Iyobu anamaliza kusema na kuonyesha, ya kuwa hakumkosea mtu wala Mungu.

¹Nilifanya agano na macho yangu, kisha ningewezaje kumtazama mwanamwali kwa kumtamani?[#Mat. 5:28-29.]

²Kwani Mungu huko juu angalinipatia nini? Yeye Mwenyezi angalitoa fungu gani mbinguni, liwe langu?

³Je? Wapotovu fungu lao sio mwangamizo? Nao wafanyao maovu fungu lao sio machukivu?

⁴Yeye hazioni hizo njia zangu? Wala hazihesabu nyayo zangu?[#Iy. 23:10.]

⁵Kama nilifanya mwenendo ulio wa uwongo, miguu yangu ikakimbilia yaliyo madanganyifu,

⁶Mungu na anipime kwa mizani iliyo sawa; ndipo, atakapojua, ya kuwa sikukosa.

⁷Kama nyayo zangu ziliiacha njia yake, kama moyo wangu ulizifuata tamaa za macho yangu, kama uchafu wo wote uligandamana na mikono yangu:[#Sh. 7:4-6.]

⁸basi, mimi nitakayoyapanda, mwingine na ayale, nayo mazao yangu na yang'olewe pamoja na mizizi yao!

⁹Kama moyo wangu uliingiwa na tamaa ya mke wa mwingine, mpaka nikaja kumwotea mlangoni pake mwenzangu,

¹⁰mke wangu na amsagie mwingine unga wake, hata wengine na waje kulala naye.[#5 Mose 28:30; 2 Sam. 12:11.]

¹¹Kwani hili lingekuwa kosa lililo baya zaidi, ni kukora manza zipasazo kuhukumiwa na waamuzi wakuu.

¹²Hivyo ningalijipatia moto wa kunila hata kuzimuni, nao ungaliyaangamiza yote pia, niliyoyapata.

¹³Kama nilikataa shauri la mtumishi wangu wa kiume au wa kike, walipotaka kushindana na mimi mwenyewe,

¹⁴ningefanya nini, Mungu akininukia? au ningemjibu nini, akiyakagua?

¹⁵Je? Aliyenitengeneza tumboni mwa mama hakumtengeneza naye? Siye yeye mmoja aliyetuumba kuwa mimba?[#Ef. 6:9.]

¹⁶Wanyonge niliwanyima walichokitaka kwangu? Au nilizimisha macho yaliyokuwa ya mjane?[#Iy. 29:12.]

¹⁷Au nililila tonge langu peke yangu, afiwaye na wazazi asile naye?

¹⁸Sivyo, ila tangu ujana wangu alikulia kwangu kama kwa baba yake, toka hapo nilipotoka tumboni mwa mama yangu niliwaongoza wajane.

¹⁹Hapo nilipoona mtu, akifa kwa kukosa nguo, au maskini akikosa lo lote la kujifunika,[#Yes. 58:7.]

²⁰basi, viuno vyake havikunibariki, alipojipatia kijoto kwa nguo za nywele za kondoo wangu?

²¹Kama nilikemea mwana aliyefiwa na wazazi nikimkunjulia mkono kwa kuona wanaonisaidia langoni penye mashauri,[#Iy. 29:7.]

²²bega langu na lianguke kwa kuteuka mahali pake, nalo fupa la mkono wangu na livunjike kiungoni mwake!

²³Kwani mwangamizo wa Mungu ungalinistusha, nisiweze kusema neno kwa hivyo, anavyotukuka.[#Iy. 32:22.]

²⁴Kama nilitumia dhahabu kuwa egemeo langu, na kuziwazia zile dhahabu safi kuwa kimbilio langu,[#Sh. 52:9.]

²⁵kama niliufurahia wingi wa mali zangu, kwa kuwa mkono wangu ulipata vingi vya kuvilimbika,

²⁶kama hapo, nilipolitazama jua, jinsi linavyoangaza, au mwezi, jinsi unavyoendelea ukiwa na utukufu wake,[#5 Mose 4:19.]

²⁷kama hapo moyo wangu huko ndani ulitamani kutambika, mpaka kinywa changu kikakinonea kiganja changu:[#1 Fal. 19:18.]

²⁸huko ningekora manza zipasazo kuhukumiwa na waamuzi wakuu, kwani huko ningemkana Mungu wa huko juu kuwa Mungu wangu.

²⁹Je? Nilimfurahia mchukivu wangu, alipoteswa? Au nilishangilia, mabaya yalipompata?[#Sh. 35:12; Fano. 24:17.]

³⁰Sikukipa kinywa changu ruhusa kukosa hivyo, kije kuiapiza roho yake, ishuke kuzimuni.[#1 Petr. 3:9.]

³¹Walioingia hemani mwangu hawasemi: Yuko mtu asiyeshibishwa na nyama, alizompa?

³²Kweli kwangu hakuwako mgeni aliyelala nje, mimi humfungulia mpitaji milango yangu.[#1 Mose 19:2; Ebr. 13:2.]

³³Je? Niliyafunika mapotovu yangu kama watu wengine? Au nilizificha manza, nilizozikora, kifuani pangu?

³⁴Je? Pako, nilipoogopa wingi wa watu? Au yalinistusha mazomeo ya milango yao, hata nikanyamaza, nisitoke nyumbani?

³⁵Kama ningepata mtu atakayenisikiliza, ningemwonyesha maandiko yangu, Mwenyezi anijibu. Kiko nacho kitabu, alichokiandika mwenye kunigombeza;[#Iy. 23:3-7.]

³⁶kweli hicho ningekichukua begani pangu, au ningekifunga kichwani pangu kuwa kilemba changu.

³⁷Ningemsimulia hesabu ya nyayo zangu, tena ningekuwa kama mkuu wa watu, nimkaribie.

³⁸Kama shamba langu linanisuta na kupiga kelele, kama matuta yake yanaitikia na kulia,

³⁹kama niliyala mazao yake pasipo kulipa na kuizimisha roho yake mwenye shamba,[#Iy. 24:11.]

⁴⁰basi, penye ngano na patokee mangugi matupu, napo penye mawele ndago tu! Maneno, Iyobu aliyoyasema, yamekwisha.