Mbaraka ya kumcha Mungu.

¹Mwanangu, usiyasahau maonyo yangu!

Nao moyo wako na uyalinde maagizo yangu!

²Kwani yatakupatia siku nyingi na miaka mingi

ya kukaa mwenye uzima na mwenye utengemano.

³Upendo wa kweli usikuache, uufunge shingoni pako,

tena uuandike katika kibao cha moyo wako!

⁴Ndivyo, utakavyoona upendeleo na akili njema

machoni pake Mungu napo machoni pa watu.

⁵Mjetee Bwana kwa moyo wako wote,

usijiegemeze utambuzi wako!

⁶Katika njia zote umjue yeye!

Ndivyo, atakavyokunyoshea mapito yako.

⁷Usijiwazie mwenyewe kuwa mwenye werevu wa kweli,

ila umche Bwana, uepuke penye mabaya!

⁸Hii itakuwa dawa ya kitovu chako

na kunywaji cha kuitia mifupa yako nguvu.

⁹Mheshimu Bwana ukimtolea vipaji vya mali zako

na malimbuko ya mapato yako yote!

¹⁰Ndipo, vyanja vyako vitakapojazwa,

nayo makamulio yako yatafurikiwa na pombe mbichi.

¹¹Mwanangu, usiseme: Si kitu, ukichapwa na Bwana!

Wala usilegee, unapokanywa naye!

¹²Kwani Bwana humchapa anayempenda,

kama baba anavyomchapa mwanawe ampendezaye.

Mbaraka ya ujuzi.

¹³Mwenye shangwe ni mtu aonaye werevu wa kweli,

naye mtu apataye utambuzi,

¹⁴kwani kuupata ni kwema kuliko kupata fedha,

nayo faida yake ni kubwa kuliko dhahabu tupu;

¹⁵maana una kima kuliko lulu,

nayo yote pia yapendezayo watu hayalingani nao.

¹⁶Siku nyingi za kuwapo zimo kuumeni mwake,

namo kushotoni mwake umo utajiri na utukufu.

¹⁷Njia zake ni njia za kupendeza,

nayo mikondo yake ni yenye utengemano.

¹⁸Ndio mti wenye uzima kwao walioushika,

mwenye shangwe ni mtu anayeshikamana nao.

¹⁹Bwana aliuweka msingi wa nchi kwa werevu wa kweli,

nazo mbingu alizishupaza kwa utambuzi.

²⁰Kwa ujuzi wake vilindi vya maji vikatokea kuwa mboji,

nayo mawingu hudondoka umande.

²¹Mwanangu, haya yasitoweke machoni pako!

uangalie ujuzi wa kweli na mawazo ya moyo!

²²Ndivyo, utakavyoipatia roho yako uzima,

tena utakuwa pambo zuri shingoni pako.

²³Ndivyo, utakavyokwenda katika njia yako na kutulia,

nao mguu wako hautajikwaa.

²⁴Utakapolala hutapatwa na woga,

kweli utakapolala, usingizi wako utakuwa mtamu,

²⁵usiyaogope mastusho yatakayokutukia,

wala mwangamizo wao wasiomcha Mungu utakapotimia.

²⁶Kwani Bwana atakuwa egemeo lako,

ataulinda mguu wako, usinaswe.

Watu wasifanyiane mabaya!

²⁷Chema cho chote usimnyime mwenzio apaswaye nacho,

ikiwa, mkono wako unaweza kumpatia.

²⁸Usimwambie mwenzio: Nenda, urudi! nitakupa kesho,

nawe hicho cha kumpa unacho hapo hapo!

²⁹Usiwaze kumfanyizia mwenzio mabaya,

yeye akikaa na wewe pasipo kuogopa kitu!

³⁰Usigombane na mtu bure tu,

kama hakukufanyizia kibaya!

³¹Mkorofi usimwonee wivu,

wala njia zake usizichague kuwa za kuzishika!

³²Kwani mpotovu humtapisha Bwana,

lakini wanyokao ndio, ambao anakula njama nao.

³³Kiapizo cha Bwana huzikalia nyumba zao wasiomcha,

lakini makao ya waongofu huyabariki.

³⁴Akijia wafyozaji huwafyoza naye,

lakini wanyenyekevu huwapatia huruma.

³⁵Werevu wa kweli watapata utukufu, uwe fungu lao,

lakini matukuzo yao wapumbavu ndio matwezo yatakayowapata.