Habari ya Febe.

¹Nawaagiziani ndugu yetu Febe aliye mtumishi mke wa wateule wa Kenkerea,

²mmpokee katika Bwana, kama iwapasavyo watakatifu, tena mmsaidie jambo lo lote, atakalopaswa nanyi. Kwani mwenyewe alitunza wengi, hata mimi.

Salamu.

³Nisalimieni Puriska na Akila waliofanya kazi ya Kristo Yesu pamoja nami![#Tume. 18:2,18,26.]

⁴Hao walijitoa wenyewe, wakatwe vichwa, nisiuawe mimi. Mwenye kuwashukuru si mimi peke yangu, ila hata wateule wote walioko kwenye wamizimu.

⁵Nisalimieni hata wateule waliomo nyumbani mwao! Nisalimieni mpenzi wangu Epeneto! Ndiye aliyeanza kumtegemea Kristo katika Asia.[#1 Kor. 16:15,19.]

⁶Nisalimieni Maria aliyetusumbukia sana!

⁷Nisalimieni ndugu zangu Andoroniko na Yunia waliokuwa wamefungwa pamoja nami! Nao ni waelekevu machoni pa mitume, tena walinitangulia kumtegemea Kristo.[#2 Kor. 8:23.]

⁸Nisalimieni Ampuliato aliye mpenzi wangu katika Bwana!

⁹Nisalimieni Urbano, mwenzetu wa kazi katika Kristo, na mpenzi wangu Staki!

¹⁰Nisalimieni Apele aliyejulikana kuwa Mkristo wa kweli! Nisalimieni wale wa Aristobulo!

¹¹Nisalimieni ndugu yangu Herodio! Nisalimieni wale wa Narkiso wanaomkalia Bwana!

¹²Nisalimieni Tirifena na Tirifosa wanaosumbuka kwa ajili ya Bwana! Nisalimieni mpendwa Persisi kwa kuwa mwanamke aliyesumbuka sana kwa ajili ya Bwana!

¹³Nisalimieni Rufo aliyechaguliwa na Bwana, naye mama yake aliye hata mama yangu![#Mar. 15:21.]

¹⁴Nisalimieni Asinkrito na Fulego na Herme na Patiroba na Herma na ndugu walio pamoja nao!

¹⁵Nisalimieni Filologo na Yulia na Neri na dada yake na Olimpa nao watakatifu wote walio pamoja nao!

¹⁶Msalimiane ninyi kwa ninyi na kunoneana, kama watakatifu wanavyozoea! Wateule wote wa Kristo wanawasalimu.[#1 Kor. 16:20.]

Waepukeni wenye matata!

¹⁷Lakini nawahimiza, ndugu, mwakague wenye matata na makwazo! Hawaushiki ufundisho, mliofundishwa, mwaepuke na kuwaacha![#Mat. 7:15; Tit. 3:10.]

¹⁸Kwani watu walio hivyo hawamtumikii Bwana wetu Kristo, ila huyatumikia matumbo yao wenyewe. Nao kwa maneno yao yaliyo mazuri na matamu mno huidanganya mioyo yao wale wasiojua ujanja.[#Ez. 13:18; Fil. 3:19; Kol. 2:4.]

¹⁹Kwani usikivu wenu umejulikana kwa watu wote; hivyo ninawafurahia. Lakini nataka, mwe werevu wa kweli, mambo yenu yawe mema, tena mwe wachanga wasioingia maovu.[#Rom. 1:8; 1 Kor. 14:20.]

²⁰Naye Mungu mwenye utengemano atamponda Satani miguuni penu upesi. Upole wa Bwana wetu Yesu uwakalie ninyi![#Rom. 15:33.]

²¹Wanaowasalimu ninyi ni Timoteo aliye mwenzangu wa kazi na Lukio na Yasoni na Sosipatiro walio ndugu zangu.[#Tume. 16:1-2; 19:22; 20:4; Fil. 2:19.]

²²Mimi Tertio niliyeiandika barua hii nami ninawasalimu ninyi kwa hivyo, ninavyomkalia Bwana.

²³Anawasalimu Gayo aliye mwenyeji wangu mimi na mwenyeji wa wateule wote. Naye Erasto aliye mshika mali za mji na ndugu Kwarto wanawasalimu.[#Tume. 19:22; 1 Kor. 1:14.]

²⁴Upole wa Bwana wetu Yesu Kristo uwakalie ninyi nyote! Amin.

Utukufu wa Mungu.

²⁵Mungu ndiye anayeweza kuwashikiza ninyi kwa nguvu ya Utume mwema wa Yesu Kristo, ninaoutangaza, kwani nimefumbuliwa mambo ya fumbo yasiyosemwa kale na kale.[#Ef. 1:9; 3:5,9.]

²⁶Yayo hayo yamefumbuliwa sasa na Maandiko ya Wafumbuaji kwa agizo lake Mungu, mwenye kuwapo kale na kale, wamizimu wote wafunzwe huo usikivu wa kumtegemea.[#Rom. 1:5; 2 Tim. 1:10.]

²⁷Yeye Mungu aliye peke yake mwenye werevu wa kweli atukuzwe kwa ajili ya Yesu Kristo kale na kale pasipo mwisho! Amin.[#1 Tim. 1:17; Yuda 25.]