Magari manne.

¹Nilipoyainua macho yangu tena, nichungulie, mara nikaona magari manne yaliyotoka katikati ya milima miwili, nayo milima hiyo ilikuwa ya shaba.[#Zak. 1:8; Ufu. 6:2-8.]

²Gari la kwanza lilikuwa na farasi wekundu, gari la pili lilikuwa na farasi weusi,

³gari la tatu lilikuwa na farasi weupe, gari la nne lilikuwa na farasi wenye nguvu, miili yao ilikuwa ya madoadoa.

⁴Nikaanza kusema na kumwuliza malaika aliyesema na mimi: Hao maana yao nini, Bwana wangu?

⁵Malaika akajibu, akaniambia: Hawa ndio pepo nne za mbinguni zinazotaka kutoka sasa kwa kuwa zimekwisha kusimama kwake Bwana wa nchi hii yote nzima.[#Zak. 4:14.]

⁶Gari lenye farasi weusi linatoka kwenda katika nchi ya kaskazini, nao weupe wanalifuata. Wale wenye miili ya madoadoa wanatoka kwenda katika nchi ya kusini.

⁷Nao wenye nguvu wanatoka kujitafutia mahali pa kwendea, wapate kutembea katika nchi. Alipowaambia: Haya! Nendeni katika nchi! ndipo, walipokwenda kutembea katika nchi.[#Zak. 1:10.]

⁸Kisha akapaza sauti na kuniita, akaniambia kwamba: Tazama, hawa wanaotoka kwenda katika nchi ya kaskazini wataituliza roho yangu katika nchi ya kaskazini.

Kiagio cha Masiya.

⁹Neno la Bwana likanijia la kwamba:

¹⁰Watoze tunzo waliotekwa na kuhamishwa, akina Heldai na Tobia na Yedaya, ukija wewe mwenyewe siku hiyo kuingia nyumbani mwa Yosia, mwana wa Sefania, walimofikia walipotoka Babeli!

¹¹Tunzo utakalowatoza ni fedha na dhahabu; kisha fanya taji, kamvike mtambikaji mkuu Yosua, mwana wa Yosadaki, kichwani!

¹²Umwambie kwamba: Hivi ndivyo, Bwana Mwenye vikosi anavyosema kwamba: Tazama, yuko mtu atakayekuja, jina lake Chipukizi, maana atachipukia mahali pake; ndiye atakayelijenga Jumba la Bwana.[#Zak. 3:8.]

¹³Kweli yeye ndiye atakayelijenga Jumba la Bwana na kujipatia utukufu; atakaa katika kiti chake cha kifalme na kutawala, tena atakuwa mtambikaji katika kiti chake cha kifalme, nalo shauri, hao wawili watakalolipiga, litakuwa la mapatano.[#Sh. 110:4.]

¹⁴Nazo hizo taji na zikae katika Jumba la Bwana kuwa ukumbusho wa Helemu na wa Tobia na wa Yedaya na wa Heni, mwana wa Sefania.

¹⁵Nao walioko mbali watakuja kusaidia kulijenga Jumba la Bwana. Ndipo, mtakapojua, ya kuwa Bwana Mwenye vikosi amenituma kwenu. Haya yatatimia, mkiisikia sauti ya Bwana Mungu wenu na kuitii.