¹Hiki ni kitabu cha amri za Mungu[#Sira 24:23]

Na sheria idumuyo milele.

Wote waishikao wataona uzima,

Lakini waiachao watakufa.

²Rudi, Ee Yakobo, uishike;

uiendee nuru yake katika mwangaza wake.

³Usimpe mwingine utukufu wako,

Wala mataifa ya kigeni mafaa yako.

⁴Ee Israeli, tu heri sisi,

Maana mambo yampendezayo Mungu yamejulishwa kwetu.

MAOMBOLEZO NA MATUMAINI YA YERUSALEMU

Waisraeli watiwa moyo

⁵Jipeni moyo, watu wangu, Israeli mnaokumbukwa!

⁶Mliuzwa kwa mataifa, lakini hamkuangamia.

Kwa kuwa mlimtia Mungu ghadhabu

Mlitolewa kwa adui zenu.

⁷Mlimwasi Yeye aliyewaumba,

Mkitoa sadaka kwa pepo, si kwa Mungu.

⁸Mlimsahau Mungu wa milele aliyewalea,

Na Yerusalemu, mama yenu.

⁹Huyu mama aliiona ghadhabu ya Mungu

Iliyokuja juu yenu, akasema,

Enyi wa Sayuni, sikilizeni!

Mungu ameleta juu yangu huzuni kubwa.

¹⁰Nimeuona utumwa wa wanangu

Ambao Aliye wa Milele amewapatiliza.

¹¹Kwa furaha niliwalea;

bali kwa kilio na maombolezo niliwaaga.

¹²Asisimange juu yangu mtu yeyote,

Mimi niliye mjane na kuachwa na watu.

Kwa sababu ya dhambi za wanangu nimeachwa ukiwa,

Kwa kuwa walikengeuka na kuiacha sheria ya Mungu.

¹³Hawakujali maagizo yake,

Wala kwenda katika njia za amri zake,

Wala kukanyaga njia za utii katika haki yake.

¹⁴Wakaao pande za Sayuni na waje,

Waukumbuke utumwa wa wana wangu na binti zangu

Ambao Aliye wa milele amewapatiliza.

¹⁵Maana ameleta juu yao taifa kutoka mbali,

Taifa lisilo na haya, lenye lugha ya kigeni,

Lisilojali mzee wala kuhurumia mtoto.

¹⁶Nao wamewahamisha mbali wana wapendwa wa mjane,

Na kumwacha pekee, amefiwa na binti zake.

¹⁷Nami nawezaje kuwasaidieni?

¹⁸Yeye aliyeyaleta mapigo haya juu yenu

Atawaponya mikononi mwa adui zenu.

¹⁹Nendeni zenu, wanangu, nendeni zenu;

nami nimeachwa ukiwa.

²⁰Nimevua mavazi ya amani

Na kuvaa gunia la maombi yangu.

Nitamlilia Aliye wa Milele

Siku zangu zote.

²¹Jipeni moyo, wanangu, mlilieni Mungu,

Naye atawaponya katika nguvu na mkono wa adui.

²²Maana nimemtumaini Aliye wa Milele awaokoe,

Na furaha imenijia kutoka kwake Aliye Mtakatifu.

Kwa sababu ya rehema itakayowajia upesi

Kutoka kwake Mwokozi wenu wa milele.

²³Mimi niliwatoa kwa huzuni na kulia,

Lakini Mungu atawarejeza kwangu

Kwa furaha na shangwe hata milele.

²⁴Kama wakaa Sayuni walivyouona utumwa wenu wa sasa,

Ndivyo watakavyouona upesi wokovu wenu

Utokao kwa Mungu wenu,

Utakaowajia kwa utukufu mwingi

Na mwangaza wake Aliye wa Milele.

²⁵Wanangu, istahimili kwa saburi

Ghadhabu ya Mungu iliyowapata.

Adui zenu wamewatesa.

Lakini mtaona upesi maangamizo yao,

Na kuwakanyaga shingo.

²⁶Wanangu wasio na nguvu wamepitia njia za kukwaruza,

Wakichukuliwa kama kondoo waliotekwa na adui.

²⁷Jipeni moyo, wanangu, mlilieni Mungu!

Maana Yeye aliyewapatiliza mambo haya atawakumbuka.

²⁸Kama ilivyokuwa nia yenu kumwasi Mungu,

Rudini sasa, mtafuteni mara kumi zaidi.

²⁹Maana Yeye aliyeyaleta mapigo haya juu yenu

Atawarudishia furaha ya milele pamoja na wokovu wenu.

Yerusalemu yahakikishiwa msaada

³⁰Jipe moyo, Ee Yerusalemu!

Yeye aliyekuita kwa jina lako atakufariji.

³¹Ole wao waliokutesa

Na kuyafurahia maangamizo yako!

³²Ole wa mji uliowatumikisha watoto wako!

Ole wake yeye aliyewachukua wana wako!

³³Maana kama alivyokusimanga katika maanguko yako

Na kuufurahia uharibifu wako,

Ndivyo atakavyouhuzunikia ukiwa wake mwenyewe.

³⁴Nitaondoa majisifu yake juu ya wingi wa watu wake,

Na majivuno yake yatageuka kuwa kilio,

³⁵Kwa kuwa moto utamshukia kutoka kwake Aliye wa Milele,

Nao utadumu sana.

Naye atakaliwa na majini

muda wa siku nyingi.

³⁶Ee Yerusalemu, tazama upande wa mashariki,

Uione furaha inayokujia kutoka kwa Mungu.

³⁷Angalia! Wana wako wanakuja uliowaaga,

Wanajikusanya toka mashariki hata magharibi

Kwa neno lake Yeye Aliye Mtakatifu,

Wakiufurahia utukufu wa Mungu.