Mara mbili Mungu anavigeuza viapizo vya Bileamu kuwa mbaraka.

¹Bileamu akamwambia Balaka: Nijengee hapa mahali saba pa kutambikia, kisha nipate hapa madume saba ya ng'ombe na madume saba ya kondoo.

²Balaka akafanya, kama Bileamu alivyosema, kisha Balaka na Bileamu wakatoa kila mahali pa kutambikia ng'ombe mmoja na kondoo mmoja.

³Naye Bileamu akamwambia Balaka: Simama penye ng'ombe yako ya tambiko! Lakini mimi nitakwenda, labda Bwana atakuja kunikuta; ndipo, nitakapokuambia hilo neno, atakalonionyesha. Kisha akaenda kilimani palipo peupe.

⁴Mungu alipokuja kweli kukutana na Bileamu njiani, huyu akamwambia: Nimetengeneza mahali saba pa kutambikia, nikatoa ng'ombe mmoja na kondoo mmoja kila mahali pamoja pa kutambikia.

⁵Naye Bwana akampa Bileamu maneno ya kuyasema kwa kinywa chake, kisha akamwambia: Rudi kwa Balaka, uyaseme maneno yayo hayo!

⁶Aliporudi kwake akamwona, akisimama penye ng'ombe yake ya tambiko, yeye na wakuu wote wa Moabu.

⁷Ndipo, alipoanza kusema maneno yake kwamba:

Huko Aramu ndiko, alikonichukua Balaka;

mfalme wa Moabu amenitoa milimani

upande wa maawioni kwa jua akisema:

Njoo, uniapizie Yakobo! Njoo, umchafukie Isiraeli!

⁸Lakini, Mungu asiyemwapiza nitamwapizaje?

Bwana asiyemchafukia nitamchafukiaje?

⁹Hapa juu miambani ninawaona,

hapa vilimani ninawachungulia;

ndio watu wakaao peke yao,

hawajiwazii kuwa sawa na wamizimu.

¹⁰Yuko nani awezaye kuyahesabu mavumbi yake Yakobo

au kujua tu hesabu ya fungu la nne la Isiraeli?

Kama hawa wanyofu wanavyokufa, ningetaka kufa hivyo,

ningependa, mwisho wangu uwe kama mwisho wao.

¹¹Ndipo, Balaka alipomwambia Bileamu: Umenifanyizia nini? Nimekuchukua, uwaapize adui zangu, kumbe umewabariki!

¹²Akajibu kwamba: Hainipasi kuangalia, niyaseme yaleyale, Bwana aliyoyatia kinywani mwangu?[#4 Mose 22:38.]

¹³Ndipo, Balaka alipomwambia: Nenda pamoja na mimi mahali pengine, utakapowaona wote; sasa unaona mwisho wao tu, huwaoni wote; hapo ndipo, utakaponiapizia watu hawa.

¹⁴Kisha akamchukua, akampeleka juu mlimani kwa Pisiga kulikokuwa uwanda wa wachunguliaji. Huko nako akajenga mahali saba pa kutambikia, kisha akatoa kila mahali pa kutambikia ng'ombe mmoja na kondoo mmoja.

¹⁵Kisha Bileamu akamwambia Balaka: Simama hapa penye ng'ombe yako ya tambiko! Lakini mimi nitakwenda huko kumkuta Bwana.

¹⁶Naye Bwana akaja kweli kumkuta Bileamu, akampa maneno ya kuyasema kwa kinywa chake, kisha akamwambia: Rudi kwa Balaka, uyaseme maneno yayo hayo!

¹⁷Aliporudi kwake akamwona, akisimama penye ng'ombe yake ya tambiko pamoja na wakuu wote wa Moabu. Balaka alipomwuliza: Bwana amesema nini?

¹⁸akaanza kusema maneno yake kwamba:

Inuka, Balaka, usikie!

Nitegee sikio lako, mwana wa Sipori!

¹⁹Mungu si mtu, aseme uwongo,

si mwana wa mtu, ageuze moyo.

Yeye aseme neno, asilifanye?

Aweke agano, asilitimize?

²⁰Tazameni! Nimepewa kubariki; napo,

alipobariki, siwezi kuyageuza.

²¹Hakuna aliyepata kutazama mambo

yaliyo ya bure kwake Yakobo,

wala hakuna aliyeona masumbuko kwake Isiraeli;

Bwana Mungu wake yuko pamoja naye,

nayo mashangilio ya mfalme husikilika kwao.

²²Mungu ndiye aliyewatoa Misri,

naye anazo nguvu kama za nyati.

²³Kweli hakuna uganga wa kumwangamiza Yakobo,

wala hakuna uaguaji wa kumponza Isiraeli,

siku zote Yakobo na Isiraeli huambiwa,

Mungu anayoyafanya.

²⁴Na mwone, watu hawa wakiinuka kama simba mke,

wakijisimamisha kama simba mume!

Halali, mpaka ale nyama zao, aliowararua,

mpaka anywe damu zao, aliowaua.

²⁵Ndipo, Balaka alipomwambia Bileamu: Usipoweza kuwaapiza, uache kuwabariki!

²⁶Lakini Bileamu akamjibu Balaka kwamba: Sikukuambia kwamba: Yote, Bwana atakayoyasema, nitayafanya?[#4 Mose 23:12.]

²⁷Ndipo, Balaka alipomwambia Bileamu: Njoo, nikupeleke mahali pengine, labda huko utanyoka machoni pake Mungu, ukiniapizia huko watu hawa.

²⁸Kisha Balaka akamchukua Bileamu, akampeleka juu mlimani kwa Peori kunakoelekea jangwani.[#4 Mose 25:3.]

²⁹Huko Bileamu akamwambia Balaka: Nijengee hapa mahali saba pa kutambikia! Kisha unipatie hapa madume saba ya ng'ombe na madume saba ya kondoo.[#4 Mose 23:1.]

³⁰Balaka akafanya, kama Bileamu alivyosema, akatoa kila mahali pa kutambikia ng'ombe mmoja na kondoo mmoja.