Kuingia Yerusalemu.

¹Hapo, walipoukaribia Yerusalemu na kufika Beti-Fage mlimani pa michekele, ndipo, Yesu alipotuma wanafunzi wawili,

²akawaambia: Nendeni katika kijiji kinachowaelekea! Mara mtaona punda, amefungwa, hata mtoto wake yuko pamoja naye; mfungueni, mniletee!

³Kama mtu atawaambia neno, mwambieni: Bwana wetu anamtakia kazi! mara atawapani.[#Mat. 26:18.]

⁴Haya yote yamekuwapo, lipate kutimizwa neno la mfumbuaji la kwamba:

⁵Mwambieni binti Sioni: Tazama, mfalme wako anakujia,

ni mpoke, amepanda mwana punda aliye na mama yake,

mwenye kuchukua mizigo.

⁶Wanafunzi wakaenda, wakafanya, kama Yesu alivyowaagiza.

⁷Wakamleta punda na mwanawe, wakatandika nguo juu yao, kisha wakampandisha.

⁸Nayo makundi ya watu wengi sana wakatandika nguo zao njiani, wengine wakakata matawi ya miti, wakayatandika njiani,[#2 Fal. 9:13.]

⁹nao wale watu wengi waliomtangulia, nao waliomfuata wakapaza sauti wakisema:

Hosiana, mwana wa Dawidi!

Na atukuzwe ajaye kwa Jina la Bwana!

Hosiana juu mbinguni!*

¹⁰Alipoingia Yerusalemu, mji wote ukatukutika, wakisema: Nani huyu?

¹¹Makundi ya watu wakasema: Huyu ndiye mfumbuaji Yesu wa Nasareti wa Galilea.

Kuwafukuza wachuuzi Patakatifu.

¹²Yesu akapaingia Patakatifu, akawafukuza wote wenye kuuzia na kununulia hapo Patakatifu, akaziangusha meza za wavunja fedha na viti vya wachuuzi wa njiwa,[#Yoh. 2:14-16.]

¹³akawaambia: Imeandikwa: Nyumba yangu itaitwa nyumba ya kuombea, lakini ninyi mnaigeuza kuwa pango la wanyang'anyi.[#Yes. 56:7; Yer. 7:11.]

¹⁴Kisha wakamwendea hapo Patakatifu vipofu na viwete, naye akawaponya.

¹⁵Lakini watambikaji wakuu na waandishi walipoyaona mataajabu, aliyoyafanya, tena waliposikia, watoto wakipaza sauti hapo Patakatifu na kusema: Hosiana, mwana wa Dawidi! ndipo, walipokasirika,[#Sh. 118:25.]

¹⁶wakamwambia: Unasikia, hawa wanavyosema? Yesu akawaambia: Ndio. Hamjalisoma bado neno lile la kwamba:

Vinywani mwao watoto wachanga

namo mwao wanyonyao ulitengeneza tukuzo?

¹⁷Kisha akawaacha, akatoka mjini, akaenda Betania, akalala huko.

Mkuyu unaapizwa.

¹⁸Asubuhi alipokuwa akirudi mjini akaona njaa.[#Luk. 13:6.]

¹⁹Alipoona mkuyu kando ya njia akauendea, asione kitu kwake, ila majani matupu, akauambia: Kale na kale lisipatikane tena tunda kwako! Mara mkuyu ukawa umenyauka.

²⁰Wanafunzi walipoviona wakastaajabu, wakasema: Mkuyu huu umenyaukaje mara?

²¹Yesu akajibu akiwaambia: Kweli nawaambiani: Mkimtegemea Mungu pasipo mashaka hamtafanya kama hili tu la huu mkuyu, ila hata mkiuambia mlima huu: Ondoka hapa, ulipo, ujitupe baharini! basi itatendeka.[#Mat. 17:20.]

²²Nayo yo yote, mtakayoyaomba katika maombo, mtayapata mkiwa mnamtegemea Mungu.[#Yoh. 14:13.]

Ubatizo wa Yohana.

²³Alipokwisha ingia Patakatifu, akiwa akifundisha, wakamjia watambikaji wakuu na wazee wa huku kwao, wakamwuliza: Hayo unayafanya kwa nguvu gani?[#Mat. 7:29; Yoh. 2:18.]

