Kazi za Walawi.

¹Bwana akamwambia Mose na Haroni kwamba:

²Fanyeni hesabu ya wana wa Kehati na kuwatoa kwao wana wa Lawi walio wa udugu wao wa milango ya baba zao.

³Wao wa miaka thelathini na zaidi mpaka miaka hamsini ndio wanaofaa wote kuuingia utumishi huo, wafanye kazi za humo Hemani mwa Mkutano.[#4 Mose 8:24.]

⁴Nazo kazi za utumishi za wana wa Kehati za humo Hemani mwa Mkutano ziwe za Patakatifu Penyewe.

⁵Makambi yatakapovunjwa, Haroni na wanawe na waingie Hemani, walishushe lile guo kubwa la pazia, wafunike nalo Sanduku la Ushahidi.

⁶Kisha waweke juu yake blanketi la ngozi za pomboo, juu yake tena watandaze nguo nyeusi iliyo ya kifalme yote nzima, kisha na walitie mipiko yake.

⁷Hata meza yenye mikate ya kuwa usoni pa Bwana na waifunike kwa nguo nyeusi ya kifalme na kuweka juu yake vyano na vijiko na vikombe na madumu ya vinywaji vya tambiko, nayo mikate, wasiyokoma kumwekea Bwana, sharti iwe juu yake.

⁸Kisha na watandaze nguo nyekundu ya kifalme, kisha waifunike kwa blanketi la ngozi za pomboo, kisha na waitie mipiko yake.

⁹Kisha na wachukue nguo nyeusi ya kifalme, wakifunike kinara kiangazacho pamoja na taa zake na koleo zake na makato yake na vyombo vyake vyote vya mafuta, wanavyovitumia vya kazi yake.[#2 Mose 25:31.]

¹⁰Kisha na wakifunike pamoja na vyombo vyake vyote kwa blanketi la ngozi za pomboo, kisha na wakiweke juu ya miti ya kukichukulia.

¹¹Kisha watandaze nguo nyeusi ya kifalme juu ya meza ya dhahabu ya kuvukizia, kisha waifunike kwa blanketi la ngozi za pomboo na kuitia mipiko yake.

¹²Kisha na wachukue vyombo vyote, wanavyovitumia Patakatifu, wavifunge katika nguo nyeusi ya kifalme na kuvifunika tena kwa blanketi la ngozi za pomboo, kisha waviweke juu ya miti ya kuvichukulia.

¹³Kisha na wazoe majivu mezani pa kuteketezea ng'ombe za tambiko, kisha watandaze juu yake nguo nyekundu ya kifalme.

¹⁴Kisha na waweke juu yake vyombo vyake vyote, wanavyovitumia wakifanya kazi za hapo, sinia na nyuma na majembe na vyano na vyombo vyote vya meza ya kuteketezea ng'ombe za tambiko, wavifunike juu kwa blanketi la ngozi za pomboo, kisha na waitie mipiko yake.

¹⁵Haroni na wanawe watakapokwisha kupafunika Patakatifu na vyombo vyake vyote wakitaka kuvunja makambi, ndipo, wana wa Kehati watakapoingia kuvichukua, lakini wasiguse vitu vitakatifu, wasife. Hii ndiyo mizigo yao wana wa Kehati, watakayoichukua Hemani mwa Mkutano.[#4 Mose 7:9; 2 Sam. 6:6-7.]

¹⁶Tena kazi yake Elazari, mwana wa mtambikaji Haroni, ni kuyaangalia mafuta ya kinara na mavukizo yanukayo vizuri na vilaji vya tambiko vya kila siku na mafuta ya kupaka, tena kuliangalia Kao lote zima na vyote vilivyomo ndani ya Patakatifu, maana ndivyo vyombo vyake.

¹⁷Bwana akamwambia Mose na Haroni kwamba:

¹⁸Angalieni, shina la udugu wa Wakehati lisitoweke kwao Walawi!

¹⁹Ila yafanyeni haya, wapate kuwapo, wasife, watakapopakaribia Patakatifu Penyewe: Kwanza Haroni na wanawe na waingie, kisha wawaweke kila mtu penye kazi yake na kumpa mzigo wake.

²⁰Lakini wasiingie kamwe kupatazama tu Patakatifu, ijapo iwe kitambo kidogo kabisa, wsife.[#1 Sam. 6:19.]

²¹Bwana akamwambia Mose kwamba:

²²Fanya hesabu ya wana wa Gersoni nao walio wa milango ya baba zao na wa udugu wao.

²³Uwakague walio wenye miaka thelathini na zaidi mpaka miaka hamsini, ndio wanaofaa wote kuuingia utumishi, wafanye kazi za kutumikia Hemani mwa Mkutano.

