Kilio cha mtu aliyeugua mwili na moyo.

¹Bwana usinipatilize kwa makali yako, wala kwa machafuko yako yenye moto usinichape![#Sh. 38:2; Yer. 10:24.]

²Bwana, na uniwie mpole, kwani ni mnyonge; kwa kuwa mifupa yangu imestuka, niponye Bwana![#Sh. 51:10.]

³Nayo roho yangu imestuka sana, nawe Bwana, utakawia mpaka lini?[#Sh. 13:2-3.]

⁴Ee Bwana, rudi, uiopoe roho yangu! Niponye kwa hivyo, ulivyo mwenye utu!

⁵Kwani kwao waliokwisha kufa hakuna anayekukumbuka, nako kuzimuni yuko nani atakayekushukuru?[#Sh. 30:10; 88:11; 115:17.]

⁶Kwa kupiga kite nimechoka, nikakiogesha kitanda changu usiku wote, nikayalowesha malalo yangu kwa machozi yangu.

⁷Macho yangu yamenyauka kwa uchungu, yakachakaa kwa ajili yao wote wanisongao.[#Sh. 31:10; Iy. 17:7.]

⁸Ondokeni kwangu, nyote mfanyao maovu! Kwani Bwana huzisikia sauti za kilio changu.

⁹Bwana husikia, ninavyomlalamikia, Bwana huyapokea maombo yangu.

¹⁰Adui zangu watapatwa na soni wote kwa kustushwa sana, watarudi nyuma kwa kuingiwa na soni kwa mara moja.[#Sh. 35:4,26; 40:15.]