Haki ya wana wa kike.

¹Wakaja wana wa kike wa Selofuhadi, mwana wa Heferi, mwana wa Gileadi, mwana wa Makiri, mwana wa Manase, waliokuwa wa ndugu za Manase, mwana wa Yosefu, majina yao hawa wanawe wa kike ndiyo haya: Mala na Noa na Hogla na Milka na Tirsa.[#4 Mose 26:33; 36:2; Yos. 17:3-6.]

²Hao wakamtokea Mose na mtambikaji Elazari na wakuu wa mkutano wote hapo pa kuliingilia Hema la Mkutano, wakasema:

³Baba yetu alikufa nyikani, naye hakuwa katika mkutano wao waliofanya shauri la kumpingia Bwana katika mkutano wao Wakora, ila alikufa kwa ukosaji wake yeye, lakini hakuwa na wana wa kiume.[#4 Mose 16:2; 26:65.]

⁴Mbona jina la baba yetu litoweke katika ndugu zake, kwa kuwa hakuwa na mwana wa kiume? Tupe sisi fungu katikati ya ndugu za baba yetu, tulichukue!

⁵Mose akalitokeza hilo shauri lao mbele ya Bwana.[#3 Mose 24:12.]

⁶Naye Bwana akamwambia Mose kwamba:

⁷Haya, wana wa kike wa Selofuhadi waliyoyasema, ndiyo ya kweli. Uwape katikati ya ndugu za baba yao fungu, walichukue, liwe lao, ukiagiza, fungu la baba yao walipate wao.

⁸Nao wana wa Isiraeli waambie kwamba: Mtu akifa pasipo kuwa na mwana wa kiume, fungu lake huyu sharti mmwachie mwanawe wa kike.

⁹Kama hata mwana wa kike hakuwa naye, mtawapa ndugu zake fungu lake.

¹⁰Kama hata ndugu hakuwa nao, mtawapa ndugu za baba yake fungu lake.

¹¹Kama baba yake hakuwa na ndugu, basi, hilo fungu lake mtampa ye yote aliye ndugu yake wa kuzaliwa naye wa mlango wake, alichukue. Haya na yawe kwao wana wa Isiraeli maongozi yenye haki, kama Bwana alivyomwagiza Mose.

Yosua anachaguliwa kumpokea Mose kazi zake.

¹²Bwana akamwambia Mose: Panda huku juu mlimani kwa Abarimu, uitazame hiyo nchi, nitakayowapa wana wa Isiraeli.[#5 Mose 32:48-49.]

¹³Ukiisha kuiona utachukuliwa nawe kwenda kwao walio ukoo wako, kama kaka yako Haroni alivyochukuliwa naye kwenda huko.[#4 Mose 20:24,28.]

¹⁴Ni kwa kuwa nyikani kwa Sini hamkukitii vema kinywa changu cha kwamba: Mnitakase kwa kutoa maji machoni pao, mkutano huu uliponigombeza; hayo yalikuwa penye Maji ya Magomvi kule Kadesi nyikani kwa Sini.[#4 Mose 20:12-13.]

¹⁵Naye Mose akamwambia Bwana kwamba:

¹⁶Bwana wangu aliye mwenye roho zao wote walio wenye miili na aweke mtu kuwa mkuu wa mkutano huu,[#4 Mose 16:22.]

¹⁷atakayewatangulia kwa kutoka na kuingia kwake, atakayewaongoza wao, wapate kutoka na kuingia tena, watu wa mkutano huu wa Bwana wasiwe kama kondoo wasio na mchungaji.[#Mat. 9:36.]

¹⁸Ndipo, Bwana alipomwambia Mose: Mchukue Yosua, mwana wa Nuni, aliye mtu mwenye Roho yangu moyoni mwake, umbandikie mkono kichwani pake![#5 Mose 3:21; 34:9.]

¹⁹Kisha msimamishe mbele ya mtambikaji Elazari machoni pao walio wa mkutano huu, umwagizie mambo yako machoni pao

²⁰na kumgawia utukufu wako, umkalie naye, watu wote wa mkutano wa wana wa Isiraeli wamsikie.[#2 Fal. 2:9,15.]

²¹Itakapotukia, na amtokee mtambikaji Elazari, ampigie bao na kuutumia Urimu mbele ya Bwana, kama desturi; utakaposema, watoke, sharti watoke, tena utakaposema, waingie, sharti waingie, yeye na wana wote wa Isiraeli pamoja naye, huo mkutano wote pia.[#2 Mose 28:30.]

²²Mose akafanya, kama Bwana alivyomwagiza: akamchukua Yosua, akamsimamisha mbele ya mtambikaji Elazari na mbele ya mkutano wote.

²³Kisha akambandikia mikono yake kichwani pake, akamwagizia mambo yake, kama Bwana alivyosema kinywani mwa Mose.