¹Kama yangepimwa machafuko yangu,

²wakiyatia nayo mateso yangu katika mizani,

³haya yangetokea kuwa mazito zaidi kuliko mchanga wa baharini; kwa hiyo maneno yangu ni ya kupotelewa tu.

⁴Kwani mishale ya Mwenyezi imenipiga, nayo sumu yao yenye moto roho yangu ikainywa, vitisho vya Mungu vikajipanga kuninasa mimi.[#Sh. 38:3.]

⁵Je? Punda wa porini hulia mbugani penye majani? Au yuko ng'ombe apigaye kelele penye chakula chake?

⁶Au visivyoungwa huliwa pasipo chumvi? Au yako yapendezayo, ukila ute wa yai?

⁷Roho yangu inakataa kuvigusa tu, kwani hufanana na vyakula vyangu vichukizavyo.

⁸Laiti yangetimia niyatakayo, Mungu akinipa niyangojeayo!

⁹Kama Mungu yangempendeza, na aniponde, na aukunjue mkono wake kuikata roho yangu!

¹⁰Litakalonituliza moyo litakuwako nayo siku hiyo, ijapo niumizwe pasipo kuhurumiwa, lilo hilo litanichezesha, ndio hilo la kwamba: Sikuyakana maneno yake Mtakatifu!

¹¹Nguvu zangu ni za nini, nitulie na kungoja? Mwisho wangu utakuwaje, nipate kuvumilia?

¹²Je? Kama nguvu za mawe zilivyo, ndivyo, nguvu zangu zilivyo nazo? Au mwili wangu, nilio nao, ni wa shaba?

¹³Je? Haya hayakunipata kwa kukosa msaada wo wote? Je? Uponya haukutoweshwa huku, niliko?

¹⁴Mwenye kuzimia hupaswa na rafiki wamwendeao kwa upole, ijapo amekwisha kuacha kumcha Mwenyezi.

¹⁵Ndugu zangu wameniacha na kudanganya kama kijito, kama mikondo ya vijito vikaukavyo upesi;[#Sh. 38:12.]

¹⁶maana hivi huwa vyeusi kwa maji ya barafu, theluji ziyeyukazo zilimoingia kujifichia humo.

¹⁷Lakini siku, vinapowakiwa na jua, hupwa, hutoweka mahali pao, kiangazi kikitimia.

¹⁸Misafara huziacha njia zao kuvipandia jangwani, lakini wasipokuta kijito chenye maji, huangamia.

¹⁹Misafara ile ya Tema huvitazamia, vikosi vya Saba huvingojea katika safari zao.[#1 Mose 25:15; Iy. 1:15.]

²⁰Lakini huona kuwa bure kuvikimbilia, kwani wanapofika mahali pao wamedanganyika.

²¹Nanyi sasa mmeniwia vivyo hivyo: mlipoyaona haya mastusho mkashikwa na woga.

²²Je? Nimewaambia: Nipeni? Kwa mali zenu ninyi nikomboeni?

²³Au: Niponyeni mkononi mwake anisongaye, namo mikononi mwao wakorofi nikomboeni?

²⁴Nifunzeni, nipate kunyamaza! Nitambulisheni, nilipopotea!

²⁵Maneno yanyokayo hushinda kweli, lakini maneno yenu ya kunisuta yana maana gani?

²⁶Je? Mwawaza mioyoni mwenu kuonya maneno tu? Maneno ya mtu azimiaye ni ya upepo tu.

²⁷Hata mwana aliyefiwa na wazazi mwaweza kumpigia kura, mkamwuza naye aliye mwenzenu.

²⁸Lakini sasa ninawaomba, mnielekee mimi; sitaweza kuwaongopea usoni penu.

²⁹Rudini, msifanye upotovu! Rudini, mwone, wongofu wangu ungaliko.

³⁰Je? Ulimi wangu umesema yaliyo mapotovu? Au kinywa changu hakiyatambui yaponzayo?