Maombo ya mtu aumizwaye vibaya na wachukivu wake.

¹Bwana, gombana nao wanigombezao! Pigana nao wanipiganishao!

²Shika ngao na kingio! Inuka, unisaidie![#Sh. 7:13-14.]

³Chezesha mkuki, uwakinge wao wanikimbizao! Iambie roho yangu kwamba: Wokovu wako ni mimi.

⁴Sharti watwezwe kwa kuumbuka waitafutao roho yangu, sharti warudi nyuma na kuinamisha vichwa waniwaziao vibaya;[#Sh. 40:15.]

⁵sharti wawe kama makapi, yakipatwa na upepo, malaika wa Bwana akiwakumba, waanguke.

⁶Njia yao sharti iwe yenye giza pamoja na utelezi, atakapowakimbiza malaika wa Bwana.

⁷Kwani wamenitegea tanzi lao, linikamate, pasipo sababu yo yote, wakaichimbia roho yangu miina pasipo sababu yo yote.[#Sh. 35:19.]

⁸Na uwajie mwangamizo wa kustusha, ambao walikuwa hawaujui, nalo tanzi lao, walilolitanda, liwakamate wao; huo mwangamizo wa kustusha ukiwapata, na waangushwe nao.[#Sh. 9:16.]

⁹Ndipo, roho yangu itakapopiga vigelegele kwa kuwa na Bwana, na kuushangilia wokovu, iliouona.

¹⁰Ndipo, itakaposema nayo mifupa yangu yote: Bwana, afananaye nawe yuko wapi? Unamponya mnyonge mkononi mwake yeye ampitaye nguvu, kweli huponya mnyonge na mkiwa mikononi mwao wamnyang'anyao.

¹¹Mashahidi wa ukorofi wananiinukia, wananiuliza mambo, nisiyoyajua.

¹²Mema, niliyowatendea, wanayalipa na kunifanyizia mabaya, ukiwa wa kuwa peke yake uipate roho yangu.[#Sh. 38:21.]

¹³Lakini vazi langu mimi lilikuwa gunia hapo, walipougua, nikajisumbua kwa kufunga na kwa kuwaombea na kujipiga kifua.[#Iy. 31:29; Rom. 12:15.]

¹⁴Niliwaendea, kama ni ndugu yangu, niliyempenda kweli, kama amwombolezeaye mama niliinamisha kichwa kwa kusikitika.

¹⁵Lakini wao hulifurahia anguko langu wakikusanyika; kweli walikusanyika kwa ajili yangu mimi, nao nisiowajua wananitukana pasipo kukoma.

¹⁶Kwao wenye ulafi wa matusi huyafyoza nayo ya Kimungu, kisha hukereza meno kwa ajili yangu mimi.[#Iy. 16:9.]

¹⁷Bwana, utawatazama tu mpaka lini? Irudishe roho yangu uzimani, wasiimalize! Nitoe kwenye wana wa simba! Kwani niko peke yangu.[#Sh. 22:21.]

¹⁸Kwa hiyo nitakushukuru, wengi wakutanikapo, na kukuimbia kwenye watu walio wenye nguvu.[#Sh. 22:23.]

¹⁹Wapendao uwongo wasinifurahie, wala wasinitazame na jicho baya wanichukiao bure![#Sh. 25:19; 69:5; Yoh. 15:25.]

²⁰Kwani yawezayo kutupatanisha hawayasemi, nao walio watulivu katika nchi huwawazia mambo ya udanganyifu.

²¹Wananiasamia sana vinywa vyao kwa kusema: Macho yetu yamekuona! Weye! Weye![#Sh. 40:16.]

²²Bwana, umeyaona, usiyanyamazie! Usinikalie mbali, Bwana wangu!

²³Amka! Inuka, uniamulie! Mungu wangu na Bwana wangu, unigombee![#Sh. 44:24.]

²⁴Niamulie kwa wongofu wako, Bwana Mungu wangu, wasinifurahie!

²⁵Wasiseme mioyoni mwao: Weye! Ndivyo vinavyotupendeza! Wala wasiseme: Tumemmeza!

²⁶Sharti watwezwe wakiumbuliwa wote pamoja waliofurahiwa na mabaya yaliyonipata, sharti wavikwe soni, nyuso ziwaive waliojikuza na kuninyenyekeza.[#Sh. 35:4.]

²⁷Lakini wao waliopendezwa na wongofu wangu sharti wapige vigelegele kwa kufurahiwa! Sharti waseme pasipo kukoma: Mkuu ni Bwana, mtumishi wake akikaa na kutengemana, hupendezwa.[#Sh. 40:17.]

²⁸Ulimi wangu sharti uusimulie wongofu wako, ukusifu wewe siku zote!