Kuomba lipizi.

¹Bwana uliye Mungu mwenye lipizi, Mungu uliye mwenye lipizi, tokea![#5 Mose 32:35.]

²Wewe uliyeiamulia nchi, inuka! Warudishie wenye majivuno matendo yao![#1 Mose 18:25.]

³Wasiokucha, Bwana, wakubeze mpaka lini? Hao wasiokucha waseme makuu yao mpaka lini?

⁴Wanazidi kusimuliana na kusema makorofi, wote wafanyao maovu hujisemea hivyo.

⁵Walio ukoo wako huwaponda, walio fungu lako huwatesa;

⁶wajane na wageni huwanyonga, wafiwao na wazazi huwaua.

⁷Bwana havitazami! Ndivyo, wanavyosema, Mungu wa Yakobo havitambui![#Sh. 10:11.]

⁸Vitambueni, ninyi msiojua kitu, mlio wa ukoo wetu! Nanyi wajinga, mtaerevuka lini?[#Sh. 92:7.]

⁹Aliyelifanya sikio, asisikie? Aliyeliumba jicho, asione?[#2 Mose 4:11.]

¹⁰Achapuaye wamizimu, asipatilize? Siye yeye afundishaye watu, wapate kujua?

¹¹Lakini Bwana huyatambua mawazo ya watu, ya kuwa hayo ndiyo yaliyo ya bure.[#1 Kor. 3:20.]

¹²Mwenye shangwe ni mtu, umchapuaye, wewe Bwana, na kumfundisha yaliyomo katika Maonyo yako, ayajue.[#Sh. 19:12-14; Iy. 5:17.]

¹³Hivyo atajituliza kwa kuona, siku za wabaya zilivyo, mpaka wasiokucha wachimbiwe mashimo.[#Sh. 37:7.]

¹⁴Kwani Bwana hatawatupa walio ukoo wake, nao walio fungu lake hatawaacha.[#Rom. 11:1-2.]

¹⁵Kwani pako bado, watu wanapoamuliwa kwa wongofu wote wenye mioyo inyokayo watapafuata hapohapo.

¹⁶Yuko nani atakayeinuka kuwa upande wangu, nikipigana nao wabaya? Yuko nani atakayesimama kwangu, nikipigana nao wafanyao maovu?

¹⁷Kama Bwana asingekuwa anisaidiaye, roho yangu ingekuwa imekwisha kulala mahali palipo kimya.[#Sh. 115:17.]

¹⁸Niliposema moyoni: Mguu wangu umejikwaa, ndipo, upole wako, Bwana, uliponishikiza.

¹⁹Mawazo yalipozidi kuwa mengi moyoni mwangu, ndipo, matulizo yako yalipoichangamsha roho yangu.[#2 Kor. 1:4-5.]

²⁰Je? Wewe uko na bia napo panapoamuliwa kwa ukorofi? Maana ndipo panapoleta maumivu kwa kuyapotoa yaliyo ya kweli.

²¹Wao huishambulia roho yake aliye mwongofu, humwaga damu zao wasiokosa.

²²Lakini Bwana ndiye atakayekuwa ngome yangu, yeye Mungu ni mwamba wangu wa kuukimbilia.

²³Atawalipiza mapotovu yao na kuwamaliza kwa ubaya wao, Bwana Mungu wetu atawamaliza kweli.