Waisiraeli wataokolewa katika nguvu zao waliowashinda.

¹Mwombeni Bwana mvua siku za vuli!

Bwana ndiye afanye mawingu yenye umeme;

naye ndiye anayewapa matone ya mvua,

majani yote ya shambani yaipate.

²Kwani vinyago husema yasiyo na maana,

nao waaguaji huona yaliyo uwongo,

husema ndoto zisizo za kweli,

wakituliza mioyo, ni bure;

kwa hiyo watu hujiendea kama kondoo,

huteseka, kwani hakuna awachungaye.

³Wachungaji ndio, makali yangu yanaowawakia moto,

nao viongozi ndio, nitakaowapatiliza;

kwani Bwana Mwenye vikosi amelikagua kundi lake,

ndio mlango wa Yuda,

nao ndio atakaowageuza,

wawe kama farasi mwenye utukufu wake katika mapigano.

⁴Kwao ndiko, kutakakotoka jiwe la pembeni,

hata uwambo wa hema,

hata upindi wa kupigania,

kweli kwao ndiko, watakakotokea wote pia waongozao vikosi.

⁵Nao watakuwa kama mafundi wa vita,

wawakanyagao adui matopeni barabarani kwenye mapigano;

watakapopigana, Bwana atakuwa nao,

wawatweze waliopanda farasi.

⁶Nitawatia nguvu walio mlango wa Yuda,

nao walio mlango wa Yosefu nitawaokoa,

nitawarudisha kwao, kwani nitawahurumia,

nao watakuwa kama watu, nisiowatupa

kwani mimi Bwana ni Mungu wao, nami nitawaitikia.

⁷Nao Waefuraimu watakuwa kama mafundi wa vita,

nayo mioyo yao itafurahiwa kama yao waliokunywa mvinyo;

wana wao watakapoyaona, watafurahi,

nayo mioyo yao itashangilia kwa kuwa na Bwana.

⁸Nitawakusanya na kuwapigia miluzi, kwani nitawakomboa;

nao watakuwa wengi, kama walivyokuwa wengi kale.

⁹Nimewatawanya katika makabila mengine,

lakini huko mbali nako watanikumbuka;

kwa hiyo watapona pamoja na wana wao, wapate kurudi kwao.

¹⁰Nami nitawarudisha kwao na kuwatoa katika nchi ya Misri,

nitawakusanya na kuwatoa katika nchi ya Asuri,

niwapeleke katika nchi ya Gileadi na ya Libanoni,

lakini huko nako hawataenea wote.

¹¹Watakapopita baharini penye masongano, atayapiga mawimbi pale baharini;

ndipo, mafuriko ya maji ya jito la Nili yatakapokupwa yote,

nayo majivuno ya Asuri yatanyenyekezwa,

nayo bakora ya kifalme ya Misri haitakuwa na budi kutoweka.

¹²Nami nitawatia nguvu za kuwa na Bwana,

wafanye mwenendo wao katika Jina lake;

ndivyo, asemavyo Bwana.