Mifano 31

Mama aliyomfundisha mwanawe mfalme.

²Niseme nini, mwanangu? Niseme nini, mwanangu, niliyekuzaa?

Niseme nini, mwanangu, niliyemwapia viapo?

³Usiwape wanawake nguvu zako!

Wala usizishike njia zao, maana huangamiza wafalme.

⁴Wafalme, Lemweli, wafalme hawapaswi na kunywa mvinyo,

wala wakuu haiwapasi kuuliza: Vileo viko wapi?

⁵Wasije kusahau maongozi kwa kunywa kwao,

wakayapotoa mashauri yao wote walio wanyonge.

⁶Wapeni vileo wanaokwenda kujipoteza,

wapeni mvinyo walio wenye uchungu rohoni mwao!

⁷Wanywe, wakausahau umaskini wao,

wasiyakumbuke tena masumbuko yao!

⁸Kifunue kinywa chako kuwatetea wasioweza kusema,

uwasaidie shaurini wote walioachwa peke yao!

⁹Kifunue kinywa chako, ukate mashauri yaongokayo,

uwapatie wanyonge na maskini shaurini yawapasayo.

Sifa ya mwanamke mwema.

¹⁰Yuko nani aonaye mwanamke mwenye uwezo mwema?

Kima chake ni kikubwa kuliko kina cha lulu.

¹¹Moyo wa mumewe huweza kumtegemea,

nayo mapato hayakoseki.

¹²Humfanyizia mema tu, mabaya hayafanyi

siku zote za maisha yake.

¹³Hutafuta manyoya ya kondoo na pamba,

kisha hufanya kazi za kuzitumia kwa mikono ipendayo kufanya kazi.

¹⁴Hufanana na merikebu za mchuuzi,

akileta vyakula vyake toka mbali.

¹⁵Huamka usiku, ukiwa haujaisha bado,

huwapa chakula waliomo nyumbani mwake,

nao vijakazi huwapa kazi ziwapasazo.

¹⁶Akiviwaza moyoni kuwa vema hivyo hununua shamba,

tena hupanda mizabibu kwa mapato ya mikono yake.

¹⁷Hujifunga kiunoni kwa nguvu,

kisha huishupaza mikono yake, ifanye kazi.

¹⁸Huona, ya kuwa anafanikiwa vema kwa kujikaza hivyo,

kwa hivyo hata usiku taa yake haizimiki.

¹⁹Hutengeneza kitanda cha kufumia kwa mikono yake,

kisha vidole vyake huvifumisha nguo.

²⁰Wanyonge huwashika kwa mkono wake,

nao wakiwa huwapokea kwa mikono yake miwili.

²¹Haogopi, ya kuwa baridi kali iwapate waliomo nyumbani mwake,

kwani wa nyumbani mwake wote hupata mavazi mekundu ya sufi.

²²Hujitengenezea mazulia,

hujivika nguo nzuri za pamba, hata za rangi.

²³Mumewe hujulika malangoni mashaurini

akikaa pamoja na wazee wa nchi.

²⁴Hutengeneza fulana, akaziuza,

nayo mishipi huwapa wachuuzi.

²⁵Uwezo na utukufu ndio mavazi yake,

kwa hiyo huyacheka mambo ya siku ijayo.

²⁶Kinywa hukifunua, kiseme maneno yenye werevu wa kweli,

nayo maonyo yenye upole yamo katika ulimi wake.

²⁷Huangalia sana mwenendo wao waliomo nyumbani mwake,

vilaji vya uvivu havili kabisa.

²⁸Wanawe hutokea na kumtukuza,

mumewe naye humshangilia kwamba:

²⁹Wako wanawake wengi wenye uwezo wa kufanya mema,

lakini wewe umewapita wote pia.

³⁰Upendezi hudanganya, nao uzuri ni wa bure,

lakini mwanamke amchaye Bwana hupasa kutukuzwa.

³¹Mpeni mapato ya mikono yake,

matendo yake yamtukuze malangoni!