Mapato ya anguko lao Waisiraeli.

¹Basi, niseme: Mungu aliwatupa walio ukoo wake? La, sivyo! Kwani hata mimi ni Mwisiraeli, ni wa uzao wake Aburahamu, ni wa shina la Benyamini.[#Sh. 94:14; Yer. 31:37; Fil. 3:5.]

²Mungu hakuwatupa walio ukoo wake,

aliowatambua kale. Au hamyajui, Maandiko yanayoyasema, Elia alipomlalamikia Mungu kwa ajili ya Waisiraeli?

³Akasema:

Bwana, wafumbuaji wako wamewaua,

wakapabomoa pote pa kukutambikia,

nikasalia mimi peke yangu,

tena roho yangu nayo wanaitafuta, waichukue.

⁴Lakini jibu la Mungu linamwambia nini?

Nimejisazia watu 7000 wasiompigia Baali magoti.

⁵Basi, vivyo hata siku hizi za sasa liko sazo lililochaguliwa kupata magawio.[#Rom. 9:27.]

⁶Lakini yakiwa magawio, siyo malipo ya matendo. Kama sivyo, magawio hayangekuwa magawio, kwani kama huko ni kulipa matendo, siko kugawia; kama sivyo, matendo yangekuwa ya bure.

⁷Basi inakuwaje? Waisiraeli waliyoyatafuta, hawakuyafikia, lakini wachaguliwao tu ndio walioyafikia. Lakini wale wengine walishupazwa mioyoni mwao, kama ilivyoandikwa:[#Rom. 9:31.]

⁸Mungu aliwapa roho ya usingizi

na macho yasiyoona na masikio yasiyosikia

mpaka siku hii ya leo.

⁹Naye Dawidi anasema:

Sharti meza zao ziwawie matanzi na mitego,

wanaswe, walipizwe mabaya yao.

¹⁰Macho yao na yatiwe giza, wasione,

migongo yao nayo ipindike siku zao zote!

¹¹Basi, niseme: Walijikwalia, waanguke tu? La, sivyo! Ila maanguko yao yamewaletea wamizimu wokovu, wenyewe wawaonee wivu, wapate kujikaza.[#Rom. 10:19; Tume. 13:46.]

¹²Lakini maanguko yao yakiwa yameuletea ulimwengu mapato mengi, nako kushindwa kwao kukiwa kumewaletea wamizimu mapato mengi, je? Hapo, watakapokuja wote, hayo mapato hayataongezeka sanasana?

Mastaajabu ya njia za Mungu.

¹³Nasema nanyi mlio wamizimu. Mimi kwa hivyo, nilivyo mtume wa wamizimu, na niutukuze utumishi wangu!

¹⁴Hivyo labda nitawatia wivu walio ndugu zangu kimtu, nipate kuwaokoa mmojammoja.[#1 Kor. 9:22; 1 Tim. 4:16.]

¹⁵Kwani hapo walipotupwa waliwapatia wao wa ulimwengu wokovu; basi, hapo watakapopokelewa watawapatia nini, isipokuwa kufufuka na kutoka penye wafu?

¹⁶Tena limbuko likiwa linatakata, limbiko nalo litatakata. Tena shina likiwa limetakata, matawi nayo yatatakata.[#4 Mose 15:20.]

¹⁷Lakini kama yako matawi yaliyovunjwa na kuondolewa, kisha wewe uliye mdanzi tu ukatiwa mahali pao, ukagawiwa fungu lako la shina na utomvu wa ule mchungwa,[#Ef. 2:11-14,19.]

¹⁸usijivune kwao yale matawi! Lakini ukijivuna ujue: si wewe unaolipa shina nguvu, ila shina linakupa nguvu wewe![#Yoh. 4:22.]

¹⁹Labda utasema: Matawi yalivunjiwa mimi, nipate pa kutiwa.

²⁰Ni vizuri; yalivunjika mle, kwa ajili hayakushikamana; wewe nawe ukashinda mle kwa nguvu ya kushikamana. Usijikweze, ila uogope!

²¹Kwani Mungu kama asivyoyaonea uchungu yale matawi yaliyochipukia mlemle, hata wewe hatakuonea uchungu.

²²Basi, humo utazame utu na ukali wake Mungu! Ukali uko kwao walioanguka, lakini kwako wewe uko utu wake Mungu, ukifuliza kuukalia huo utu. Ikiwa sivyo, hata wewe utakatwa.[#Yoh. 15:2,4; Ebr. 3:14.]

²³Nao wale watatiwa tena, wasipofuliza kuukalia ukatavu; maana Mungu yuko na nguvu ya kuwatia mle tena.[#2 Kor. 3:16.]

²⁴Tazama: Wewe ulichipuka katika mdanzi, kisha ukakatwa humo, ukatiwa katika mchungwa usio shina lako; basi, wale waliochipukia mlemle, ni vigumu gani kuwatia tena katika mchungwa wao wenyewe?

²⁵Kwani sitaki, ndugu, mkose kulijua fumbo hili, mkajiwazia wenyewe kuwa wenye akili. Waisiraeli wengine wao wameshupazwa mioyoni, mpaka wingi wa wamizimu utakapokwisha kuingia.[#Luk. 21:24; Yoh. 10:16; 2 Kor. 3:14-16.]

²⁶Hivyo ndivyo, Waisiraeli wote watakavyookoka, kama ilivyoandikwa:

Mle Sioni atatokea mponya;

ndiye atakayemgeuza Yakobo, aache mabezo.

²⁷Nalo hili ni agano, ninalolifanya nao:

Nitayaondoa makosa yao.

²⁸Kwa hivyo, wanavyoukataa Utume mwema, ndio wachukivu kwa ajili yenu; lakini kwa hivyo, walivyochaguliwa, ndio wapendwa kwa ajili ya baba zao.

²⁹Kwani Mungu hayajutii magawio na wito wake.

³⁰Kama ninyi: Kale mlimkataa Mungu, lakini sasa mmehurumiwa kwa ajili ya ukatavu wao hao;

³¹vivyo hivyo hata hao sasa wameikataa ile huruma iliyowatokea, kwamba nao siku ziwafikie, watakapohurumiwa.

³²Kwani Mungu aliwaunga wote pia, wamkatae, apate kuwahurumia wote.[#Gal. 3:22; 1 Tim. 2:4.]

³³*Tazameni, jinsi ujuzi na utambuzi wake Mungu unavyofurika kuwa mwingi! Kweli maamuzi yake hayachunguziki, njia zake nazo hazinyatiliki![#Rom. 9:23; 10:12; Yes. 45:15; 55:8-9.]

³⁴Kwani yuko nani aliyeyatambua mawazo ya Bwana? Au yuko nani aliyekula njama naye?[#Iy. 15:8; Yes. 40:13; Yer. 23:18; 1 Kor. 2:16.]

³⁵Au yuko nani aliyeanza kumpa kitu, apate kulipwa naye?[#Iy. 41:3-11.]

³⁶Kwani yote yalitoka kwake yeye, yakafanywa naye yeye, tena yatarudi kwake yeye. Yeye ndiye atakayetukuzwa kale na kale. Amin.*