²⁴Tena ni nani aliyekupa nguvu hii? Yesu akajibu akiwaambia: Hata mimi nitawauliza neno moja; mtakaponijibu neno hilo, basi, hata mimi nitawaelezea nguvu yangu ya kuyafanya hayo.

²⁵Ubatizo wake Yohana ulikuwa umetoka wapi? Mbinguni au kwa watu? Nao wakafikiri mioyoni mwao kwamba: Tukisema: Ulitoka mbinguni, atatuuliza: Mbona hamkumtegemea?

²⁶Lakini tukisema: Ulitoka kwa watu, tunawaogopa watu; kwani wote wanamshika Yohana kuwa mfumbuaji.[#Mat. 14:5.]

²⁷Kwa hiyo wakamjibu Yesu wakisema: Hatujui. Ndipo, alipowaambia: Basi, hata mimi siwaambii nguvu inayonifanyisha hayo.

²⁸*Lakini mwaonaje? Kulikuwa na mtu mwenye wana wawili. Akamwendea mkubwa, akasema: Mwanangu, nenda leo kufanya kazi mizabibuni!

²⁹Akamjibu, akasema: Sitaki; lakini halafu alijuta akaenda.

³⁰Alipomwendea wa pili na kumwambia yaleyale, yeye akajibu akisema: Ndio, bwana; lakini hakuenda.[#Mat. 7:21.]

³¹Katika hao wawili aliyeyafanya, baba aliyoyataka, ni yupi? Wakasema: Ni wa kwanza. Yesu akawaambia: Kweli nawaambiani: Watoza kodi na wenye ugoni watawatangulia ninyi kuingia katika ufalme wa Mungu.[#Luk. 18:14.]

³²Kwani Yohana alikuja kwenu, akafuata njia yenye wongofu, nanyi hamkumtegemea, lakini watoza kodi na wenye ugoni walimtegemea. Lakini ninyi mlipoviona, hata hapo hamkujuta na kumtegemea.*[#Luk. 7:29.]

Wakulima wabaya.

³³Sikilizeni mfano mwingine! Kulikuwa na mtu mwenye nyumba aliyepanda mizabibu, akaizungusha ugo, akachimbua humo kamulio la kuzikamulia zabibu, akajenga dungu, akaipangisha wakulima, kisha akaenda katika nchi nyingine.[#Mat. 25:14; Yes. 5:1-2.]

³⁴Siku za kuiva zabibu zilipotimia, akatuma watumwa wake kwa wale wakulima, wapewe zabibu zake.

³⁵Nao wakulima wakawakamata watumwa wake, mmoja wakampiga, mmoja wakamwua, mmoja wakamtupia mawe.

³⁶Akatuma tena watumwa wengine walio wengi kuliko wa kwanza. Wakawatendea vilevile.

³⁷Mwisho akamtuma mwanawe kwao akisema: Watamcha mwanangu.

³⁸Lakini wakulima walipomwona mwanawe wakasemezana wao kwa wao: Huyu ndiye kibwana, njoni, tumwue, tuupate urithi wake![#Mat. 27:18; Yoh. 1:11.]

³⁹Kwa kiyo wakamkamata, wakamsukuma sukuma mpaka nje ya mizabibu, wakamwua.

⁴⁰Basi, mwenye mizabibu atakapokuja wakulima wale atawafanyia nini?

⁴¹Wakamwambia: Hao wabaya atawaangamiza vibaya, nayo mizabibu atawapangisha wakulima wengine watakaompa zabibu zake, zitakapoiva.

⁴²*Yesu akawaambia: Hamjasoma katika Maandiko ya kuwa:

Jiwe, walilolikataa waashi, hilihili limekuwa la pembeni?

Hivyo vimefanywa na Bwana; nasi tukivitazama, ni vya kustaajabu.

⁴³Kwa sababu hiyo nawaambiani: Ufalme wa Mungu utaondolewa kwenu

taifa jingine litakalozaa matunda yake liupate.

⁴⁴Naye atakayeanguka juu ya jiwe hilo atapondeka, naye litakayemwangukia, litambana tikitiki*.[#Dan. 2:34-35,44-45.]

⁴⁵Watambiakaji wakuu na Mafariseo walipoisikia mifano yake wakatambua, ya kuwa anawasema wao.

⁴⁶Kwa hiyo wakatafuta kumkamata, lakini waliwaogopa makundi ya watu, kwani walimwona kuwa mfumbuaji.