Ufalme ni wake Mungu.

¹Bwana ni mfalme! Nchi na zishangilie! Navyo visiwa vilivyo vingi na vifurahi![#Sh. 93:1.]

²Mawingu yenye giza yanamzunguka, shikizo la kiti chake cha kifalme ni wongofu unyoshao maamuzi.[#Sh. 89:15.]

³Moto ndio unaomtangulia, nao unawateketeza wabishi wake po pote, walipo.[#Hab. 3:3-6.]

⁴Meme, azipigazo, zinamulika huku nchini, nazo nchi hustuka zikiziona.

⁵Milima inayeyuka kama nta mbele yake Bwana, mbele yake yeye azitawalaye nchi zote.

⁶Mbingu zinautangaza wongofu wake, nayo makabila yote ya watu huuona utukufu wake.[#Sh. 19:2.]

⁷Sharti wapatwe na soni wote watumikiao vinyago, wajivuniao miungu iliyo ya bure; mwangukieni yeye, ninyi miungu yote![#Ebr. 1:6.]

⁸Wasioni wanavisikia na kufurahi, binti Yuda hukupigia vigelegele, Bwana, kwa ajili ya maamuzi yako,[#Fil. 4:4-5.]

⁹Kwani wewe Bwana ndiwe uliye mkuu wa ulimwengu wote, wewe unatukuka sana kuliko miungu yote.[#Sh. 96:4.]

¹⁰Ninyi mmpendao Bwana, yachukieni mabaya! Huzilinda roho zao wamchao yeye, huwaopoa mikononi mwao wasiomcha Mungu.[#Amo. 5:14-15.]

¹¹Mwanga unamzukia aliye mwongofu, nayo furaha inawazukia walionyoka mioyo.[#Sh. 112:4.]

¹²Ninyi waongofu, mfurahieni Bwana, mwakumbushe watu utakatifu wake!