Wamizimu watanyenyekezwa.

¹Hili ndilo tamko zito la Bwana.

linaionya nchi ya Hadiraki na mji wa Damasko, lipate kutua humo, kwani Bwana ndiye, watu wanayemwelekezea macho

pamoja na koo zote za Isiraeli.

²Linaionya nchi ya Hamati inayopakana nao, hata Tiro na Sidoni,

kwani ni yenye werevu mwingi ulio wa kweli:

³Watiro walijijengea boma, wakalimbika fedha, kama ni mavumbi,

na dhahabu tupu kama ni taka za barabarani.

⁴Lakini mtaona, Bwana akiuteka,

azibwage mali zake pamoja na vikosi vyake baharini,

lakini wenyewe utateketezwa kwa moto.

⁵Askaloni utakapoyaona, utashikwa na woga;

nao Gaza utatetemeka sana, Ekroni nao,

kwa kuwa mji huo, walioungojea, utakuwa umewatia soni;

namo Gaza mfalme atatoweka namo Askaloni hawatakaa watu tena.

⁶Asdodi watakaa wana wa ugoni,

lakini nitayakomesha majivuno ya Wafilisti.

⁷Tena nitaziondoa nyama zao zenye damu vinywani mwao,

navyo vyakula vyao vitapishavyo nitaviondoa katika meno yao;

ndipo, nao walio masao yao watakapomjua Mungu wetu,

wawe kama mkuu kwao Wayuda, nao Waekroni wawe kama Wayebusi.

⁸*Kisha nitapiga kambi, iwe kilindo cha Nyumba yangu,

pasipite mtu kwenda na kurudi,

wala pasipite kwao tena mtesaji,

kwani tangu hapo nitawaangalia kwa macho yangu,

Kiagio cha Masiya

⁹Piga vigelegele sana, binti Sioni!

Shangilia, binti Yerusalemu!

Tazama, mfalme wako anakujia!

Ni mwongofu na mwokozi, tena ni mnyenyekevu,

amepanda punda aliye mwana bado

wa kuwa na mama yake.

¹⁰Ndipo, nitakapoyatowesha magari kule Efuraimu,

nao farasi mle Yerusalemu,

nazo pindi za vita zitatoweshwa,

nao wamizimu atawafundisha kutengemana;

ufalme wake utaanzia baharini, uifikie bahari ya pili,

tena uanzie penye jito kubwa, uyafikie mapeo ya nchi.

¹¹Wafungwa wako wewe nitawakomboa kwa ajili ya damu ya agano lako,

niwatoe shimoni msimo na maji.

¹²Rudini ngomeni, ninyi wafungwa mliokishika kingojeo chenu!

Leo hivi nawaambia: Nitakurudishia mara mbili yaliyokuwa yako.*

¹³Kwani Wayuda ninawatumia kuwa upindi wangu,

nao Waefuraimu kuwa mishale;

kisha nitawaamsha wanao, Sioni, wawaendee wana wako, Ugriki;

ndipo, nitakapokugeuza kuwa kama upanga wa fundi wa vita

¹⁴Naye Bwana ataoneka kwao, mshale wake utokee kama umeme;

kisha Bwana Mungu atapiga baragumu

akija katika pepo kali za nchi ya kusini.

¹⁵Bwana Mwenye vikosi atawakingia kwa ngao yake,

waje kuwala wakiyakanyaga mawe ya makombeo,

watakunywa damu zao wakipiga makelele kama wanaokunywa mvinyo;

hivyo watajaa kama mabakuli

yachukuayo damu za ng'ombe za tambiko,

hivyo wenyewe watakuwa kama pembe za meza ya kutambikia.

¹⁶Ndivyo, Bwana Mungu wao atakavyowaokoa siku hiyo,

kwa kuwa ndio kundi lao walio ukoo wake,

tena ndio vito vya taji vinavyometameta katika nchi yake.

¹⁷Tazameni, wema wao na uzuri wao ulivyokuwa mwingi!

Ngano hukuza vijana wa kiume nazo pombe mbichi vijana wa kike.