Kuutii ukuu.

¹*Kila mtu na autii ukuu! Maana uko na nguvu kumpita yeye. Kwani hakuna ukuu usiotoka kwa Mungu; nao wote ulioko umewekwa na Mungu.[#Fano. 8:15; Yoh. 19:11; Tit. 3:1; 1 Petr. 2:13,17.]

²Kwa hiyo mwenye kuubisha ukuu hulibisha tengenezo lake Mungu. Lakini wabishi watajipatia hukumu.

³Kwani wenye nguvu hawaogopeshi, ukifanya mema, ila ukifanya maovu. Nawe usipotaka kuuogopa ukuu, fanya yaliyo mema! Hivyo utapata kusifiwa nao.[#1 Petr. 2:13-14.]

⁴Kwani ukuu humtumikia Mungu, ukupatie mema. Lakini unapofanya maovu ogopa! maana haushiki upanga bure tu. Kwani humtumikia Mungu, humlipiza kwa ukali kila afanyaye kiovu.[#Sh. 82:6.]

⁵Kwa hiyo inatupasa kutii, si kwa ajili ya ukali tu, ila hata kwa ajili ya mioyo, itung'ae.

⁶Kwa hiyo mnatoa hata kodi, kwani wao ni watumishi wa Mungu wanaoifuliza kazi hiihii tu.

⁷Basi, walipeni wote yawapasayo: Mtoza kodi mpeni kodi yake! Mwenye kuchanga mpeni chango lake! Mwenye kuogopesha mwogopeni! Mwenye kuheshimiwa mheshimuni![#Mat. 22:21.]

Kupendana.

⁸Msiwe wadeni wa mtu ye yote, isipokuwa wa kupendana! Kwani anayempenda mwenziwe ameyatimiza Maonyo.[#Gal. 5:14; 1 Tim. 1:5.]

⁹Kwani kule kwamba:

Usizini! Usiue! Usiibe! Usishuhudie uwongo! Usitamani!

na kama liko agizo jingine, yanaunganika yote katika neno hili:

Umpende mwenzio, kama unavyojipenda mwenyewe!

¹⁰Ukimpenda mwenzio huwezi kumfanyia kiovu. Kwa hiyo kupendana ndiko kuyatimiza Maonyo.*[#1 Kor. 13:4; Mat. 22:40.]

¹¹*Fanyeni hivyo mkizijua siku hizi, kwamba saa imekwisha fika ya kuamka katika usingizi! Maana wokovu wetu sasa uko karibu kuliko siku zile, tulipoanza kumtegemea Bwana.[#Ef. 5:14; 1 Tes. 5:6-7.]

¹²Usiku umefikia kucha, mchana upambazuke: kwa hiyo tuziache kazi za giza, tujivike mata ya mwanga![#Ef. 5:11; 1 Yoh. 2:8.]

¹³Tushike mwenendo upasao mchana! Tusiwe walafi na walevi, wala wagoni na waasherati, wala wagomvi na wenye wivu![#Luk. 21:34; Ef. 5:18.]

¹⁴Ila jivikeni Bwana Yesu Kristo! Itunzeni miili yenu na kuiangalia, isishindwe na tamaa!*[#1 Kor. 9:27; Gal. 3:27.]