Kilio cha mtu asongekaye sana.

¹Kwa mwimbishaji. Fundisho la Dawidi la kuimbia mazeze.

²Sikiliza Mungu, kuomba kwangu!

Usijifiche, nikikulalamikia!

³Niangalie, uniitikie! Ninahangaika kwa kulia kwangu na kupiga kite.

⁴Kwa sababu adui wananizomea, nao wasiomcha Mungu wananisonga, kwani wanataka, mateso yaniangukie, kwa ukali tu wananipingia.

⁵Moyo wangu humu ndani yangu unatetemeka, mastuko kama ya kufa yakaniguia;

⁶masukosuko ya mwili yananijia kwa kuogopa tu, nikapigwa sana na bumbuazi.

⁷Nikasema: Ningepata mabawa kama ya njiwa, ningeruka na kutua pawapo pote![#Sh. 11:1.]

⁸Mara wangeniona, nikienda mbali, nikae nyikani.

⁹Ningepiga mbio kulifikia kimbilio langu, niondoke kwenye upepo uvumao na nguvu kama za kimbunga.

¹⁰Waangamize Bwana, ukiwavuruga, wapitane wanaposema, kwani mjini mimeona makorofi na magomvi.[#2 Sam. 17:14.]

¹¹Mchana kutwa na usiku kucha huzungukia kwenye maboma yake, lakini mjini mna mapotovu na maumivu.

¹²Mle mjini mnaangamika, unyang'anyi na udanganyifu hauondoki katika mitaa yake.

¹³Tena anayenitukana siye adui yangu, ningevumilia, wala siye mchukivu wangu anayejikuza, aninyenyekeze; kama ndiye, ningejificha, asinione.

¹⁴Ila ndiwe wewe mwenzangu, ambaye tuliliana damu, tena ulikuwa mwenyeji wangu mimi.[#Sh. 41:10; 2 Sam. 15:12.]

¹⁵Vilikuwa vyenye utamu, jinsi tulivyoendeleana, tulivyokwenda pamoja na makundi ya watu Nyumbani kwake Mungu.

¹⁶Kifo na kiwakamate, washuke kuzimuni wakingali wa hai! Kwani katika makao yao na katika mioyo yao yamo mabaya tu.[#4 Mose 16:30-33.]

¹⁷Mimi ninamlilia Mungu, yeye Bwana ataniokoa.

¹⁸Jioni na mapema na mchana kutwa na nilalamike na kupiga kite; ndipo, atakapoisikia sauti yangu.

¹⁹Ataikomboa roho yangu, nikae na kutengemana, wao wasinifikie, ijapo wawe wengi wanaonijia;

²⁰Mungu husikia, naye atawajibu. Yeye ndiye akaaye tangu kale. Wao hawataki kugeuka, kwa kuwa hawamwogopi aliye Mungu.[#Sh. 102:27.]

²¹Maana wanawakamata nao waliomkalia Mungu, nalo Agano lake wanalipinga.

²²Wayasemayo ni mafuta ya midomo, ni matamu kuliko maziwa, lakini mioyoni mwao huwaza vita. Maneno yao, wayasemayo, hulegea kuliko mafuta ya uto, lakini wenyewe ndio panga zilizokwisha kuchomolewa.[#Sh. 57:5; Yer. 9:8.]

²³Umtupie bwana yakulemeayo! Yeye atakumalizia, hatamtoa mwongofu, atikisike kale na kale.[#1 Petr. 5:7.]

²⁴Nawe Mungu, uwatelemshe, waje shimoni mwenye kuoza! Wale wenye manza za damu na madanganyo siku zao hawatazifikisha kati, lakini mimi ninakuegemea.[#Sh. 102:25; 2 Fal. 9:33,36-37.]