Waisiraeli wa kweli.

¹Kristo anajua: nasema kweli, sisemi uwongo; hata moyo wangu unaoyajua hunishuhudia katika Roho takatifu,

²ya kuwa masikitiko yangu ni makubwa, nao uchungu haukomi moyoni mwangu.

³Kwa hiyo naliomba mara kwa mara, mimi mwenyewe niapizwe, niondolewe kwake Kristo, kama hivyo vingeweza kuwaponya ndugu zangu, ambao tulizaliwa nao kimtu.[#2 Mose 32:32.]

⁴Kweli ndio Waisiraeli, tena ni wana, hata utukufu wanao, walipewa maagano na maonyo na tambiko lililo la kweli na viagio.[#2 Mose 4:22; 40:34; 5 Mose 7:6; 14:1; 2 Mose 4:22; 40:34.]

⁵Wanao hata baba, namo miongoni mwao ndimo, Kristo alimozaliwa kimtu; huyu ni mkubwa kuwapita wote, ni Mungu, atukuzwe kale na kale! Amin.[#Mat. 1; Luk. 3:23-38; Yoh. 1:1.]

⁶Lakini sisemi hivyo, kwamba Neno lake Mungu limetenguka. Kwani walio kizazi chake Isiraeli sio wote Waisiraeli.[#Rom. 2:28; 4 Mose 23:19.]

⁷Wala walio wa uzao wake Aburahamu sio wote hata watoto. Ila imeandikwa:

Watakaoitwa uzao wako ni wa Isaka tu.

⁸Ni kwamba: Walio watoto wa kimtu hao sio watoto wake Mungu; ila walio watoto wa kiagio huwaziwa kuwa uzao.[#Gal. 4:23.]

⁹Kwani neno la kiagio ni hilo la kwamba:

Nitakapokuja siku zizi hizi za mwaka ujao, ndipo,

Sara atakapokuwa mwenye mtoto wa kiume.

¹⁰Lakini hivyo haikuwa hapo tu, ilikuwa napo hapo, Rebeka alipopata mimba kwake yule mmoja aliye baba yetu Isaka.[#1 Mose 25:21.]

¹¹Kwani hapo, watoto walipokuwa hawajazaliwa, wala hawajafanya mema au maovu, hapo ndipo, Mungu alipowachagulia kwa hivyo, alivyowawekea kale, viwepo.

¹²Vikawapo, si kwa ajili ya matindo yao, ila kwa wito wake yeye. Kwa hivyo Rebeka aliambiwa:

Mkubwa atamtumikia nduguye.

¹³Ndivyo, ilivyoandikwa:

Nilimpenda Yakobo, lakini Esau nilimchukia.

Ukali na upole wa Mungu.

¹⁴Basi, tusemeje? Kwa Mungu uko upotovu? La, sivyo![#5 Mose 32:4.]

¹⁵Kwani anamwambia Mose:

Nitakayemhurumia, nitamhurumia kweli; nitakayemwonea

uchungu, nitamwonea uchungu wa kweli.

¹⁶Kwa hiyo kutaka kwa mtu siko, wala mbio zake sizo, ila Mungu mwenye huruma ndiye yeye tu.[#Ef. 2:8.]

¹⁷Kwani Maandiko yanamsema Farao:

Kwa sababu hiihii nimekuweka, niionyeshe nguvu yangu

kwako wewe, Jina langu lipate kutangazwa katika nchi

zote.

¹⁸Kwa hiyo humhurumia, anayemtaka; tena humshupaza, anayemtaka.[#1 Petr. 2:8-9; 2 Mose 4:21.]

¹⁹Labda utaniambia: Mbona hutukamia? Kwani yuko nani ayapingaye mapenzi yake?

²⁰Mwenzangu, u mtu gani ukitaka kubishana na Mungu? Je? Kiko chombo kitakachomwambia muumbaji: Mbona umenifanya hivi?[#Yes. 45:9.]

²¹Mfinyanzi haufanyishi udongo, kama anavyotaka? Donge lililo moja upande mmoja haliumbi kuwa chombo kizuri, nao upande mwingine kuwa kibaya?

²²Inakuwaje? Ni kweli, Mungu anataka kuyaonyesha makali yake, tena anataka kuutambulisha uwezo wake, lakini kwa uvumilivu wake mwingi aliwavumilia walio vyombo vitakavyo makali tu, vilivyotengenezwa, viangamie tu.[#Rom. 2:4.]

²³Kisha anataka kuutambulisha hata wingi wa utukufu wake kwao walio vyombo vitakavyo huruma, ndio, aliowapatia utukufu kale;[#Rom. 8:29; Ef. 1:3-12.]

²⁴nao ndio, aliowaita kwenye Wayuda nako kwenye wamizimu, nasi tumo.

²⁵Ndivyo, anavyosema hata kinywani mwa Hosea:

Aliitwa: Si ukoo wangu nitamwita: Ukoo wangu,

naye asiyependwa nitamwita Mpendwa.

²⁶Itakuwa hapo, hao wanaoambiwa sasa: Ninyi ham ukoo wangu,

waambiwe: M wanawe Mungu aliye Mwenye uzima.

²⁷Naye Yesaya anawasemea Waisiraeli na kupaza sauti:

Wana wa Waisiraeli ijapo wawe wengi kama mchanga wa

ufukoni,

watakaookoka watakuwa sao tu.

²⁸Kwani Bwana ndiye atakayevimaliza,

atakapolitimiza Neno lake nchini kwa kulikata.

²⁹Navyo ndivyo, Yesaya alivyosema kale:

Bwana Mwenye vikosi kama asingalitusazia uzao,

tungalikuwa kama Sodomu, tungalifanana na Gomora.

³⁰Basi, tusemeje? Ni hivi: Wamizimu wasiofuata wongofu wamepata wongofu; ni wongofu ule unaopatikana kwa kumtegemea Mungu.[#Rom. 10:20.]

³¹Lakini Waisiraeli walioyafuata Maonyo yenye wongufu hawakuyafikia hayo Maonyo.[#Rom. 10:2-3.]

³²Kwa sababu gani? Kwa sababu walikataa kumtegemea Mungu, wakafanya mambo yao tu. Wakajigonga katika lile jiwe la kujigongea,

³³kama ilivyoandikwa:

Tazama, naweka humo Sioni jiwe la kujigongea

na mwamba wa kujikwalia.

Naye alitegemeaye hatatwezeka.