Ufunuo 11

Nyumba ya Mungu inapimwa. Mashahidi wawili.

¹Kisha nikapewa mwanzi uliofanana na fimbo, nikaambiwa: Inuka, ulipime Jumba la Mungu na meza ya Bwana nao wenye kutambikia mlemle![#Ez. 40:3-5; Zak. 2:1-2.]

²Lakini ua ulioko nje penye Jumba la Mungu uuache nje, usiupime! Kwani huo wamizimu wamepewa, waukanyage mji mtakatifu miezi 42.[#Ufu. 11:3; 12:6,14; 13:5; Luk. 21:24.]

³Nami nitawapa mashahidi wangu wawili, wawafumbulie siku 1260 wakiwa wamevaa magunia.[#Ufu. 11:2.]

⁴Hao ndio ile michekele miwili na ile mienge miwili iliyosimama mbele ya Bwana wa nchi.[#Zak. 4:3,11-14.]

⁵Tena mtu akitaka kuwapotoa, hutoka moto vinywani mwao na kuwala hao wachukivu wao. Kila atakaye kuwapotoa sharti auawe hivyo.[#2 Fal. 1:10.]

⁶Hao wanazo nguvu za kuzifunga mbingu, mvua isinye siku za ufumbuaji wao. Tena wanazo nguvu za maji za kuyageuza kuwa damu na za kuipiga nchi mapigo yo yote napo po pote, watakapotaka.[#2 Mose 7:19-20; 1 Fal. 17:1.]

⁷Nao watakapoumalizia ushahidi wao, patatoka nyama mkali kuzimuni, atafanya vita nao, mpaka awashinde, awaue.[#Ufu. 13:1,7; 17:8; Dan. 7:7,21.]

⁸Kisha mizoga yao itakaa katika njia ya mji ule mkubwa unaoitwa kiroho Sodomu na Misri; ndipo, naye Bwana wao alipowambwa msalabani.[#Ufu. 16:19; Yes. 1:9,10; Luk. 13:34.]

⁹Nao watu wa makabila na wa mashina na wa misemo na wa wamizimu wataiona mizoga yao siku tatu na nusu, lakini hawataacha, mizoga yao izikwe kaburini.

¹⁰Kwa hiyo wakaao nchini watashangilia kwa ajili yao na kupiga vigelegele na kupelekeana matunzo, kwa sababu wafumbuaji wale wawili waliwatesa wakaao nchini.

¹¹Lakini siku tatu na nusu zilipopita, roho ya uzima ilitoka kwa Mungu, ikawaingia; ndipo, waliposimama kwa miguu yao, woga mwingi ukawaguia waliowaona.[#Ez. 37:5,10.]

¹²Kisha wakasikia sauti kuu toka mbinguni iliyowaambia: Pandeni huku! Walipopanda mbinguni katika wingu, wachukivu wao walikuwa wanawatazama.[#2 Fal. 2:11.]

¹³Saa ileile pakawa tetemeko kubwa la nchi, nalo fungu la kumi la mji likafudikizwa, watu waliouawa na hilo tetemeko la nchi majina yao yalikuwa 7000. Nao waliosalia wakashikwa na woga, wakamtukuza Mungu wa mbingu.

¹⁴Pigo la pili limekwisha kupita. Tazama, la tatu linakuja upesi.[#Ufu. 9:12; 11:15; 12:12.]

Baragumu la saba.

¹⁵Malaika wa saba alipopiga baragumu, kukawa na sauti kuu nyingi mbinguni zikisema:

Ufalme wa ulimwengu umekwisha kuwa wake

Bwana wetu na wa Kristo wake;

ndiye atakayetawala kale na kale pasipo mwisho.

¹⁶Ndipo, wale wazee 24 waliokaa mbele ya Mungu katika viti vyao vya kifalme walipoanguka nyusoni pao, wakamsujudia Mungu[#Ufu. 4:4,10; 7:11.]

¹⁷na kusema:

Twayavumisha mema yako wewe, Bwana Mungu Mwenyezi,

Ndiwe aliopo naye aliyekuwapo! Umekwisha kuutwaa

ufalme kwa uwezo wako mwingi.

¹⁸Wamizimu walipopatwa

na makali ndipo, makali, yako yalipotokea, ndipo,

siku yako ilipotimia ya kuwahukumu wafu na ya

kuwapokeza watumwa wako walio wafumbuaji nao watakatifu

nao walioliogopa Jina lako, walio wadogo nao walio

wakubwa. Siku imetimia ya kuwaangamiza wenye kuiangamiza nchi.

¹⁹Kisha Jumba la Mungu lililoko mbinguni likafunguliwa, mkaonekana mlemle Jumbani mwa Mungu Sanduku la Agano lake. Kukapiga umeme na uvumi na ngurumo, kukawa na tetemeko la nchi na mvua nyingi sana ya mawe.[#Ufu. 4:5; 15:5.]