Kuushukuru wokovu.

¹Mpigieni Mungu shangwe, ninyi nchi zote!

²Uimbieni utukufu wa Jina lake! Mtukuzeni na kumsifu!

³Mwambieni Mungu: Kweli matendo yako ndiyo yanayostaajabisha, kwa nguvu zako nyingi watakunyenyekea nao wachukivu wako.

⁴Nchi zilizoko zote zinakuangukia, wanakuimbia wewe, nalo Jina lako wanaliimbia.

⁵Njoni, mvione vioja vya Mungu! Jinsi anavyowaendea wana wa watu, ni vya kustaajabu.

⁶Bahari aliigeuza kuwa nchi kavu, wakapita kwa miguu kwenye mto mkubwa; kwa hiyo tunamfurahia aliye hivyo.[#2 Mose 14:21; Yos. 3:17.]

⁷Hutawala kwa uwezo wake mkubwa kale na kale, macho yake huyatazama makabila ya watu, waliomwacha hawatajivuna mbele yake.

⁸Ninyi makabila ya watu, mtukuzeni Mungu wetu! Pazeni sauti za kumsifu!

⁹Roho zetu huzipa kuwa zenye uzima, haiachi miguu yetu, ujikwae.

¹⁰Kweli ulitujaribu, Mungu, na kutuyeyusha, kama ni fedha, watu wanazoziyeyusha,[#Fano. 17:3.]

¹¹ukatupeleka kifungoni na kututwika mzigo uliotulemea viunoni,

¹²ukaleta watu, watukanyage vichwa, tukaingia motoni namo majini, lakini ulitutoa mle, ukatukalisha panapo mema mengi.[#Yes. 43:2.]

¹³Nitakuja, nikupelekee ng'ombe za tambiko Nyumbani mwako, nikulipe hayo, niliyokuapia,

¹⁴midomo yangu ilipofumbuka kwa hivyo, nilivyokuwa nimesongeka; ilikuwa hapo, kilipoyasema kinywa changu.

¹⁵Nitakupelekea ng'ombe za tambiko zenye mafuta pamoja na nyama za kondoo za vukizo; kweli ni ng'ombe na kondoo, nitakaokutengenezea.

¹⁶Njoni, msikilize, nyote mmwogopao Mungu, niwasimulie aliyoifanyizia roho yangu.

¹⁷Nilikifumbua kinywa changu, nikamlalamikia, tena ulimi wangu nao ulikuwa umejitega, upate kumtukuza.

¹⁸Kama ningalikuwa nimeuelekeza moyo wangu kwenye maovu, Bwana angalikataa kunisikia.[#Fano. 28:9; Yoh. 9:31.]

¹⁹Neno hili ni la kweli: Mungu husikia; akaisikiliza nayo sauti ya lalamiko langu.

²⁰Mungu na atukuzwe, maana hakuninyima niliyomwomba, wala hakuninyima upole wake.