²⁴Hizi ndizo kazi zao walio wa udugu wa Gersoni za kutumika na za kuchukua mizigo:

²⁵na wayachukue mazulia ya Kao, na Hema la Mkutano na chandalua chake na chandalua cha ngozi za pomboo kilichoko juu yake na pazia la hapo pa kuliingilia Hema la Mkutano,

²⁶na nguo za uani na pazia la hapo pa kuingia langoni kwa ua, unaolizunguka Kao na meza ya kuteketezea ng'ombe ya tambiko, na kamba zao na vyombo vyote vya utumishi wao, nayo yote yapasayo kufanywa nao na wayafanye.

²⁷Utumishi wote wa wana wa Gersoni, kama ni kuichukua mizigo iwapasayo yote, au kama ni kuzifanya kazi ziwapasazo zote, ufanyike kwa kuagizwa na Haroni na wanawe; ninyi mwaweke kwa kuzignlia kazi za mizigo yao yote.

²⁸Hizi ndizo kazi za utumishi wao walio wa udugu wa wana wa Gersoni wa kutumikia Hemani mwa Mkutano, naye atakayewaangalia ni Itamari, mwana wa mtambikaji Haroni.

²⁹Uwakague nao wana wa Merari walio wa udugu wao wa milango ya baba zao:

³⁰uwakague walio wa miaka thelathini na zaidi mpaka miaka hamsini, ndio wanaofaa wote kuuingia utumishi, wafanye kazi za kutumikia Hemani mwa Mkutano.

³¹Hizi ndizo kazi zao za kuiangalia mizigo yao, nao huo ndio utumishi wao wote wa kufanya Hemani mwa Mkutano: kuzichukua mbao za Kao na misunguo yake na nguzo zake na miguu yake,

³²na nguzo zinazouzunguka au na miguu yao na mambo zao na kamba zao na vyombo vyao vyote, wafanye yote yaupasayo utumishi wao. Navyo vyombo vya kuviangalia, wakivichukua, mwape na kuvitaja kila kimoja jina lake.

³³Hizi ndizo kazi za utumishi wao walio wa udugu wa wana wa Merari, wazifanye za kutumikia Hemani mwa Mkutano, naye mkuu wao awe Itamari, mwana wa mtambikaji Haroni.

Hesabu ya Walawi.

³⁴Kwa hiyo Mose na Haroni na wakuu wa mkutano wakawakagua wana wa Kehati walio wa udugu wao na wa milango ya baba zao;

³⁵waliokuwa wenye miaka thelathini na zaidi mpaka miaka hamsini, ndio waliofaa wote kuuingia utumishi, wafanye kazi za kutumikia Hemani mwa Mkutano.

³⁶Jumla yao walio wa udugu wao walikuwa watu 2750.

³⁷Hii ndiyo jumla yao wote wa udugu wa Wakehati waliotumikia Hemani mwa Mkutano, Mose na Haroni waliowakagua kwa amri, Bwana aliyompa Mose.

³⁸Wana wa Gersoni wakakaguliwa nao walio wa udugu wao na wa milango ya baba zao,

³⁹waliokuwa wenye miaka thelathini na zaidi mpaka miaka hamsini, ndio waliofaa wote kuuingia utumishi, wafanye kazi za kutumikia Hemani mwa Mkutano.

⁴⁰Jumla yao walio wa udugu wao na wa milango ya baba zao walikuwa watu 2630.

⁴¹Hii ndiyo jumla yao wote wa udugu wa wana wa Gersoni waliotumikia Hemani mwa Mkutano, Mose na Haroni waliowakagua kwa amri ya Bwana.

⁴²Ndugu za wana wa Merari wakakagulia nao walio wa udugu wao na wa milango ya baba zao,

⁴³waliokuwa wenye miaka thelathini na zaidi mpaka miaka hamsini, ndio waliofaa wote kuuingia utumishi, wafanye kazi za kutumikia Hemani mwa Mkutano.

⁴⁴Jumla yao walio wa udugu wao walikuwa watu 3200.

⁴⁵Hii ndiyo jumla yao walio wa udugu wa wana wa Merari, Mose na Haroni waliowakagua kwa amri, Bwana aliyompa Mose.

⁴⁶Hawa ndio Walawi wote waliokaguliwa, Mose na Haroni na wakuu wa Waisiraeli waliowakagua, waliokuwa wa udugu wao na wa milango ya baba zao,

⁴⁷ndio waliokuwa wenye miaka thelathini na zaidi mpaka miaka hamsini, nao ndio wote waliofaa kufanya kazi za kuutumikia huo utumishi nao utumishi wa kuchukua mizigo Hemani mwa Mkutano.

⁴⁸Jumla yao walikuwa watu 8580.

⁴⁹Kwa amri, Bwana aliyompa Mose, aliwakagua na kumweka kila mtu mmoja penye kazi yake ya utumishi na penye mzigo wake wa kuuchukua; nao wakawekwa vivyo hivyo, kama Bwana alivyomwagiza Mose.