Mateso na matulizo ya mioyo yao Waisiraeli.

¹Mimi ni mtu wa kiume, lakini niliteseka

nilipopigwa fimbo yenye machafuko yake.

²Akaniongoza na kuniendesha,

nije gizani, nisije mwangani.

³Ananirudia mimi peke yangu,

mkono wake ukinigeukia mchana kutwa.

⁴Akazinyausha nyama na ngozi za mwili wangu mimi,

mifupa yangu yote akaivunja nayo.

⁵Akanizibia njia

akanizungushia mambo yenye sumu na usumbufu.

⁶Akanikalisha penye giza kuu

kama waliokufa kale.

⁷Ukuta unanizunguka, nisitoke,

akanifunga minyororo mizito.

⁸Ijapo nilie na kupiga yowe,

maombo yangu huyazibia masikio.

⁹Akazifunga njia zangu kwa mawe yaliyochongwa,

napo pengine, nilipopita, akapafanya, pasipitike tena.

¹⁰Yeye akaniwia kama nyegere aoteaye

au kama simba aliomo mafichoni.

¹¹Njia zangu akazipoteza, akaninyafua,

akaniweka mahali palipo peke yake.

¹²Akaupinda upindi wake, akanitumia

kuwa shabaha ya kuipiga mishale.

¹³Iliyokuwa podoni mwake

akaipiga, inichome mafigo

¹⁴Nikawa kicheko kwao wote walio ukoo wangu,

wakanizomea mchana kutwa.

¹⁵Akanishibisha kwa kunilisha yaumizayo matumbo,

akaninywesha maji machungu.

¹⁶Akayakerezesha meno yangu na kuyaumisha vijiwe,

akanigaagaza majivuni.

¹⁷Ukaifukuza roho yangu, isipate kutulia,

nikasahau kulivyo, mtu akikaa vema.

¹⁸Nikasema: Nguvu zangu zimepotea

pamoja na kingojeo changu cha kumngojea Bwana.

¹⁹Ukumbuke ukiwa wangu na wasiwasi wangu,

nikilishwa machungu, nikinyweshwa yenye sumu!

²⁰Roho yangu haiachi kuyakumbuka,

kwa kuwa imeinamishwa humu ndani yangu.

²¹Haya na niyaweke moyoni tena,

ndivyo, nitakavyopata kumngojea:

²²*Ni upole wake Bwana, tusipomalizika,

kwani huruma zake hazikuisha,

²³kila kunapokucha ni mpaya,

nao walekevu wake ni mwingi.

²⁴Fungu langu ni Bwana! ndivyo, roho yangu isemavyo:

kwa hiyo nitamngojea.

²⁵Bwana huwawia mwema wamngojeao

nao wamtafutao kwa roho.

²⁶Inafaa kuvumilia

na kuungojea wokovu wa Bwana.

²⁷inamfalia mtu wa kiume,

akitwikwa mizigo akingali kijana bado.

²⁸Na akae peke yake na kunyamaza kimya,

kwani Bwana ndiye aliyemtwika.

²⁹kinywa chake akiweke uvumbini,

kwani labda liko la kulingojea.

³⁰Ampigaye na amgeuzie shavu,

na ashibe matusi.

³¹Bwana hamtupi mtu

kale na kale.

³²Bwana akimtia mtu majonzi atamhurumia tena,

kwani upole wake ni mwingi.*

³³Kwani siko kupenda kwa moyo wake,

akiwaumiza wana wa watu na kuwapiga.

³⁴Mtu akiwaponda na kuwapiga mateke kwa miguu

wote waliofungwa huku nchini,

³⁵au mtu akimpotoa mwenziwe na kumnyima yampasayo

usoni pake Alioko huko juu,

³⁶au mtu akimgeuza mwenziwe mkweli shaurini kuwa mwongo,

Bwana asiyatazame?

³⁷Yuko nani awezaye kusema neno, likawapo,

Bwana asipoliagiza?

³⁸Je? Yeye Alioko huko juu aliyoyasema,

hayatokei yakiwa mabaya au yakiwa mema?

³⁹Mtu hununia nini siku zote za kuwapo?

Kila mtu na ayanunie makosa yake!

⁴⁰Na tuzijaribu njia zetu na kuzichunguza,

tupate kurudi upande wake Bwana!

⁴¹Na tumwinulie Mungu mbinguni

mioyo yetu pamoja na mikono yetu!

⁴²Sisi ndio tuliokosa tusipokutii,

nawe hukutuondolea.

⁴³Ulipojivika makali ulitukimbiza,

ukaua pasipo huruma.

⁴⁴Ukajivika wingu, likufunike,

malalamiko yasikufikie.

⁴⁵Ukatufanya kuwa takataka za kutupwa tu

katikati ya makabila ya watu.

⁴⁶Wakatuasamia vinywa vyao

wote waliokuwa adui zetu.

⁴⁷Yaliyotupata yalikuwa mastuko na mashimo

na maangamizo na mavunjiko.

⁴⁸Macho yangu huchuruzika vijito vya maji

kwa ajili ya mavunjiko yao walio wazaliwa wa ukoo wangu.

⁴⁹Macho yangu hulia machozi

pasipo kupumzika, hayakomeki,

⁵⁰mpaka Bwana achungulie toka mbinguni,

ayaone.

⁵¹Macho yangu huniumiza roho kwa kuona,

wanawake wote wa mji wangu walivyo.

⁵²Kweli wameniwinda kama ndege

wale wanichukiao bure tu;

⁵³wakanitupa shimoni, wanizimishe roho,

wakanitupia mawe.

⁵⁴Maji yenye nguvu yakakididimiza kichwa changu,

nikasema: Basi, nimekatwa roho.

⁵⁵nikalililia Jina lako, Bwana,

nilipokuwa shimoni kuzimuni.

⁵⁶Ukaisikia sauti yangu nilipokuomba: Usiyazibe masikio yako,

nikikupigia kite na kukuomba wokovu.

⁵⁷Ukanijia karibu siku ile, nilipokulilia,

ukaniambia: Usiogope!

⁵⁸Ukanigombea magomvi ya roho yangu

ukanikomboa na kunirudisha uzimani.

⁵⁹Ukaona, Bwana, jinsi nilivyopotolewa,

ukayakata mashauri yangu.

⁶⁰Ukayaona yote, waliyoyataka kunilipizia,

nayo yote, waliyoyawaza ya kunifanyizia.

⁶¹Ukayasikia, Bwana, matusi yao

nayo yote, waliyoniwazia.

⁶²Ukayasikia, waniinukiao waliyoyasema

wakinipigia mashauri mchana kutwa.

⁶³Tazama, uone! Ikiwa wanakaa, au ikiwa wanasimama:

mimi ndiye, wanayemzomea.

⁶⁴Uwalipishe, Bwana, matendo yao

ukiwafanyizia, kama mikono yao ilivyofanya!

⁶⁵Uwashupaze mioyo yao,

apizo lako likiwajia!

⁶⁶Uwakimbize kwa makali yako na kuwaangamiza,

watoweke chini ya mbingu za Bwana!