Kuomba, Mungu asituache, tutakapokuwa wazee.

¹Wewe Bwana, nimekukimbilia, sitapatwa na soni kale na kale.

²Kwa kuwa u mwongofu, niopoe na kuniponya! Nitegee sikio lako, ukaniokoe!

³Niwie mwamba wenye nguvu, niujie siku zote, maana uliniagia, ya kuwa utaniokoa. Kwani mwamba wangu na boma langu ndiwe wewe.[#Sh. 18:3; 31:3-4.]

⁴Mungu wangu, niponye mikononi mwao wasiokucha! Namo mikononi mwao wapotovu namo mwao wakorofi!

⁵Kwani wewe Bwana Mungu, u kingojeo changu, u kimbilio langu tangu hapo, nilipokuwa mtoto.

⁶Nimejishikiza kwako tangu hapo, nilipozaliwa, wewe ndiwe uliyenitoa tumboni mwa mama yangu; ninakushangilia siku zote.[#Sh. 22:10.]

⁷Kwao wengi ni kama kielekezo, wakiniona, nawe ndiwe kimbilio langu lenye nguvu.[#Sh. 4:4.]

⁸Kinywa changu kinazidi kukushangilia, siku zote huutangaza utukufu wako.

⁹Siku, nitakapokuwa mzee, usinitupe, nguvu yangu itakapoishia, usiniache![#Sh. 71:18.]

¹⁰Kwani wachukivu wangu wamekwisha kusema, nao wanaoingoja roho yangu wamekula njama pamoja:

¹¹Mungu amemwacha; mkimbizeni, mmkamate! Kwani hakuna tena atakayemwopoa.

¹²Wewe Mungu, usiniendee mbali! Mungu wangu, piga mbio, unisaidie!

¹³Sharti wapatwe na soni, sharti waangamie wao waliotakia mabaya roho yangu. Sharti wajifunike kwa kutwezwa wakiumbuka waliotafuta mabaya ya kunifanyizia.

¹⁴Lakini mimi nitangoja siku zote pamoja na kufuliza kukupigia shangwe vivyo hivyo.

¹⁵Kinywa changu kitayasimulia mambo ya wongofu wako na kuutangaza wokovu wako siku zote, kwani sijui kuyahesabu, kama ni mangapi.[#Sh. 40:6; 71:8.]

¹⁶Ninaendelea bado kwa nguvu za Bwana Mungu zilizo kuu, ninayowakumbusha si mengine, ni wongofu wako tu.

¹⁷Mungu, ulinifundisha tangu hapo, nilipokuwa mtoto; kwa hiyo ninayatangaza mataajabu yako.[#1 Sam. 7:12.]

¹⁸Sasa napo hapo, nitakapokuwa mzee mwenye mvi, usiniache, Mungu, niwatangazie vizazi vingi kazi za mkono wako nayo matendo yako yenye nguvu kwao wote watakaokuwapo.[#Sh. 71:9; Yes. 46:4.]

¹⁹Wongofu wako, Mungu, unakua kufika hata mbinguni, wewe ndiwe ufanyaye mambo makuu. Mungu, afananaye na wewe yuko nani?[#2 Mose 15:11.]

²⁰Wewe ulipotuacha, tuliona masongano mengi na mabaya; lakini utaturudisha tena, utupatie uzima, utatutoa huko ndani ya nchi, utuweke juu yake.[#1 Sam. 2:6.]

²¹Ukuu, utakaonipa, utazidi, utakaponigeukia, unitulize moyo.

²²Nami nitakushukuru na kukupigia pango kwa welekevu wako, Mungu wangu, nitakuimbia na kupiga zeze, wewe Mtakatifu wa Isiraeli.

²³Midomo yangu inashangilia, kwa hiyo ninakuimbia, roho yangu inashangilia nayo, kwa maana umeikomboa.

²⁴Nao ulimi wangu unausimulia wongofu wako mchana kutwa, kwani waliotafuta mabaya ya kunifanyizia huiva nyuso kwa soni.