Wagibeoni wanajipatia kwa ujanja urafiki wa Waisiraeli.

¹Walipoyasikia hayo wafalme wote waliokaa ng'ambo ya huku ya Yordani milimani na katika nchi ya tambarare na huko pwani po pote penye Bahari Kubwa panapoelekea Libanoni. Wahiti na Waamori na Wakanaani na Waperizi na Wahiwi na Wayebusi,

²wakakusanyika pamoja kwenda kupigana na Yosua nao Waisiraeli, mioyo yao ikawa kama mmoja.

³Wenyeji wa Gibeoni walipoyasikia, Yosua aliyoutendea Yeriko na Ai,[#Yos. 6:20-21; 8:26,28.]

⁴wao wakatumia ujanja, wakajifanya kuwa wajumbe, wakawatandika punda wao magunia machakavu, wakachukua viriba vichakavu vya mvinyo vilivyotiwa viraka kwa kupasukapasuka.

⁵Miguuni wakavaa viatu vichakavu vilivyoshonwashonwa, miilini wakavaa nguo chakavu, nayo mikate yote ya pamba zao za njiani ilikuwa mikavu yenye ukungu.

⁶Kisha wakaenda Gilgali makambini kwake Yosua, wakamwambia yeye, nao Waisiraeli: Tumetoka nchi ya mbali, sasa fanyeni maagano nasi!

⁷Waisiraeli walipowaambia hao Wahiwi: Labda ninyi mnakaa katikati yetu, kwa hiyo tutawezaje kufanya maagano nanyi?[#2 Mose 23:32; Yos. 11:19.]

⁸wao wakamwambia Yosua: Sisi tu watumwa wako, naye Yosua akawauliza: Ninyi m wa nani? Tena mmetoka wapi?

⁹Wakamwambia: Watumwa wako wametoka nchi iliyo mbali sana kwa ajili ya Jina la Bwana Mungu wako, kwani tumeusikia uvumi wake nayo yote, aliyoyafanya huko Misri,

¹⁰nayo yote, aliyowafanyia wale wafalme wawili wa Waamori waliokuwako ng'ambo ya huko ya Yordani, yule Sihoni, mfalme wa Hesiboni, na Ogi, mfalme wa Basani, aliyekaa Astaroti.[#4 Mose 21:21-35.]

¹¹Kwa hiyo wazee wetu na wenyeji wote wa nchi yetu wakatuambia kwamba: Chukueni mikononi mwenu pamba za njiani, mwende kukutana nao, mwaambie: Sisi tu watumwa wenu, sasa fanyeni maagano nasi!

¹²Hii mikate yetu ilikuwa yenye moto, tulipoichukua nyumbani mwetu kuwa pamba zetu siku hiyo, tulipotoka kwetu kwenda kwenu; sasa itazame, ni mikavu yenye ukungu!

¹³Hivi viriba vya mvinyo navyo vilikuwa vipya, tulipovijaza, sasa vitazame, vimepasukapasuka. Hizi nguo zetu nazo zimechakaa pamoja na viatu, kwa kuwa njia ni ya mbali sana.

¹⁴Ndipo, wale watu wa Kiisiraeli walipoonja pamba zao, lakini kinywa cha Bwana hawakukiuliza.[#4 Mose 27:21.]

¹⁵Kisha Yosua akapatana nao kufanya maagano, asiwaue, nao wakuu wa mkutano wakawaapia hivyo.[#Yos. 9:7.]

¹⁶Siku tatu zilipopita walipokwisha kufanya hayo maagano nao, wakasikia, ya kuwa wale wanakaa karibu katika nchi iyo hiyo, waliyoikaa wenyewe.

¹⁷Ndipo, wana wa Isiraeli walipoondoka, wakaingia siku ya tatu mjini kwao, nayo miji yao ilikuwa Gibeoni na Kefira na Beroti na Kiriati-Yearimu.

¹⁸Lakini wana wa Isiraeli hawakuwaua, kwa kuwa wakuu wa mkutano waliwaapia na kumtaja Bwana Mungu wa Isiraeli. Wao wa mkutano wote walipowanung'unikia wakuu,

¹⁹wakuu wote wakauambia mkutano wote: Sisi tumewaapia na kumtaja Bwana Mungu wa Isiraeli, kwa hiyo sasa hatuwezi kuwagusa.

²⁰Lakini nao tuwafanyie hivyo: tuache kuwaua, makali yasitujie kwa ajili ya hicho kiapo, tulichowaapia.[#2 Sam. 21:1-2.]

²¹Kwa hiyo wakuu wakawaambia: Na wakae uzimani! Lakini watakuwa wachanja kuni na wachota maji yao wote wa mkutano huu, kama wakuu walivyowaambia.

²²Kisha Yosua akawaita, akawaambia kwamba: Mbona mmetudanganya na kutuambia: Sisi tunawakalia mbali sana? Nanyi mnakaa huku kwetu katikati!

²³Sasa mtakuwa mmeapizwa, kwenu wasikoseke watumwa wa kuchanja kuni na wa kuchota maji yao walio mlango wa Mungu wangu!

²⁴Nao wakamjibu Yosua wakisema: Watumwa wako walipashwa habari za kwamba: Bwana Mungu wako alimwagiza mtumishi wake Mose kuwapa ninyi nchi hii yote nzima, mwangamize wenyeji wote wa nchi hii, watoweke mbele yenu. Kwa hiyo tukaingiwa na oga mwingi rohoni mwetu wa kuwaogopa ninyi, kwa hiyo tukalifanya jambo lile.

²⁵Sasa tazama, tumo mkononi mwako! Utakapoyaona kuwa mema yanyokayo, basi, tufanyizie kabisa!

²⁶Kisha akawafanyizia hayo, akawaponya mikononi mwao wana wa Isiraeli, wasiwaue.

²⁷Ndivyo, Yosua alivyowaweka siku hiyo kuwa wachanja kuni na wachota maji wa mkutano na wa mahali hapo pa kutambikia, Bwana atakapopachagua; vikawa hivyo mpaka siku hii ya leo.[#5 Mose 29:11.]