyuma, kama wao waliokuwa mbele walivyokufa ganzi.[#Sh. 37:13.]

²¹Hayo ndiyo yatakayoyapata makao ya mpotovu napo mahali pake yeye asiyemjua Mungu.

Jibu la tano la Iyobu: Katika mateso yake anamkumbuka mwokozi wake.

Iyobu akajibu akisema: