¹Kwa sababu hii mawazo yangu yananishurutisha, nikujibu,

²maana ninachafuka sana moyoni mwangu.

³Ninasikia maneno ya kunikanya, nayo ya kunitukana, lakini kwa utambuzi wangu ninajibiwa mengine rohoni mwangu.

⁴Je? Hayo huyajui tangu kale, tangu hapo, watu walipokaa katika nchi?

⁵Ya kuwa shangwe zao wasiomcha Mungu hukoma upesi? Ya kuwa furaha ya mwovu hukaa kitambo kidogo tu?

⁶Ijapo ayakuze majivuno yake, yafike mbinguni, kichwa chake kiyaguse nayo mawingu,[#Sh. 37:35.]

⁷hupotelea kale na kale kama mavi yake, waliomwona waulize: yuko wapi?[#1 Fal. 14:10.]

⁸Hupita kwa kuruka kama ndoto, watu wasimwone tena, hufukuzwa kama ono baya la usiku.[#Sh. 73:20.]

⁹Jicho lililomchungulia halitomwona tena, wala mahali pake, alipokuwa, hapatamtazama tena.[#Sh. 37:10.]

¹⁰Wanawe watabembeleza walio wanyonge, mikono yao itazirudisha mali, alizozinyang'anya.[#Iy. 27:14.]

¹¹Ijapo, mifupa yake izidi kuwa nazo nguvu za ujana, lakini haina budi kulala pamoja naye uvumbini.

¹²Kama anauona ubaya kuwa mtamu kinywani mwake, aufiche, upate kukaa chini ya ulimi wake,

¹³autunze vizuri, asitake kuuachilia, ujiendee, ila auzuie, usiondoke penye ufizi wake:

¹⁴kisha hicho chakula chake kitageuzwa tumboni mwake kuwa uchungu wa pili mle ndani yake;

¹⁵hizo mali nyingi, alizozimeza, hana budi kuzitapika, Mungu akizitoa kwa nguvu tumboni mwake.

¹⁶Kwa hivyo, alivyonyonya sumu iliyo ya pili, mwisho ulimi wa moma utamwua,

¹⁷asijifurahishe tena kwa kuvitazama vile vijito wala ile mito inayokwenda na kujaa asali na mafuta.

¹⁸Aliyoyasumbukia hana budi kuyarudisha, hawezi kuyameza, ijapo mapato yake yawe mengi mno, hayafurahii.[#5 Mose 28:30-33.]

¹⁹Kwani alipokwisha kuwaponda wanyonge, aliwaacha papo hapo, akanyang'anya nyumba, asizozijenga.

²⁰Lakini hakujua kutulia ndani yake yeye; kwa hiyo hatapona pamoja nayo, aliyoyatunukia.

²¹Kwa ulafi wake hakikuwako kitu, asichokichukua; kwa sababu hii hivyo vyema vyake havikai kabisa.

²²Hapo atakapofurikiwa, ndipo, atakaposongeka, mikono yao walioteswa naye ikimjia yote.

²³Ndipo, Mungu atakapolijaza tumbo lake akituma kwake makali yake yawakayo moto, ayanyeshe juu yake yampatie chakula cha kushiba.

²⁴Itakapokuwa, ayakimbie mata ya chuma, uta wa shaba utampiga, achomwe;

²⁵akitaka kuutoa mshale, utakuwa umetokea mgongoni pake, chembe yake imetukayo itakuwa imeichoma nayo nyongo; basi, mastusho yatamjia vivyo hivyo.[#5 Mose 32:41; Sh. 7:13.]

²⁶Mambo yote ya giza yako tayari kwake kuviangamiza vilimbiko, nao moto uwakao pasipo kupulizwa utamla mwenyewe, nayo yaliyosalia hemani mwake utayamaliza.[#5 Mose 32:22.]

²⁷Mbingu zitazifunua manza, alizozikora, nayo nchi itainuka kumshinda shaurini.

²⁸Nyumba yake iliyompatia yatatekwa, yatakuwa kama maji yakaukayo, siku ya ukali wake Mungu itakapotimia.

²⁹Hilo ndilo fungu, mtu asiyemcha Mungu atakalolipata kwake Mungu, ndio urithi, atakaogawiwa naye Mungu.

Jibu la sita la Iyobu: waovu hutulia, mpaka watakapopatilizwa.

Iyobu akajibu akisema: