Ruti analifuata shauri la Naomi.

¹Naomi akamwambia mkwewe: Mwanangu, hainipasi kukutafutia mahali pa kutulia patakapokufaa?[#Ruti 1:9.]

²Tena Boazi siye ndugu yetu? ni yule, ambaye ulikuwa na vijakazi wake. Tazama, usiku wa leo Boazi anayapura mawele pake pa kupuria.

³Nenda koga na kujipaka mafuta, kisha vaa nguo zako nzuri, uende kushukia hapo pa kupuria, lakini uangalie, usijulikane kwake yule mtu, mpaka atakapokwisha kula na kunywa!

⁴Akienda kulala, upajue, atakapolala. Kisha uingie, uifunue miguu yake, upate kulala nawe; ndipo, atakapokuambia la kufanya wewe.

⁵Akamjibu: Yote, uliyoniambia, nitayafanya.

⁶Akashukia hapo pa kupuria, akayafanya yote, mkwewe aliyomwagiza.

⁷Boazi akala, akanywa, moyo wake ukachangamka, kisha akaenda kulala nyuma ya chungu la miganda. Ndipo, alipokwenda hapo polepole, akaifunua miguu yake, akalala naye.

⁸Ilipokuwa usiku wa manane, yule mtu akakupuka usingizini, akajiinua, mara akamwona mwanamke aliyelala miguuni pake.

⁹Akamwuliza: Wewe nani? Akasema: Mimi ni kijakazi wako Ruti; nawe umtandazie kijakazi wako pembe la blanketi lako! Kwani wewe ndiwe mwingiliaji.[#5 Mose 25:5; Ez. 16:8.]

¹⁰Akamjibu: Na ubarikiwe na Bwana, mwanangu! Haya mema yako ya nyuma, uliyoyafanya, yanayapita ya kwanza kwa wema, usipowafuata vijana, kama ni maskini au kama ni wenye mali.[#Ruti 2:11.]

¹¹Sasa mwanangu, usiogope! Yote, utakayoniambia, nitakufanyizia; kwani watu wangu wote waliomo malangoni mwangu wanakujua wewe kuwa mwanamke mwema sana.

¹²Sasa hii ni kweli, mimi ni mwingiliaji; lakini yuko mwingiliaji mwenzangu anayepaswa nanyi kuliko mimi.

¹³Usiku huu lala hapa! Kesho asubuhi itajulikana: akiwa anataka kukuingilia, basi, ni vema, na akuingilie! Lakini akiwa hataki kukuingilia, mimi nitakuingilia kwa hivyo, Bwana alivyo Mwenye uzima! Lala tu, mpaka kuche!

¹⁴Akalala miguuni pake, hata kulipokucha; akaamka hapo, mtu asipoweza bado kumtambua mwenzake; Boazi akamwambia: Isijulikane, ya kuwa mwanamke amefika hapa pa kupuria!

¹⁵Akasema: Lete kanga, uliyojifunika, uishike! Akaishika, akampimia pishi sita za mawele, akamtwika, kisha akaenda zake mjini.

¹⁶Ruti alipoingia kwa mkwewe, akamwuliza: Habari gani, wewe mwanangu? Akamsimulia yote, yule mtu aliyomfanyizia.

¹⁷Kisha akasema: Amenipa hizi pishi sita za mawele, kwani aliniambia: Usiende mikono mitupu kwa mkweo.

¹⁸Naye akamwambia: Kaa tu, mwanangu, mpaka utakapolijua hilo jambo, litakavyoendelea. Kwani yule mtu hatatulia, asipolimaliza leo hilo jambo.