Isaka na Abimeleki

¹Ikawa njaa katika nchi hiyo, mbali na njaa ile ya kwanza iliyokuwa siku za Abrahamu. Isaka akamwendea Abimeleki, mfalme wa Wafilisti, huko Gerari.[#Mwa 12:10; 20:2]

²BWANA akamtokea, akasema, Usishuke kwenda Misri, kaa katika nchi nitakayokuambia.[#Mwa 12:1; Zab 37:3]

³Kaa ugenini katika nchi hiyo, nami nitakuwa pamoja nawe, na kukubariki, maana nitakupa wewe na uzao wako nchi hizi zote. Nami nitakifanya imara kiapo nilichomwapia Abrahamu baba yako.[#Mwa 22:16-18; Mwa 20:1; 28:15; Zab 39:12; Ebr 11:9; Mwa 12:2; 13:15; Zab 105:9]

⁴Nitazidisha uzao wako kama nyota za mbinguni, nami nitawapa uzao wako nchi hizi zote, na katika uzao wako mataifa yote ya dunia watajibarikia.[#Zab 72:17]

⁵Kwa sababu Abrahamu alisikia sauti yangu, akayahifadhi maagizo yangu, na amri zangu, na hukumu zangu, na sheria zangu.[#Mwa 22:16]

⁶Isaka akakaa katika Gerari.

⁷Watu wa mahali hapo wakamwuliza habari za mkewe. Akasema, Ni dada yangu huyu maana aliogopa kusema, Ni mke wangu, watu wa nchi wasije wakamwua kwa ajili ya Rebeka; kwa maana alikuwa mzuri wa uso.[#Mwa 12:13; 20:2; 24:16; Mit 29:25]

⁸Ikawa alipokuwa amekaa huko siku nyingi, Abimeleki, mfalme wa Wafilisti, akachungulia dirishani, akamwona Isaka anachezacheza na Rebeka mkewe.

⁹Abimeleki akamwita Isaka, akasema, Yakini huyu ni mkeo, mbona ulisema, Ni dada yangu huyu? Isaka akamwambia, Kwa sababu nilisema, Nisife kwa ajili yake.

¹⁰Abimeleki akasema, Ni nini hii uliyotutendea? Labda mtu mmojawapo angalilala na mkeo bila kufikiri, nawe ungalitutia hatiani.[#Mwa 20:9]

¹¹Basi Abimeleki akawaamuru watu wote, akisema, Amgusaye mtu huyu au mkewe lazima atauawa.[#Zab 105:15]

¹²Mwaka huo Isaka akapanda mbegu katika nchi ile, naye akapata mavuno mara mia zaidi. BWANA akambariki.[#Mt 13:8; Mk 4:8; Ayu 42:12; Mt 6:33]

¹³Na mtu huyu akawa mkuu, akazidi kusitawi, hata akawa mkuu sana.[#Mit 10:22]

¹⁴Akawa na mali ya kondoo, na mali ya ng'ombe, na watumwa wengi. Hao Wafilisti wakamhusudu.[#Mwa 37:11; Mhu 4:4]

¹⁵Na vile visima vyote walivyochimba watumwa wa baba yake, siku za Abrahamu babaye, Wafilisti walikuwa wamevifukia, wakavijaza udongo.[#Mwa 21:30]

¹⁶Abimeleki akamwambia Isaka, Utoke kwetu, maana wewe una nguvu sana kuliko sisi.[#Kut 1:9]

¹⁷Basi Isaka akatoka huko akapiga kambi katika bonde la Gerari, akakaa huko.

¹⁸Isaka akarudi akavichimbua vile visima vya maji walivyovichimba siku za Abrahamu babaye; maana wale Wafilisti walikuwa wamevifukia baada ya kufa kwake Abrahamu; naye akaviita majina kufuata majina aliyoviita babaye.[#Mwa 21:31]

¹⁹Watumwa wa Isaka wakachimba katika lile bonde, wakapata kisima cha maji yanayobubujika.

²⁰Wachungaji wa Gerari wakagombana na wachungaji wa Isaka wakisema, Maji haya ni yetu. Ndipo akakiita jina la kile kisima Eseki, kwa sababu waligombana naye.[#Mwa 21:25]

²¹Wakachimba kisima kingine, wakagombania na hicho tena. Akakiita jina lake Sitna.

²²Akaondoka huko akachimba kisima kingine, wala hicho hawakukigombania. Akakiita jina lake Rehobothi, akasema, Kwa kuwa sasa BWANA ametufanyia nafasi, nasi tutazidi katika nchi.[#Mwa 17:6; Kut 1:7]

²³Akapanda kutoka hapo mpaka Beer-sheba.

²⁴BWANA akamtokea usiku uleule, akasema, Mimi ni Mungu wa Abrahamu baba yako, usiogope, maana mimi ni pamoja nawe, nami nitakubariki, na kuzidisha uzao wako kwa ajili ya Abrahamu mtumishi wangu.[#Mwa 15:1; 24:12; 26:3; Kut 3:6; Mdo 7:32; Rum 8:31]

²⁵Akajenga madhabahu huko, akaliitia jina la BWANA. Akapiga hema yake huko, na watumwa wa Isaka wakachimba kisima huko.[#Mwa 12:7; 13:18; Zab 116:17]

²⁶Ndipo Abimeleki akamwendea kutoka Gerari, pamoja na Ahuzathi rafiki yake, na Fikoli, jemadari wa jeshi lake.[#Mwa 21:22]

²⁷Isaka akawauliza, Mbona mwanijia, nanyi mmenichukia, mkanifukuza kwenu?[#Amu 11:7]

²⁸Wakasema, Hakika tuliona ya kwamba BWANA alikuwa pamoja nawe; nasi tukasema, Na tuapiane, sisi na wewe, na kufanya mapatano nawe[#Mwa 21:22,23]

²⁹ya kuwa hutatutenda mabaya, iwapo sisi hatukukugusa wewe, wala hatukukutendea ila mema, tukakuacha uende zako kwa amani; nawe sasa u mbarikiwa wa BWANA.[#Mwa 24:31; Zab 115:15]

³⁰Basi akawafanyia karamu, nao wakala, wakanywa.[#Mwa 19:3]

³¹Wakaondoka asubuhi na mapema, wakaapiana wao kwa wao, kisha Isaka akawapa ruhusa, nao wakaenda zao kwa amani.[#Mwa 21:31]

³²Ikawa siku ileile, watumwa wa Isaka wakaja wakampasha habari za kile kisima walichokuwa wamekichimba, wakamwambia, Tumeona maji.

³³Naye akakiita jina lake Shiba; kwa hiyo jina la mji huo ni Beer-sheba, hata leo.[#Mwa 21:31]

Esau na wake zake Wahiti

³⁴Esau alipokuwa mwenye miaka arubaini, akamwoa Yudithi, binti Beeri, Mhiti, na Basemathi, binti Eloni, Mhiti.[#Mwa 36:2]

³⁵Roho zao Isaka na Rebeka zikajaa uchungu kwa ajili yao.[#Mwa 27:46; 28:1,8]