Nguvu ya Maonyo.

¹Na niseme nanyi, kwa kuwa mnayatambua Maonyo: Hamjui, ndugu: Maonyo humshika mtu siku zote za maisha yake?

²Kwani mwanamke aliye na mume siku za kuishi kwake mumewe ana mwiko kwa ajili ya Maonyo; lakini nguvu ya hayo Maonyo hukoma, mumewe anapokufa, hana mwiko tena wa mwanamume mwingine.

³Siku za kuishi kwake mumewe, yeye akiwa wa mume mwingine, huitwa mzinzi. Lakini mumewe anapokufa, amefunguliwa na Maonyo, asiwe tena mzinzi akiwa wa mume mwingine.

⁴Ndugu zangu, hapo Kristo alipokufa, mliuawa nanyi, mkayafia Maonyo; kwa hiyo mmefunguliwa nanyi kuwa wa mwingine, maana ni wa yule aliyefufuliwa katika wafu, kusudi tumzalie Mungu matunda.[#Kol. 2:14.]

⁵Kwani hapo, mwenendo wetu ulipokuwa wa kimtu, tamaa mbaya zikatuumiza sana, nazo nguvu zao zikaongezeka tu katika viungo vyetu kwa kukatazwa na Maonyo, tukakizalia kifo matunda.[#Rom. 6:21; 7:7-25.]

⁶Lakini sasa tumefunguliwa, hiyo nguvu ya Maonyo isitushike, tukamfia yule aliyetupinga; hivyo ndivyo, utumikizi wetu ulivyopata kuwa mpya wa kiroho, wa kale uliokuwa wa utumwa wa maandiko ukome.[#Rom. 8:1-2; 6:2,4.]

⁷*Sasa tusemeje? Maonyo hukosesha? La, sivyo! Lakini kosa singelitambua pasipo Maonyo. Kwani hata tamaa singeijua, kama Maonyo yasingesema: Usitamani![#2 Mose 20:17; Yak. 1:14.]

⁸Lakini ukosaji ulianzia hapohapo penye agizo hilo, ukakuza moyoni tamaa yo yote, ukaitia nguvu; kwani pasipo Maonyo ukosaji ni mfu.[#Rom. 5:13; 7:11.]

⁹Nami kale nilikuwa ninaishi pasipo Maonyo; lakini agizo lilipokuja, ukosaji ukafufuka,

¹⁰nami nikafa; hivyo agizo lililotokea, linipe uzima, likaonekana, ya kuwa ni lilo hilo lililoniua.[#3 Mose 18:5; Yak. 1:15.]

¹¹Kwani ukosaji ulianzia hapohapo penye agizo hilo, ukanidanganya, ukaniua kwa hilo agizo.[#1 Mose 3:3-12; Ebr. 3:13.]

¹²Kwa hiyo Maonyo ni matakatifu, nalo agizo ni takatifu lenye wongofu na wema.[#1 Tim. 1:8.]

Utumwa wa ukosaji.

¹³Basi, inakuwaje? Lililo jema ndio lililoniua mimi? La, sivyo! Ila ukosaji ndio ulioniua; lakini kusudi uonekane kuwa ukosaji, ukaniua kwa lile lililo jema; kwa hivyo, ukosaji ulivyolitumia lile agizo, ukatokea wazi kuwa ukosaji wenyewe usiozuilika kabisa.[#Rom. 5:20.]

¹⁴Kwani Maonyo tunayajua, ya kuwa ni ya Kiroho; lakini mimi ni wa kimtu, nikauzwa kuwa mtumwa wa ukosaji.[#Rom. 7:18; Yoh. 3:6.]

¹⁵Kwani siyatambui, ninayoyatenda: kwani ninachokitaka sikifanyi, ila ninachokichukia, ndicho, ninachokifanya.

¹⁶Nami nisichokitaka, ninapokifanya hichohicho, basi, ninayaitikia Maonyo kuwa mazuri.*[#Rom. 7:12.]

¹⁷Sasa si mimi ninayekifanyiza hicho, ila ndio ukosaji unaonikalia moyoni.

¹⁸Kwani najua: Humu ndani yangu, maana mwilini mwangu, hamna chema cho chote; kama ni kutaka, ninako, lakini kama ni kukifanya kilicho kizuri, sinako.[#1 Mose 6:5; 8:21.]

¹⁹Kwani kilicho chema, ninachokitaka, sikifanyi; ila kilicho kiovu, nisichokitaka, ndicho, ninachokifanyiza.

²⁰Lakini mimi nisichokitaka, ninapokifanya hichohicho, basi, si mimi tena ninayekifanya, ila ndio ukosaji unaonikalia moyoni.

²¹Hivyo mimi ninayetaka kukifanya kilicho kizuri, ninaona nguvu ngeni kwangu inayonishurutisha kukifanya kilicho kiovu.

²²Kwani ninayaitikia Maonyo yake Mungu na kuyashangilia huku ndani moyoni.

²³Lakini naona, yamo maonyo mengine viungoni mwangu yanayoyagombeza Maonyo yaliyomo rohoni mwangu, yakaniteka kuwa mtumwa wa maonyo yanayonikosesha, ndiyo yale yaliyomo viungoni mwangu.[#Gal. 5:17.]

²⁴Yamenipata mimi mtu mkiwa! Yuko nani atakayenikomboa utumwani mwa mwili huu wa kufa?

²⁵Mungu atolewe shukrani kwa ajili ya Bwana wetu Yesu Kristo! Basi, kwa akili zangu mimi mwenyewe nayatumikia kitumwa Maonyo yake Mungu, lakini mwilini ni mtumwa wa maonyo ya ukosaji.[#1 Kor. 15:57.]