Iyobu anamwomba Mungu, amwue, ayakomeshe mateso yake.

¹Je? Mtu hashurutishwi kufanya kazi ya vita huku nchini? Siku zake si sawa kama siku zake mkibarua?[#Iy. 14:6.]

²Huwa kama mtumwa atweteaye kivuli, au kama mkibarua aungojeaye mshahara wake.

³Vivyo hivyo nami nimepewa miezi ya kuteseka, iwe fungu langu, nikagawiwa masumbuko usiku kwa usiku.

⁴Ninapolala nasema: Nitainuka lini? kwani saa za usiku huwa ndefu sana, nikazidi kujigeuzageuza kitandani, mpaka kuche.

⁵Nyama za mwili wangu zimevikwa funyo na maganda yenye vumbi, ngozi yangu inapopona kidonda, papo hapo hutumbuka jipu tena.

⁶Siku zangu hupita upesi sana kuliko chombo cha kufumia, sinacho kingojeo cho chote, ila zimalizike tu.[#Yes. 38:12.]

⁷Kumbuka, ya kuwa siku zangu za kuwapo ni pumzi tu, jicho langu halitarudi huku, lipate kuona mema.

⁸Jicho lake anionaye sasa halitanitazama tena, macho yako yatakaponielekea, nitakuwa sipo.

⁹Kama wingu linavyopoteleapotelea, mpaka litoweke, vivyo hivyo naye ashukaye kuzimuni hatokei tena;

¹⁰hawezi kurudi tena, aingie nyumbani mwake, wala mahali pake, alipokuwa, hapamtambui tena.[#Iy. 10:21; 14:10-12; 16:22; Sh. 103:16.]

¹¹Kwa hiyo mimi sitakizuia kinywa changu, niseme kwa kusongeka rohoni mwangu, nilie kwa uchungu wa moyo wangu.

¹²Je? Mimi ni kama bahari au kama nyangumi, ukiniwekea watu wa kuniangalia?

¹³Nikisema: Kilalo changu ndicho kitakachonituliza moyo, kitanda changu kitanipunguzia vilio vyangu,

¹⁴ndipo, unaponitisha kwa kuniotesha ndoto, kwa kunionyesha maono unanistusha.

¹⁵Kwa hiyo roho yangu inapenda kunyongwa tu, kuliko kuwa gofu la mtu, kama nilivyo, inapenda kufa kweli.

¹⁶Nimekata tamaa kwa kukataa kuwapo kale na kale; kwa sababu siku zangu ni za bure, uniache tu![#1 Fal. 19:4.]

¹⁷Mtu ndio nini, ukimkuza, ukimwelekezea moyo wako, umwangalie?[#Iy. 14:1-5; Sh. 8:5.]

¹⁸Ukimkagua kila kunapokucha? Ukimjaribu punde kwa punde?

¹⁹Mbona hutakoma kunitazama? Hutaniacha peke yangu, niyameze mate yangu?

²⁰Kama nimekosa, nimekufanyia nini, wewe mlinda watu? Mbona umeniweka kuwa shabaha yako ya kuipiga, mpaka nikijiona mwenyewe kuwa mzigo?

²¹Mbona huniondolei maovu yangu, ukazitowesha nazo manza, nilizozikora? Kwani sasa ninakwenda zangu kulala uvumbini; utakaponitafuta mapema utaniona, sipo.