¹Ee Bwana Mwenyezi, MUNGU wa Israeli; moyo uliotaabika, roho iliyolegea, inakulilia.

²Sikia, Ee BWANA, na kuturehemu, kwa kuwa ndiwe BWANA mwenye rehema; naam, uturehemu sisi, kwa kuwa tumetenda dhambi mbele yako.

³Wewe umeketi hali ya mfalme milele, na sisi tunapotea kila siku.

⁴Ee Bwana Mwenyezi, MUNGU wa Israeli, yasikilize sasa maombi ya Waisraeli na ya wana wa wale waliotenda dhambi mbele yako, wasioisikiliza sauti yako Wewe Mungu wao, na kwa sababu hiyo mapigo haya yametushika.

⁵Usiyakumbuke maovu ya baba zetu, bali ukumbuke sasa uweza wako na jina lako.

⁶Maana Wewe ndiwe Bwana MUNGU wetu, nasi tutakuhimidi Wewe, Ee BWANA.

⁷Ndiyo sababu umetutia kicho chako mioyoni, ili tupate kuliitia jina lako. Nasi tutakuhimidi katika uhamisho wetu, kwa kuwa tunaukumbuka uovu wote wa baba zetu waliokutenda dhambi.

⁸Tazama, tumo utumwani hata leo huku ulikotutawanya, kuwa lawama na laana, na chini ya hukumu, kwa ajili ya uovu wa baba zetu waliomwasi Bwana MUNGU wetu.

HEKIMA, THAWABU YA PEKEE YA ISRAELI

Kusifu hekima

⁹Sikia, Ee Israeli, amri za uzima,[#Mit 4:20-22]

Tega sikio lako kujua hekima.

¹⁰Imekuwaje, Ee Israeli,

Uko katika nchi ya adui zako,

Ukizeeka katika nchi ya kigeni?

¹¹Umetiwa najisi na wafu,

Umehesabiwa nao washukao shimoni?

¹²Umeiacha chemchemi ya uzima.

¹³Maana kama ungaliifuata njia ya Mungu

Ungalikaa kwa amani siku zote.

¹⁴Itafute hekima ilipo, na nguvu, na maarifa,

Ili ujue ulipo wingi wa siku, na uzima.

Ilipo nuru ya macho na amani.

¹⁵Ni nani aliyeona mahali pake?[#Ayu 28:12,20]

Na kuingia katika ghala zake?

¹⁶Wako wapi wakuu wa mataifa,

Nao waliotumikisha wanyama wa nchi

¹⁷Na kucheza na ndege za angani?

Wao walioweka akiba ya fedha na dhahabu

Ambayo wanadamu huitumainia

Wala hawaishi kuitafuta?

¹⁸Wao waliotafuta fedha kwa uangalifu mwingi,

Ambao kazi zao hazitafutikani,

¹⁹Wametoweka na kushuka kaburini,

Na wengine wameinuka mahali pao.

²⁰Wadogo wao waneona nuru

Na kukaa katika nchi.

Lakini njia ya hekima hawakuijua

²¹Wala kuyafahamu mapito yake.

Watoto wao nao hawakuishika,

Wako mbali na njia yake.

²²Haikujulikana huko Kanaani,

Wala kuonekana katika Temani.

²³Wana wa Agari, watafutao maarifa duniani,

Wachuuzi wa Midiani na Tema,

Watungaji wa hadithi na wachunguzi wa elimu

Katika hao wote hakuna aliyeitambua njia ya hekima,

Wala kuyakumbuka mapito yake.

²⁴Ee Israeli, jinsi ilivyo kuu nyumba ya Mungu,

Na jinsi inavyoenea milki yake!

²⁵Ni kubwa, haina mpaka;

juu, haipimiki.

²⁶Huko walizaliwa mashujaa waliosifiwa zamani,[#Mwa 6:4; Hek 14:6]

Warefu mno, hodari wa vita.

²⁷Mungu hakuwachagua hao,

Wala kuwapa hao njia ya maarifa.

²⁸Kwa hiyo walipotea kwa kukosa hekima,

Walipotea kwa ujinga wao wenyewe.

²⁹Ni nani aliyepanda mbinguni na kuishika,

Na kuishusha kutoka mawinguni?

³⁰Ni nani aliyevuka bahari kuitafuta

Na kuipata kwa dhahabu safi?

³¹Hakuna aijuaye njia yake

Wala kuyafahamu mapito yake.

³²Lakini Yeye ajuaye yote anaijua,

Aliitambua kwa ufahamu wake.

Yeye aliyeweka dunia milele

Na kuijaza wanyama wenye miguu minne.

³³Yeye aitumaye nuru ikaenda,

Akaiita ikamtii kwa kicho.

³⁴Nyota zikang'aa katika majira yake zikafurahi.

³⁵Alipoziita zilisema, Tupo hapa!

Na kwa furaha zikamng'aria Muumba wao.

³⁶Huyu ndiye Mungu wetu, wala hakuna afananaye naye.

³⁷Ameivumbua njia yote ya hekima

Akampa Yakobo mtumishi wake na Israeli mpendwa wake.

³⁸Baadaye hekima ikaonekana duniani

Ikakaa na watu.