Kumshukuru Mungu.

¹Mshukuruni Bwana, ya kuwa ni mwema, ya kuwa upole wake ni wa kale na kale![#Sh. 106:1.]

²Mshukuruni Mungu, aipitaye miungu,

ya kuwa upole wake ni wa kale na kale!

³Mshukuruni Bwana wa mabwana,

ya kuwa upole wake ni wa kale na kale!

⁴Ni yeye peke yake afanyaye mataajabu makuu,

kwani upole wake ni wa kale na kale.

⁵Ndiye aliyezifanya mbingu kwa utambuzi wake,

kwani upole wake ni wa kale na kale.

⁶Ndiye aliyeitandika nchi juu ya maji,

kwani upole wake ni wa kale na kale.

⁷Ndiye aliyeifanya mianga mikubwa,

kwani upole wake ni wa kale na kale.

⁸Jua alilipa kutawala mchana,

kwani upole wake ni wa kale na kale.

⁹Mwezi pamoja na nyota alizipa kutawala usiku,

kwani upole wake ni wa kale na kale.

¹⁰Ndiye aliyewapiga wazaliwa wa kwanza kule Misri,

kwani upole wake ni wa kale na kale.

¹¹Akawatoa Waisiraeli katika nchi yao,

kwani upole wake ni wa kale na kale.

¹²Kwa nguvu za viganja vyake, alipoikunjua mikono yake,

kwani upole wake ni wa kale na kale.

¹³Ndiye aliyeitenga Bahari Nyekundu, ikasimama pande mbili,

kwani upole wake ni wa kale na kale.

¹⁴Akawapitisha Waisiraeli hapo katikati,

kwani upole wake ni wa kale na kale.

¹⁵Ndiye aliyemtosa Farao na vikosi vyake katika Bahari Nyekundu,

kwani upole wake ni wa kale na kale.

¹⁶Ndiye aliyewaongoza nyikani walio ukoo wake,

kwani upole wake ni wa kale na kale.

¹⁷Ndiye aliyepiga wafalme wakuu,

kwani upole wake ni wa kale na kale.

¹⁸Akawaua wafalme wenye nguvu,

kwani upole wake ni wa kale na kale.

¹⁹Kama Sihoni, mfalme wa Waamori,

kwani upole wake ni wa kale na kale.

²⁰Na Ogi, mfalme wa Basani,

kwani upole wake ni wa kale na kale.

²¹Akazitoa nchi zao, zitwaliwe,

kwani upole wake ni wa kale na kale.

²²Zitwaliwe na Waisiraeli walio watumishi wake, ziwe fungu lao,

kwani upole wake ni wa kale na kale.

²³Ndiye aliyetukumbuka, tulipokuwa tumenyenyekezwa,

kwani upole wake ni wa kale na kale.

²⁴Akatuponya na kutuokoa kwao watusongao,

kwani upole wake ni wa kale na kale.

²⁵Ndiye anayewapa vilaji wote walio wenye miili,

kwani upole wake ni wa kale na kale.

²⁶Mshukuruni Mungu aliye wa mbingu!

Kwani upole wake ni wa kale na kale.